ផ្លូវការ! អ៊ីរ៉ង់ ជ្រើសតាំងកូនប្រុសលោក Ali Khamenei ឲ្យបន្តវេន មេដឹកនាំកំពូល

ទីបំផុតប្រទេសអ៊ីរ៉ង់ បានជ្រើសតាំងកូនប្រុសរបស់លោក Ayatollah Ali Khamenei ឈ្មោះ Mojtaba ឲ្យឡើងកាន់តំណែងជាមេដឹកនាំកំពូលជាផ្លូវការហើយ។

តាមការផ្សាយរបស់ RT នៅថ្ងៃចន្ទទី៩ខែមីនាឆ្នាំ២០២៦, កូនប្រុសទី២របស់លោក Ali Khamenei ​បានក្លាយជាមេដឹកនាំកំពូលអ៊ីរ៉ង់ទី៣ ចំពេលភ្លើងសង្គ្រាមជាមួយសហរដ្ឋអាមេរិកកាន់តែរីករាលដាលយ៉ាងសន្ធោសន្ធៅ ក្រោយឪពុករបស់ខ្លួនត្រូវបានអ៊ីស្រាអែល ធ្វើឃាត។

ក្រុមប្រឹក្សាអ្នកជំនាញអ៊ីរ៉ង់ ដែលមានសមាជិក៨៨រូប បានបោះឆ្នោតគាំទ្រលើសពី៥៩សំឡេង ជ្រើសរើសបុរសវ័យ៥៦ឆ្នាំម្នាក់នេះ យ៉ាងប្រញាប់ប្រញាល់តាមរយៈប្រព័ន្ធអនឡាញ ដោយសារស្ថានភាពសង្គ្រាម និងការវាយប្រហារតាមអាកាសពីសំណាក់អាមេរិក និងអ៊ីស្រាអែល។

យ៉ាងណា ប្រធានាធិបតីអាមេរិកបានប្រកាសភ្លាមៗថា លោក Mojtaba Khamenei គឺជាមេដឹកនាំដែល «មិនអាចទទួលយកបាន» ខណៈលោកធ្លាប់និយាយហើយថា មេដឹកនាំថ្មីរបស់អ៊ីរ៉ង់ត្រូវតែមានការយល់ព្រមពីអាមេរិក បើមិនដូច្នោះទេ នឹងមិនអាចកាន់តំណែងបានយូរអង្វែងឡើយ។

មិនត្រឹមប៉ុណ្ណឹង មុននេះ ត្រាំក៏ប្រកាសហើយដែរថា លោកចង់ចូលរួមក្នុងការជ្រើសរើសមេដឹកនាំកំពូលថ្មី​​​របស់​អ៊ីរ៉ង់ ព្រោះលោកចង់បង្កើតឲ្យមានថ្នាក់ដឹកនាំថ្មីដែល​ធ្វើមិត្ត​ជាមួយអាមេរិក នៅក្នុងប្រព័ន្ធគ្រប់គ្រងរបស់ទីក្រុងតេហេរ៉ង់។

អ្វីដែលគួរឲ្យកត់សម្គាល់គឺថា អ៊ីស្រាអែល ធ្លាប់ប្រកាសក្តែងៗថា ខ្លួននឹងបន្តធ្វើឃាតអ្នកណាក៏ដោយ ឲ្យតែឡើងស្នងតំណែងមេដឹកនាំកំពូលអ៊ីរ៉ង់ Ayatollah Ali Khamenei។

រដ្ឋមន្ត្រីការពារជាតិអ៊ីស្រាអែល Israel Katz បានបង្ហោះលើប្រព័ន្ធផ្សព្វផ្សាយសង្គមកាលពីថ្ងៃពុធទី៤ខែមីនាថា៖ មេដឹកនាំរូបណាក៏ដោយ ឲ្យតែអ៊ីរ៉ង់តែងតាំងដើម្បីបន្តផែនការកម្ទេចអ៊ីស្រាអែល គំរាមកំហែងសហរដ្ឋអាមេរិក និងពិភពលោកសេរី ក៏ដូចជាបណ្ដាប្រទេសនៅក្នុងតំបន់និងធ្វើបាបប្រជាជនអ៊ីរ៉ង់ នោះនឹងក្លាយជាគោលដៅកម្ចាត់ចោល។ មិនថាបុគ្គលនោះមានឈ្មោះអ្វី ឬលាក់ខ្លួននៅទីណានោះទេ»៕

អត្ថបទ៖ សុខ សុវណ្ណ