វៀតណាមចាប់ដៃរុស្ស៊ីសង់រោងចក្រនុយក្លេអ៊ែរ ខណៈហ្វីលីពីន និងឥណ្ឌូណេស៊ីបង្កើនល្បឿនផែនការថាមពល​អាតូមិក

ក្នុងខណៈដែលពិភពលោកកំពុងដើរឆ្ពោះទៅរកការកាត់បន្ថយការបញ្ចេញឧស្ម័នកាបូន តំបន់អាស៊ានបាននិងកំពុងបង្ហាញមហិច្ឆតាកាន់តែខ្លាំងក្នុងការឈានជើងចូលទៅក្នុងយុគសម័យថាមពលនុយក្លេអ៊ែរ។ ទោះបីជាបច្ចុប្បន្ន មិនទាន់មានរោងចក្រថាមពលនុយក្លេអ៊ែរណាមួយកំពុងដំណើរការផលិតអគ្គិសនីក្នុងតំបន់នេះនៅឡើយក្តី ប៉ុន្តែសន្ទុះនៃកិច្ចព្រមព្រៀង និងការរៀបចំផែនការជាតិបានបង្ហាញថា វៀតណាម ហ្វីលីពីន និងឥណ្ឌូណេស៊ី កំពុងស្ថិតក្នុងការប្រកួតប្រជែងយ៉ាងស្វិតស្វាញ ដើម្បីក្លាយជាប្រទេសដំបូងគេដែលមានថាមពលអាតូមិកប្រើប្រាស់។

វៀតណាមបានក្លាយជាចំណុចកណ្តាលនៃការចាប់អារម្មណ៍ បន្ទាប់ពីការចុះហត្ថលេខាលើកិច្ចព្រមព្រៀង​ជាមួយប្រទេសរុស្ស៊ី កាលពីដើមសប្តាហ៍នេះ ដើម្បីសាងសង់រោងចក្រថាមពលនុយក្លេអ៊ែរ Ninh Thuan 1។ យោងតាមភ្នាក់ងារព័ត៌មាន World Nuclear News គម្រោងនេះ នឹងប្រើប្រាស់បច្ចេកវិទ្យាម៉ាស៊ីនប្រតិកម្មប្រភេទ VVER-1200 ដែលជាបច្ចេកវិទ្យាទំនើបជំនាន់ទី៣បូករបស់ក្រុមហ៊ុន Rosatom។ តាមរយៈកិច្ចព្រមព្រៀងនេះ វៀតណាមរំពឹងថានឹងអាចបញ្ចប់ការសាងសង់ និងចាប់ផ្តើមដំណើរការម៉ូទ័រដំបូងរបស់ខ្លួននៅត្រឹមឆ្នាំ២០៣១ ដែលជាជំហានដ៏ធំមួយក្នុងការឆ្លើយតបទៅនឹងតម្រូវការអគ្គិសនីក្នុងស្រុកដែលកំពុងកើនឡើងយ៉ាងគំហុក។

ទន្ទឹមនឹងនេះ ប្រទេសហ្វីលីពីនក៏កំពុងបោះជំហានយ៉ាងលឿនតាមរយៈយុទ្ធសាស្ត្រទ្វេភាគ ដែលរួមមានទាំងការសិក្សាពីលទ្ធភាពនៃការស្ដារឡើងវិញនូវរោងចក្រថាមពលនុយក្លេអ៊ែរ Bataan ដែលត្រូវបានបោះបង់ចោលជាច្រើនទសវត្សរ៍មកហើយ និងការសំឡឹង​មើលការសាងសង់រោងចក្រថ្មីបន្ថែមទៀត។ នេះបើ​តាមសេចក្តីរាយការណ៍របស់ Philippine News Agency (PNA)។ រដ្ឋាភិបាលទីក្រុងម៉ានីលបានកំណត់ទិសដៅយ៉ាងច្បាស់លាស់ក្នុងផែនការថាមពលជាតិឆ្នាំ២០២៦-២០៥០ របស់ខ្លួន ដោយរំពឹងថានឹងអាចបញ្ជូនថាមពលនុយក្លេអ៊ែរចូលទៅក្នុងបណ្តាញអគ្គិសនីជាតិ​ឲ្យ​បានត្រឹមឆ្នាំ២០៣២ ក្រោមក្របខណ្ឌសហប្រតិបត្តិការបច្ចេកវិទ្យាជាមួយសហរដ្ឋអាមេរិក។

ដោយឡែក ឥណ្ឌូណេស៊ី និងថៃ ក៏មិនបានបង្អង់យូរដែរ ដោយបានដាក់បញ្ចូលថាមពលនុយក្លេអ៊ែរទៅក្នុងផែនការអភិវឌ្ឍន៍ថាមពលជាតិរៀងៗខ្លួន។ តាមការចុះផ្សាយរបស់​ក្រុមហ៊ុនស្រាវជ្រាវ​ថាមពល​ Enerdata និង Nuclear Business Platform ឥណ្ឌូណេស៊ីបានផ្តោតការយកចិត្តទុកដាក់ខ្ពស់លើបច្ចេកវិទ្យាម៉ាស៊ីនប្រតិកម្មខ្នាតតូច ឬ SMR (Small Modular Reactors) ដែលមានសុវត្ថិភាពខ្ពស់ និងភាពបត់បែនក្នុងការដំឡើងនៅតាមបណ្តាកោះដាច់ស្រយាល ខណៈដែលប្រទេសថៃបានបញ្ចូលការសាងសង់រោងចក្រនុយក្លេអ៊ែរខ្នាតតូចចំនួន២​កន្លែងទៅក្នុងផែនការ PDP ឆ្នាំ២០២៤-២០៣៧ របស់ខ្លួន។

ការផ្លាស់ប្តូរឥរិយាបថរបស់មេដឹកនាំអាស៊ានចំពោះថាមពលនុយក្លេអ៊ែរនេះ ឆ្លុះបញ្ចាំង​ឲ្យឃើញពីតម្រូវការចាំបាច់នៃប្រភពថាមពលដែលមានស្ថិរភាព និងមិនបញ្ចេញឧស្ម័នពុល ដើម្បីទ្រទ្រង់ដល់កំណើនសេដ្ឋកិច្ចក្នុងតំបន់នាពេលអនាគត៕

អត្ថបទ៖ ឈាង