ព័ត៌មានអន្ដរជាតិ

រុស្ស៊ីបើកការវាយប្រហារទ្រង់ទ្រាយធំលើអ៊ុយក្រែន ចំពេលសង្រ្គាមនៅអ៊ីរ៉ង់កំពុងក្តៅ

បានផុស

៣ ខែ មុន

នៅ

ថ្ងៃព្រហស្បតិ៍ ២៦ មីនា ២០២៦

ដោយ

ខណៈស្ថានភាពនៅអ៊ីរ៉ង់មិនទាន់ធូរស្រាលពីភ្នក់ភ្លើងសង្រ្គាម ដោយភាគីជម្លោះកំពុងបន្តប្រយុទ្ធនិងសងសឹកគ្នាដោយការបាញ់ស្រោចមីស៊ីល ដ្រូន និងការទម្លាក់គ្រាប់បែកពាសពេញតំបន់ ស្ថានការសង្គ្រាមនៅប្រទេសអ៊ុយក្រែនក៏ឡើងកម្តៅខ្លាំងដៃណាស់ដែរ។

យោងតាមការផ្សាយរបស់ CNN កងទ័ពអាកាសអ៊ុយក្រែនបានអះអាងថា ទីក្រុងមូស្គូបានបើកការវាយប្រហារទ្រង់ទ្រាយធំជាបន្តបន្ទាប់លើអ៊ុយក្រែនក្នុងសប្តាហ៍នេះ ដោយបាញ់ដ្រូនជាង ១០០០ គ្រឿងក្នុងរយៈពេល ៣៦ម៉ោងចុងក្រោយ ដែលមើលទៅវាហាក់ដូចជាការបើកការប្រយុទ្ធក្នុងដំណាក់កាលថ្មីមួយនៅលើសមរភូមិក្នុងប្រទេសអ៊ុយក្រែនដែលប្រឹងប្រែងតស៊ូជម្នះការវាយប្រហារនេះអស់រយៈពេលជាង៤ឆ្នាំ។

មហាអំណាចលោកខាងលិច ដែលមាន«សហរដ្ឋអាមេរិក» ជាអ្នកចាប់ផ្តើមបើកយុទ្ធនាការសង្គ្រាមរួមកម្លាំងជាមួយអ៊ីស្រាអែលវាយប្រហារលើប្រទេសអ៊ីរ៉ង់ ដោយអាមេរិកនិងអ៊ីស្រាអែលកំពុងផ្តោតនិងរវល់រកដំណោះស្រាយសមស្របមួយជាមួយទីក្រុងតេហេរ៉ង់ រីឯរុស្ស៊ីឯណោះវិញឆ្លៀតឱកាសដែលសម្ព័ត្តមិត្តនិងអ្នកផ្តល់ជំនួយដ៏ធំរបស់អ៊ុយក្រែនកំពុងតែរវល់ក៏បើកការវាយប្រហារមិនធម្មតា។

យោងតាម CNN ផ្សាយថ្ងៃទី២៥ខែមីនា កងទ័ពអាកាសអ៊ុយក្រែន បាននិយាយថា រុស្ស៊ីបានបាញ់បញ្ជាដ្រូនជិត៤០០គ្រឿង (៣៩២ គ្រឿង) ចេញពីពីទឹកដីរុស្ស៊ីនៅយប់ថ្ងៃចន្ទដល់ថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអ៊ុយក្រែន បានបន្តថា ដ្រូនជាង ៥៥០គ្រឿង ត្រូវបានបាញ់ចេញពីគោលដៅនានាទូទាំងប្រទេសក្នុងការវាយប្រហារដ៏កម្រ និងសាហាវមួយពេលថ្ងៃកាលពីថ្ងៃអង្គារ និង ចំនួន ១៤៧ គ្រឿងទៀតនៅយប់ថ្ងៃពុធ ដោយវាយប្រហារទីតាំងជាងដប់កន្លែង។ នេះបើយោងតាមកងទ័ពអាកាស។

ការវាយប្រហារទ្រង់ទ្រាយធំទាំងនេះបានកើតឡើង ពេលដែលកងកម្លាំងរុស្ស៊ីចាប់ផ្តើមការវាយលុកភាគខាងកើតអ៊ុយក្រែន រួមទាំងការប្រើប្រាស់រថក្រោះ និងរថពាសដែករាប់សិបគ្រឿង។ នេះបើយោងតាមយោធាអ៊ុយក្រែន និងអ្នកវិភាគប្រាប់សារព័ត៌មាន CNN កាលពីដើមសប្តាហ៍នេះ។

ការវាយប្រហារលើអ៊ុយក្រែនកំពុងកើនឡើងយ៉ាងលឿន ខណៈប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី(Volodymyr Zelensky) ព្រមានពីផលវិបាកនៃជម្លោះនៅមជ្ឈិមបូព៌ា សម្រាប់ប្រទេសរបស់ខ្លួន។

លោក ហ្សេលេនស្គី និយាយថា៖ «ការវាយប្រហារដោយដ្រូន កាលពីថ្ងៃអង្គារធ្វើឱ្យមនុស្សយ៉ាងហោចណាស់ ៤០នាក់ នៅក្នុងប្រទេសអ៊ុយក្រែនរងរបួស រួមទាំងកុមារ ៥នាក់ផងដែរ»។

អភិបាលខេត្ត Svitlana Onyshchuk ឱ្យដឹងថា យ៉ាងហោចណាស់មានមនុស្សពីរនាក់ក្នុងតំបន់ Ivano-Frankivsk ភាគខាងលិចប្រទេសអ៊ុយក្រែន បានស្លាប់នៅក្នុងការវាយប្រហារមួយលើមន្ទីរពេទ្យសម្ភព ខណៈ ១១នាក់ផ្សេងទៀតរងរបួស។

ចំណែកវិទ្យាស្ថានសម្រាប់ការសិក្សាផ្នែកសង្គ្រាម (ISW) ជាក្រុមជំនាញដែលមានមូលដ្ឋាននៅទីក្រុងវ៉ាស៊ីនតោន លើកឡើងនៅក្នុងការវិភាគចុងក្រោយរបស់ខ្លួនថា៖ «ការវាយប្រហាររបស់រុស្ស៊ីនៅថ្ងៃទី ២៣ ដល់ ២៤ ខែមីនា តំណាងឱ្យការផ្លាស់ប្តូរដ៏សំខាន់មួយជាយុទ្ធសាស្ត្រវាយប្រហាររបស់រុស្ស៊ី អនុញ្ញាតឱ្យប្រទេសនេះបន្តគំរាមកំហែងតំបន់ជាច្រើនទៀតនៃប្រទេសអ៊ុយក្រែនរយៈពេលយូរ និងប៉ះពាល់ដល់តំបន់ស៊ីវិលផងដែរ»៕

ប្រែសម្រួល៖ ណឺ មិនា