រដ្ឋមន្ត្រី​ការបរទេសអ៊ីរ៉ង់​៖ ទោះបី Ali Larijani ត្រូវសម្លាប់​ ក៏ប្រព័ន្ធ​អ៊ីរ៉ង់នៅតែ«រឹងមាំ»

រដ្ឋមន្ត្រីការបរទេសអ៊ីរ៉ង់ លោក Abbas Araghchi បាន​​លើក​ឡើង​នៅ​ថ្ងៃទី១៨មីនាថា ការសម្លាប់ប្រធាន​​​សន្តិសុខ​​កំពូល​អ៊ីរ៉ង់លោក ​Ali Larijani ដោយសហរដ្ឋអាមេរិក និងអ៊ីស្រាអែល មិនបានធ្វើឲ្យរដ្ឋាភិបាល​អ៊ីរ៉ង់​​ចុះខ្សោយ ឬក៏ដួលរលំនូវ «រចនាសម្ព័ន្ធនយោបាយ» របស់ទីក្រុងតេហេរ៉ង់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Araghchi បានធ្វើការអត្ថាធិប្បាយភ្លាមៗ បន្ទាប់ពីអ៊ីរ៉ង់បានបញ្ជាក់ថា លោក Ali Larijani ប្រធានសន្តិសុខកំពូល​ក្នុងប្រទេស និងជាអ្នកនយោបាយ​​ម្នាក់​ដ៏មានឥទ្ធិពលបំផុត​ ត្រូវបានសម្លាប់នៅក្នុងការវាយប្រហារតាមអាកាស កាលពីថ្ងៃអង្គារទី១៧មីនា​​នៅ​ទីក្រុង​តេហេរ៉ង់​​។

នៅក្នុងបទសម្ភាសន៍ជាមួយ​ទូរទស្សន៍​​ Al Jazeera ដែលបានចាក់ផ្សាយបន្ទាប់ពី​ការ​ផ្សព្វផ្សាយ​​នៃ​ការស្លាប់​របស់​ ប្រធានសន្តិសុខកំពូលក្នុងប្រទេស​អ៊ីរ៉ង់​ លោក Araghchi បាននិយាយថា៖​«ខ្ញុំមិនដឹងថាហេតុអ្វីបានជាជនជាតិអាមេរិក និងអ៊ីស្រាអែល នៅតែមិនយល់ចំណុចនេះទេ។ សាធារណរដ្ឋអ៊ីស្លាមអ៊ីរ៉ង់មានរចនាសម្ព័ន្ធនយោបាយរឹងមាំជាមួយនឹងស្ថាប័ននយោបាយ សេដ្ឋកិច្ច និងសង្គមដែលបានបង្កើតឡើង។ ជាក់ស្ដែងទីក្រុងវ៉ាស៊ីនតោន និង​អ៊ីស្រាអែល​ មិនទាន់ដឹងថា វត្តមាន​ឬអវត្តមានរបស់បុគ្គលណាម្នាក់ មិនប៉ះពាល់ដល់រចនាសម្ព័ន្ធរដ្ឋាភិបាលនោះទេ»។

នៅក្នុងនោះដែរ លោកបានបញ្ចាក់បន្ថែមថា ជាការពិតណាស់ បុគ្គលម្នាក់ៗមានឥទ្ធិពល ហើយមនុស្សម្នាក់ៗដើរតួជារបស់ខ្លួន ខ្លះល្អជាង ខ្លះអាក្រក់ជាង ខ្លះតិចជាង ប៉ុន្តែអ្វីដែលសំខាន់នោះគឺថា ប្រព័ន្ធនយោបាយនៅក្នុងប្រទេសអ៊ីរ៉ង់គឺជារចនាសម្ព័ន្ធដ៏រឹងមាំមួយ។

គួរបញ្ចាក់ដែរថា អាមេរិក និងអ៊ីស្រាអែលបានសម្លាប់មន្ត្រី និងមេបញ្ជាការជាន់ខ្ពស់អ៊ីរ៉ង់ជាច្រើនរូប រួមទាំងមេដឹកនាំកំពូល​អ៊ីរ៉ង់ លោក Ayatollah Ali Khamenei ដែលបានស្លាប់ក្នុងអំឡុងពេលវាយប្រហារលើកដំបូងកាលពីថ្ងៃទី ២៨ ខែកុម្ភៈ។ ក្រោយមក កូនប្រុសរបស់ Ali Khamenei គឺ លោក Mojtaba Khamenei ត្រូវបានតែងតាំងឲ្យឡើងជំនួសវិញ៕

អត្ថបទ៖ សាង ស្រីល័ក្ខ