កម្តៅកាន់តែខ្លាំង! លោកត្រាំ​ប្រកាស​ថា អាច​ប្រើ​ជម្រើស​បញ្ជូនទ័ពជើងគោកវាយ​អ៊ីរ៉ង់

ប្រធានាធិបតី ដូណាល់ ត្រាំ បាន​ប្រកាស​​មិនច្រានចោលការបញ្ជូនកងទ័ពជើងគោកអាមេរិកទៅកាន់ប្រទេសអ៊ីរ៉ង់ឡើយ ដោយលោកបានបញ្ជាក់ក្នុងបទសម្ភាសន៍​មួយ​កាលពីថ្ងៃចន្ទ​ទី​២​ខែ​មីនា​ឆ្នាំ​២០២៦ថា លោកនឹងពិចារណាលើចំណាត់ការនេះ ប្រសិនបើចាំបាច់ ដើម្បីសម្រេចគោលដៅយោធា។

ថ្លែងទៅកាន់សារព័ត៌មាន New York Post លោកត្រាំ​បាន​និយាយ​​ថា លោកមិនមានការស្ទាក់ស្ទើរក្នុងការប្រើប្រាស់កម្លាំងទ័ពជើងគោកដូចប្រធានាធិបតីមុនៗនោះទេ ទោះបីជាលោកយល់ថាវា «ប្រហែលជា» មិនចាំបាច់ក៏ដោយ។ លោកបាន​សង្កត់​ធ្ងន់​​ថា គោលដៅធំបំផុតគឺការកម្ទេចសមត្ថភាពមីស៊ីល បំផ្លាញកងទ័ពជើងទឹកអ៊ីរ៉ង់​ឲ្យ​ខ្ទេចខ្ទី បញ្ឈប់មហិច្ឆតានុយក្លេអ៊ែរ និងផ្តាច់ការផ្តល់មូលនិធិដល់កងទ័ពភេរវករ​នៅក្រៅប្រទេស។

សាររបស់រដ្ឋបាលលោកត្រាំ​អំពីរយៈពេលនៃ «ប្រតិបត្តិការ Epic Fury» បានបង្ហាញពីការប្រែប្រួលយ៉ាងខ្លាំងក្នុងរយៈពេល​៧២ម៉ោងចុងក្រោយនេះ។ កាលពីព្រឹកថ្ងៃសៅរ៍ លោកត្រាំ​បានពណ៌នាយុទ្ធនាការនេះថាជាប្រតិបត្តិការដ៏ធំធេង និងកំពុងបន្ត ហើយ​បានប្រាប់អ្នកយកព័ត៌មានថា វាអាចនឹងបញ្ចប់ក្នុងរយៈពេលត្រឹមតែ​ពីរឬបីថ្ងៃ​ប៉ុណ្ណោះ។ ទោះជាយ៉ាងណាក៏ដោយ នៅថ្ងៃអាទិត្យ លោកបានប្តូរមកនិយាយថា វាអាចប្រើពេល​ប្រហែលបួនសប្តាហ៍ ហើយរហូតដល់ថ្ងៃច័ន្ទ លោកបានបញ្ជាក់ជាថ្មីថាវាអាចនឹងអូសបន្លាយពី​បួនទៅប្រាំសប្តាហ៍ ឬអាច​យូរជាងនេះ ដើម្បីធានាថា គោលដៅទាំងអស់ត្រូវបានសម្រេច។

ចំណែក​ឯ​រដ្ឋមន្ត្រី​ការពារជាតិ លោក Hegseth និងឧត្តមសេនីយ៍ Dan Caine បានសង្កត់ធ្ងន់ថា បេសកកម្មកម្ទេចមហិច្ឆតានុយក្លេអ៊ែរ និងហេដ្ឋារចនាសម្ព័ន្ធយោធាអ៊ីរ៉ង់ គឺជា «ការងារដ៏លំបាក និងស្មុគស្មាញ» ដែលមិនអាចកំណត់ពេលវេលាច្បាស់លាស់បានឡើយ។

ជម្លោះនេះបានបណ្តាល​ឲ្យ​មានអ្នកស្លាប់ និងរបួសយ៉ាងច្រើន រួមទាំងការស្លាប់របស់មេដឹកនាំកំពូល Ayatollah Ali Khamenei ផងដែរ។ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា មនុស្សយ៉ាងហោចណាស់ ៥៥៥​នាក់បានស្លាប់ រួមទាំងកុមារជាង ១០០​នាក់នៅក្នុងសាលាបឋមសិក្សាមួយ​កន្លែង​ក្នុងក្រុង Minab ខណៈដែលការវាយប្រហាររបស់អ៊ីស្រាអែលនៅលីបង់បានសម្លាប់មនុស្ស ៣១នាក់។ ចំណែក​ឯ​សមាជិកយោធាអាមេរិក ៦នាក់ និងមនុស្ស ១១​នាក់នៅអ៊ីស្រាអែល​បាន​បាត់បង់​ជីវិត ក្រោយការវាយប្រហារសងសឹកពីសំណាក់អ៊ីរ៉ង់៕

ប្រែសម្រួល៖ ឈាង