ព័ត៌មានអន្ដរជាតិ

ការគាំងច្រកសមុទ្រ Hormuz ធ្វើឲ្យអាស៊ីនិងអឺរ៉ុបស្គាល់ការឈឺចាប់

បានផុស

៤ ខែ មុន

នៅ

ថ្ងៃសៅរ៍ ២១ មីនា ២០២៦

ដោយ

ច្រកសមុទ្រ Hormuz មានសារៈសំខាន់ជាយុទ្ធសាស្ត្រចំពោះអឺរ៉ុបនិងអាស៊ី ព្រោះវាជាផ្លូវដឹកជញ្ជូនប្រេងឆៅប្រហែល ២០ភាគរយ និងឧស្ម័នធម្មជាតិរាវ (LNG) ប្រហែល២៥ភាគរយ នៃតម្រូវការក្នុងពិភពលោក។ ច្រកនេះជាដង្ហើមថាមពលចិញ្ចឹមសេដ្ឋកិច្ចអឺរ៉ុបផង និងមហាអំណាចសេដ្ឋកិច្ចនៅអាស៊ីផង។ ការរំខានដល់ផ្លូវទឹកដ៏សំខាន់នេះ កំពុងបង្កឲ្យតម្លៃប្រេងឡើងថ្លៃ និងអតិផរណាយ៉ាងធ្ងន់ធ្ងរនៅគ្រប់តំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ពី Yahoo មូលហេតុដែលច្រកសមុទ្រ Hormuz មានសារៈសំខាន់ ដោយសារតែហេតុផលសាមញ្ញមួយ នោះគឺវាជាច្រកសមុទ្រមួយក្នុងចំណោមច្រកសមុទ្រយុទ្ធសាស្ត្រ និងសំខាន់បំផុតសម្រាប់ការដឹកជញ្ជូនថាមពល។ ច្រកមួយនេះស្ថិតនៅចន្លោះឈូងសមុទ្រពែរ្ស និងឈូងសមុទ្រអូម៉ង់ ដែល២០% នៃផលិតកម្មប្រេងទូទាំងពិភពលោក ត្រូវបាននាំចេញតាមច្រកនេះ។ បើគ្មានច្រកមួយនេះទេ ទីផ្សារថាមពលសកលអាចនឹងជាប់គាំងទាំងអស់ ឬថា ទ្វីបអាស៊ី និងទ្វីបអឺរ៉ុបស្ទើរតែងងឹតសូន្យសុង លង់ក្នុងអន្ធការ ហើយ ផលិតកម្មទៀតសោតអាចជាប់គាំង និងដាំក្បាលចុះ។

ក្នុងជម្លោះនៅអ៊ីរ៉ង់នេះ អឺរ៉ុបបានប្រឹងជម្នះខ្លាំងណាស់ដើម្បីធានាការផ្គត់ផ្គង់ថាមពលដែលមានស្ថិរភាព ចាប់តាំងពីខ្លួនបានកាត់ផ្តាច់ទំនាក់ទំនងជាមួយរុស្ស៊ី បន្ទាប់ពីការឈ្លានពានអ៊ុយក្រែន។ ចំណែកនៅតំបន់អាស៊ីវិញ ប្រទេសជប៉ុនក្តី កូរ៉េខាងត្បូងក្តីនិងប្រទេសនានាក្នុងតំបន់អាស៊ានក្តី សុទ្ធតែមានក្តីបារម្ភខ្លាំងចំពោះវិបត្តិថាមពល ប៉ុន្តែចិនដែលទិញប្រេងច្រើនបំផុតពីអ៊ីរ៉ង់ហាក់មានភាពធូរស្រាលជាងគេ ដោយសារតែអ៊រ៉ង់បើកដៃឲ្យតែចិនទេសម្រាប់ការនាំចេញដោយសុវត្ថិភាពនោះ។

ទោះបីយ៉ាងណា ជម្លោះនៅមជ្ឈិមបូព៌ាក៏អាចប្រែក្លាយទៅជាវិបត្តិថាមពលមួយផ្សេងទៀតដែលប៉ះពាល់ដល់គ្រួសារ និងឧស្សាហកម្មផ្សេងទៀត។

ការរំខាននៅក្នុងច្រកសមុទ្រ Hormuz នឹងជំរុញឲ្យតម្លៃឡើងថ្លៃគ្រប់ទីកន្លែង ដែលប៉ះពាល់ដល់ ថ្លៃប្រេងឥន្ធនៈ,ថ្លៃអគ្គិសនី និងអតិផរណានៅទូទាំងសេដ្ឋកិច្ចអឺរ៉ុប ខណៈនៅតំបន់អាស៊ី លោកត្រាំ បានអំពាវនាវឲ្យសម្ព័ន្ធមិត្តរួមទាំងចិនផង ជួយការពារច្រកនេះដើម្បីធានាសុវត្ថិភាពនាំចេញប្រេង។

មិនតែប៉ុណ្ណោះ ច្រកសមុទ្រមួយនេះក៏ជាផ្លូវសំខាន់ សម្រាប់ការនាំចូលជីទៅក្នុងទឹកដីអឺរ៉ុបផងដែរ។ បន្ថែមពីលើការគ្រប់គ្រងការផ្គត់ផ្គង់ប្រេង និងឧស្ម័ន ប្រហែល ១៣% នៃការនាំចេញជីសកល យោងតាមអង្គការសហប្រជាជាតិ ក៏ឆ្លងកាត់ច្រកសមុទ្រតែមួយគត់របស់ឈូងសមុទ្រទៅកាន់មហាសមុទ្របើកចំហផងដែរ ដែលជាកត្តារួមចំណែកដ៏សំខាន់ដល់ការផលិតស្បៀងអាហាររបស់ពិភពលោក។

អ្នកការទូតកំពូលរបស់សហភាពអឺរ៉ុប លោកស្រី Kaja Kallas បានប្រាប់អ្នកយកព័ត៌មាននៅចំពោះមុខក្រុមប្រឹក្សាការបរទេសអឺរ៉ុបក្នុងពេលកន្លងមកថា «ប្រសិនបើមានការខ្វះខាតជីនៅឆ្នាំនេះ វានឹងមានការខ្វះខាតស្បៀងអាហារនៅឆ្នាំក្រោយដូចគ្នា»៕

អត្ថបទ៖ សាង ស្រីល័ក្ខ