Macron តបទៅ Trump រឿងបើកច្រក Hormuz! ចាំស្ថានការណ៍ស្ងប់ស្ងាត់បន្តិច ចាំបារាំងទៅជួយ

ប្រធានាធិបតីអាមេរិក Donald Trump បានប្រកូកប្រកាសហើយប្រកូកប្រកាសទៀត ឲ្យសម្ព័ន្ធមិត្តជួយគ្នា បញ្ជូននាវាចម្បាំងទៅជួយបើកច្រកសមុទ្រ Hormuz ប៉ុន្តែហាក់ស្ងាត់គ្មានចម្លើយសោះ។ 

យ៉ាងណា ឥឡូវប្រទេសបារាំងបានចេញមុខហើយ ដោយលោកប្រធានាធិបតី Emmanuel Macron ផ្តាំទៅប្រមុខសេតវិមានវិញថា រដ្ឋាភិបាលទីក្រុងប៉ារីស នឹងបញ្ជូនកម្លាំងទៅជួយអមដំណើរកប៉ាល់ដឹកជញ្ជូនឆ្លងកាត់ផ្លូវទឹកនេះ នៅពេលស្ថានភាពប្រែមកជាស្ងប់ស្ងាត់ ជាងមុន។

មួយរយៈចុងក្រោយនេះ លោក​ Trump ខឹងចិត្តខ្លាំងណាស់ ព្រោះតែការអំពាវនាវរបស់គាត់គ្មាននរណាយកត្រចៀកស្តាប់ ឈានដល់ការជះកំហឹងដាក់សម្ព័ន្ធមិត្តនិងដៀលអង្គការណាតូ កប់ៗមាត់។

លោកបានពន្លះសម្ព័ន្ធមិត្តថា រាប់ឆ្នាំហើយអាមេរិកខំជួយពួកគេការពារខ្លួនពីសត្រូវខាងក្រៅ ប៉ុន្តែពួកគេបែរជាគ្មានភក្តីភាពនិងមិនជួយអាមេរិកទៅវិញ។ ពួកគេគ្មានភក្តីភាពសោះឡើយចំពោះអាមេរិក បន្ទាប់ពីទទួលបានការគាំទ្រផ្នែកសន្តិសុខអស់រយៈពេលជាច្រើនទសវត្សរ៍មកនោះ។

ឥឡូវ តាមការផ្សាយរបស់ Euro News, លោក Macron ចេញមុខបញ្ជាក់ហើយ ថា បារាំងអត់អាចធ្វើតាមការស្នើសុំលោក Trump បានភ្លាមៗទេ ពោលគឺត្រូវរង់ចាំឲ្យស្ថានការណ៍រាងធូរស្រាលបន្តិចសិន ចាំទៅជួយ។

ថ្លែងក្នុងកិច្ចប្រជុំក្រុមប្រឹក្សាការពារជាតិនៅទីក្រុងប៉ារីស កាលពីថ្ងៃអង្គារទី១៧ខែមីនា លោក Macron លើកឡើងថា ឲ្យបារាំងចូលរួមក្នុងប្រតិបត្តិការដើម្បីបើកឬរំដោះច្រកសមុទ្រ Hormuz នៅក្រោមលក្ខខណ្ឌបច្ចុប្បន្នគឺមិនអាចទៅរួចហើយ។

លោកសង្កត់ធ្ងន់ថា៖ «យើងមិនមែនជាភាគីនៃជម្លោះនោះទេ តែបារាំងត្រៀមខ្លួនរួចហើយ នៅពេលស្ថានភាពស្ងប់ស្ងាត់ជាងមុន ដើម្បីចូលរួមក្នុងកិច្ចខិតខំប្រឹងប្រែងអន្តរជាតិក្នុងការការពារសន្តិសុខចរាចរណ៍ផ្លូវទឹក។ យើងត្រៀមខ្លួនរួចរាល់ ជាមួយប្រជាជាតិដទៃទៀត ដើម្បីទទួលខុសត្រូវលើប្រព័ន្ធអមការពារ»។

លោកបញ្ជាក់ថា៖ «បារាំងមិនជ្រើសរើសសង្រ្គាមនេះទេ។ យើងមិនចូលរួមក្នុងសង្រ្គាមនេះឡើយ។ យើងមានជំហរការពារសុទ្ធសាធ។ គោលដៅរបស់យើងគឺច្បាស់លាស់៖ គឺដើម្បីការពារពលរដ្ឋរបស់យើង មូលដ្ឋានការទូត និងយោធារបស់យើង រួមទាំងផលប្រយោជន៍របស់យើងនៅក្នុងតំបន់នេះ»៕

អត្ថបទ៖ សុខ សុវណ្ណ