តើវិបត្តិមជ្ឈិមបូព៌ាកំពុងជួយបំពេញហោប៉ៅរុស្ស៊ីយ៉ាងដូចម្តេច?

ខណៈដែលពិភពលោកកំពុងតាមដានដោយក្តីបារម្ភនូវការរីករាលដាលនៃសង្គ្រាមនៅមជ្ឈិមបូព៌ា មានប្រទេសមួយកំពុងតែសប្បាយចិត្តនឹងការកើនឡើងនៃទឹកប្រាក់ក្នុងកុងធនាគាររបស់ខ្លួន នោះគឺប្រទេសរុស្ស៊ី។ ទោះបីជារុស្ស៊ីមិនមែនជាតួអង្គផ្ទាល់នៅក្នុងសង្គ្រាមលើកនេះក៏ដោយ ក៏​ប៉ុន្តែ​ភាពវឹកវរនៅតំបន់មជ្ឈិមបូព៌ាបានបង្កើតជា «ឱកាសមាស» ដែលជួយឲ្យសេដ្ឋកិច្ចរបស់ទីក្រុងមូស្គូ ងើបឡើងវិញយ៉ាងលឿនពីទណ្ឌកម្មអន្តរជាតិ។

១. តម្លៃប្រេងហក់ឡើងខ្ពស់កប់ពពក

តំបន់មជ្ឈិមបូព៌ាប្រៀបដូចជា «ស្ថានីយប្រេង» របស់ពិភពលោក។ នៅពេលសង្គ្រាមផ្ទុះឡើង មនុស្សម្នាចាប់ផ្តើមបារម្ភថាការដឹកជញ្ជូនប្រេងនឹងត្រូវរាំងស្ទះ ដែលធ្វើ​ឲ្យ​តម្លៃប្រេងសកលហក់ឡើងភ្លាមៗ។ យោង​តាម​ការ​ផ្សាយ​របស់ Business Insider ចុះ​ផ្សាយ​ថ្ងៃទី​១៧​ខែ​មីនា​ឆ្នាំ​២០២៦ ជាលទ្ធផល រុស្ស៊ីដែលជាអ្នកផលិតប្រេងដ៏ធំមួយ អាចរកចំណូលបន្ថែមបានរហូតដល់​១៥០លានដុល្លារក្នុងមួយថ្ងៃៗ។ កាលពីប៉ុន្មានខែមុន រុស្ស៊ីពិបាកនឹងលក់ប្រេង​ឲ្យ​បានចំណេញណាស់ ប៉ុន្តែត្រឹមតែពីរសប្តាហ៍ដំបូងនៃខែមីនានេះ ពួកគេរកចំណូលបានដល់ទៅ១០​ពាន់​លានដុល្លារ​បាត់ទៅហើយ។

២. «សំបុត្រមាស» ពីសហរដ្ឋអាមេរិក

សារព័ត៌មាន The Guardian ធ្លាប់​បាន​ចុះ​ផ្សាយ​កាល​ពីថ្ងៃ​ទី​៦មីនា​ថា ដើម្បីការពារកុំ​ឲ្យ​តម្លៃសាំងក្នុងស្រុកឡើងថ្លៃខ្លាំងពេក រដ្ឋាភិបាលអាមេរិកបានធ្វើរឿងមួយដែលនឹកស្មានមិនដល់ គឺការបន្ធូរបន្ថយទណ្ឌកម្មលើប្រេងរុស្ស៊ីជាបណ្តោះអាសន្ន។ អាមេរិកបានផ្ដល់លិខិតអនុញ្ញាតពិសេស ដល់ប្រទេសមួយចំនួនដូចជាឥណ្ឌា ឲ្យ​អាចទិញប្រេងរុស្ស៊ីដែលធ្លាប់តែត្រូវបានគេហាមឃាត់។ ការសម្រេចចិត្តនេះបានក្លាយជាការជួយបង្កើនកញ្ចប់ថវិកាសង្គ្រាមរបស់រុស្ស៊ីយ៉ាងច្រើនសន្ធឹកសន្ធាប់ និងនឹកស្មានមិនដល់។

៣. អតិថិជនចាប់ផ្តើមប្តូរចិត្តមកទិញប្រេងរុស្ស៊ី

ជាធម្មតា ប្រទេសដូចជាចិន និងឥណ្ឌា តែងតែទិញប្រេងច្រើនពីអារ៉ាប៊ីសាអូឌីត ឬអ៊ីរ៉ាក់។ ប៉ុន្តែនៅពេលដែលច្រកសមុទ្រ Hormuz ត្រូវបានបិទខ្ទប់ ឬមានគ្រោះថ្នាក់ដោយសារសង្គ្រាម អ្នកទិញទាំងនេះបានងាកមករកជម្រើសដែលមានសុវត្ថិភាពជាង។ ដោយសារផ្លូវដឹកជញ្ជូនប្រេងរបស់រុស្ស៊ីមិនរងផលប៉ះពាល់ពីសង្គ្រាមនៅមជ្ឈិមបូព៌ា ការនាំចូលប្រេងរុស្ស៊ីរបស់ប្រទេសឥណ្ឌាបានហក់ឡើងដល់ ៥០% ត្រឹមតែក្នុងរយៈពេលមួយខែប៉ុណ្ណោះ។ នេះ​បើ​យោង​តាម​ទិន្នន័យ​ដែល​ត្រូវ​បាន​បញ្ជាក់​ដោយ Bloomberg។

សម្រាប់វិមានក្រឹមឡាំង សង្គ្រាមនេះប្រៀបដូចជា «ដង្ហើមសេដ្ឋកិច្ច» ថ្មីមួយ។ ទឹកប្រាក់រាប់​ពាន់​លានដុល្លារដែលទទួលបានបន្ថែមនេះ កំពុងជួយរុស្ស៊ីក្នុងការចំណាយលើវិស័យយោធារបស់ខ្លួន និងជួយ​ឲ្យ​សេដ្ឋកិច្ចមានស្ថិរភាពឡើងវិញ ចំពេលដែលទណ្ឌកម្មរបស់លោកខាងលិចកំពុងតែព្យាយាមរឹតបន្តឹង។ ដ្បិត​ជម្លោះនេះបង្កការឈឺចាប់ដល់មនុស្សជាច្រើន ប៉ុន្តែសម្រាប់ថវិការដ្ឋរបស់រុស្ស៊ី វាបានក្លាយជាការបង្វែរដានដែលផ្តល់ផលចំណេញយ៉ាងមហិមា៕

អត្ថបទ៖ ឈាង