ព័ត៌មានអន្ដរជាតិ

អាមេរិកបង្កើនកម្លាំងទ័ពទៅជម្ឈិមបូព៌ា បង្កើនសម្ពាធចរចាលើអ៊ីរ៉ង់

បានផុស

៤ សប្តាហ៍ មុន

នៅ

ថ្ងៃសុក្រ ២៧ មីនា ២០២៦

ដោយ

គិតត្រឹមថ្ងៃទី ២៦ខែមីនា ឆ្នាំ ២០២៦ សហរដ្ឋអាមេរិកកំពុងបង្កើនកងទ័ពរបស់ខ្លួនបន្ថែមនៅមជ្ឈិមបូព៌ា ជាផ្នែកមួយនៃយុទ្ធសាស្ត្រ «ផ្លូវពីរ» ដើម្បីដាក់សម្ពាធលើអ៊ីរ៉ង់ឱ្យទទួលយកផែនការសន្តិភាពថ្មីចំនួន ១៥ចំណុច ខណៈខ្លួននៅតែបន្តការគំរាមកំហែងសកម្មភាពយោធាដែលបានពង្រីកក្នុងតំបន់។ នេះបើយោងតាម The New York Times ផ្សាយថ្ងៃទី២៦ ខែមីនាឆ្នាំ២០២៦ ។

ថ្មីៗនេះ មន្ទីរបញ្ចកោណ បានបញ្ជាឱ្យពង្រឹងកងកម្លាំងចំនួនបីក្រុមធំៗ ដើម្បីបំពេញដល់កងទ័ពអាមេរិកប្រមាណ ៥០ ០០០ នាក់ដែលបានឈរជើងក្នុងតំបន់រួចហើយ។ កងកម្លាំងដែលបំពេញបន្ថែមនិងដាក់ពង្រាយរួមមាន៖

១. កងពលទ័ពអាកាសទី៨២៖ ទាហានឆ័ត្រយោងចន្លោះពី ១ ០០០ ទៅ ៣ ០០០ នាក់ ដែលជាកងកម្លាំងប្រតិបត្តិការ និងឆ្លើយតបភ្លាមៗចំពោះគោលដៅ។

២. អង្គភាពបេសកកម្មកងម៉ារីន៖ កងម៉ារីនប្រហែល ៥ ០០០ នាក់ និងនាវិករាប់ពាន់នាក់កំពុងធ្វើដំណើរឆ្ពោះទៅកន្លែងប្រតិបត្តិការណ៍។

៣. ធនធានកងទ័ពជើងទឹក៖ ក្រុមវាយប្រហារនាវាផ្ទុកយន្តហោះ USS Gerald R. Ford និង USS Abraham Lincoln ដាក់ឱ្យដំណើរការ ដើម្បីផ្តល់ជម្រើសវាយប្រហារឃ្លាំមើល។

គោលបំណងនៃដាក់ពង្រាយទ័ពគឺជាយុទ្ធសាស្ត្រចរចាដោយដាក់សម្ពាធលើអីរ៉ង់ សហរដ្ឋអាមេរិកមានផែនការយ៉ាងច្បាស់លាស់ក្នុងជម្លោះជាមួយអ៊ីរ៉ង់ ចាប់តាំងពីថ្ងៃទី២៨ ខែកុម្ភៈ នឹងកំពុងបន្ត ហើយបម្រើគោលដៅយុទ្ធសាស្ត្រជាច្រើនដូចជា៖

១. ឥទ្ធិពលសម្រាប់ការទូត៖ កាសែត The New York Times រាយការណ៍ថា ការដាក់ពង្រាយទាំងនេះមានគោលបំណងផ្តល់ឱ្យប្រធានាធិបតី លោក ដូណាល់ ត្រាំ មានឥទ្ធិពលបន្ថែមក្នុងការចរចា។

២. ផែនការ ១៥ ចំណុច៖ សហរដ្ឋអាមេរិកដាក់សំណើបទឈប់បាញ់ដែលទាមទារឱ្យបញ្ចប់កម្មវិធីនុយក្លេអ៊ែររបស់អ៊ីរ៉ង់ និងកំណត់លើឃ្លាំងអាវុធមីស៊ីលរបស់ខ្លួន។

៣. ការត្រៀមខ្លួន «Epic Fury»៖ អ្នកនាំពាក្យប្រចាំសេតវិមាន លោកស្រី Karoline Leavitt ថ្លែងថា៖ « ខណៈសហរដ្ឋអាមេរិកផ្តល់ផ្លូវឱ្យអ៊ីរ៉ង់ផ្នែកការទូត តែប្រតិបត្តិការ Epic Fury នៅតែសកម្ម ហើយប្រសិនបើការចរចាបរាជ័យ សហរដ្ឋអាមេរិកនឹងត្រលប់ទៅទម្លាក់គ្រាប់បែកវិញ»។

៤. ការធានាហេដ្ឋារចនាសម្ព័ន្ធសំខាន់ៗ៖ ជម្រើសយោធាកំពុងស្ថិតលើការពិចារណា រួមមានការធានាសុវត្ថិភាពច្រកសមុទ្រ Hormuz និងកោះ Kharg ដែលជាកោះនាំចេញប្រេងចំនួន ៩០% នៃការនាំចេញប្រេងរបស់អ៊ីរ៉ង់៕

ប្រែសម្រួល៖ ណឺ មិនា