FBI ព្រមានថា អ៊ីរ៉ង់​អាចប្រើ​ដ្រូន​​វាយប្រហារ​រដ្ឋកាលីហ្វ័រញ៉ា

ទីភ្នាក់ងារ FBI បានចេញសេចក្តីជូនដំណឹងអាសន្នមួយទៅកាន់ប៉ូលិសក្នុងរដ្ឋកាលីហ្វ័រញ៉ា ដោយព្រមានថា ប្រទេសអ៊ីរ៉ង់អាចនឹងសងសឹកចំពោះការវាយប្រហាររបស់សហរដ្ឋអាមេរិក តាមរយៈការបង្ហោះដ្រូន​វាយប្រហារទៅ​លើឆ្នេរសមុទ្រភាគខាងលិច។

យោងតាមរបាយការណ៍ដែលសារព័ត៌មាន ABC News ទទួលបាន​កាល​ពីថ្ងៃទី​១១​ខែ​មីនា​ឆ្នាំ​២០២៦ អាជ្ញាធរអាមេរិកមានព័ត៌មានសម្ងាត់ថា អ៊ីរ៉ង់មានបំណងចង់ធ្វើការវាយប្រហារភ្លាមៗដោយប្រើដ្រូន ដែលបង្ហោះចេញពីនាវាមិនស្គាល់អត្តសញ្ញាណមួយ នៅក្បែរឆ្នេរសមុទ្រអាមេរិក។ ការព្រមាននេះបានធ្វើឡើង បន្ទាប់ពីភាពតានតឹងបានកើនឡើងខ្លាំង ក្រោយ​ការវាយប្រហាររបស់អាមេរិក និងអ៊ីស្រាអែល បានសម្លាប់មន្ត្រីជាន់ខ្ពស់របស់អ៊ីរ៉ង់ជាបន្តបន្ទាប់។

ទោះបីជាការព្រមាននេះបានបញ្ជាក់ពីការគំរាមកំហែងចំគោលដៅក្នុងរដ្ឋកាលីហ្វ័រញ៉ាក៏ដោយ ក៏​ក្រុមអ្នកស៊ើបអង្កេតបានកត់សម្គាល់ថា ពួកគេនៅមិនទាន់មានព័ត៌មានលម្អិតអំពីពេលវេលា វិធីសាស្ត្រ ឬគោលដៅជាក់លាក់នៅឡើយទេ។ ប្រធានាធិបតី ដូណាល់ ត្រាំ បានថ្លែងថា លោកមិនមានការព្រួយបារម្ភចំពោះលទ្ធភាពនៃការវាយប្រហារពីសំណាក់ក្រុមដែលគាំទ្រដោយអ៊ីរ៉ង់ មកលើទឹកដីអាមេរិកនោះទេ។ នៅពេលអ្នកសារព័ត៌មានសួរថា តើលោកខ្លាចមានការសងសឹកក្នុងស្រុកដែរឬទេ? លោកប្រធានាធិបតីបានឆ្លើយយ៉ាងខ្លីថា «ទេ ខ្ញុំមិនខ្លាចឡើយ»។

ដើម្បីឆ្លើយតបនឹងការព្រមាននេះ រដ្ឋកាលីហ្វ័រញ៉ាបានបង្កើនវិធានការសន្តិសុខកាន់តែតឹងរ៉ឹង។ អ្នកនាំពាក្យរបស់អភិបាលរដ្ឋលោក Gavin Newsom បានបញ្ជាក់ថា ការិយាល័យ​សេវាកម្ម​បន្ទាន់នៃរដ្ឋកាលីហ្វ័រញ៉ា កំពុងសហការយ៉ាងសកម្មជាមួយមន្ត្រីថ្នាក់រដ្ឋ តំបន់ និងសហព័ន្ធ ដើម្បីតាមដានរាល់ការគំរាមកំហែងដែលអាចកើតមាន៕

ប្រែសម្រួល៖ ឈាង