ឥណ្ឌូណេស៊ី ចេញ​ប្រតិកម្ម ក្រោយកងកម្លាំង​​ខ្លួន​ត្រូវ​បានសម្លាប់​ដោយ​អ៊ីស្រាអែល​​​

​ក្រោយ​​​​កង​កម្លាំ​ង​​មូកខៀវ​​របស់ខ្លួន​​ចំនួន​៣នាក់​ត្រូ​វបានសម្លាប់​នៅ​ក្នុង​ប្រទេសលីបង់ ដោយសារ​ការវាយ​ប្រហារ​របស់​អ៊ីស្រាអែល ឥណ្ឌូណេស៊ីបានជំរុញឲ្យគ្រប់ភាគីជម្លោះនៅមជ្ឈិមបូព៌ា «គោរពច្បាប់មនុស្សធម៌អន្តរជាតិ» ព្រមទាំងអំពាវនាវឲ្យមានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការពារជាតិ​ឥណ្ឌូណេស៊ី លោក Rico Ricardo Sirait បានលើក​ឡើង​នៅ​ក្នុងសេចក្តីថ្លែងការណ៍មួយថា «សុវត្ថិភាពរបស់កងទ័ពរក្សាសន្តិភាពត្រូវតែជាអាទិភាពចម្បង។ គ្រប់ភាគីជម្លោះទាំងអស់ត្រូវបានជំរុញឲ្យគោរពច្បាប់មនុស្សធម៌អន្តរជាតិ និងធានាសុវត្ថិភាពរបស់បុគ្គលិករក្សាសន្តិភាព»។ នេះបើយោងតាមរបាយការណ៍ពីទីភ្នាក់ងារ alarabiya ។

កងកម្លាំងបណ្ដោះអាសន្នរបស់អង្គការសហប្រជាជាតិប្រចាំប្រទេសលីបង់ (UNIFIL) បាននិយាយថា បុគ្គលិកពីរនាក់របស់ខ្លួនត្រូវបានសម្លាប់កាលពីថ្ងៃចន្ទទី៣០មីនា នៅក្នុងការផ្ទុះមួយ និងម្នាក់ទៀតបានស្លាប់នៅយប់ថ្ងៃអាទិត្យ នៅពេលដែលគ្រាប់ផ្លោងមួយបានវាយប្រហារទីតាំងរបស់ពួកគេ។

ដោយថ្កោលទោសការវាយប្រហារដ៏ «សាហាវយង់ឃ្នង» រដ្ឋមន្ត្រីការបរទេសឥណ្ឌូណេស៊ី លោក Sugiono បាននិយាយនៅថ្ងៃអង្គារនេះថា លោកបានពិភាក្សាអំពីការស្លាប់នេះជាមួយប្រធានអង្គការសហប្រជាជាតិ លោក Antonio Guterres ហើយស្នើសុំឲ្យមានកិច្ចប្រជុំបន្ទាន់មួយ ស្តីពីសន្តិសុខអង្គការសហប្រជាជាតិ ក៏ដូចជា «ការស៊ើបអង្កេតយ៉ាងរហ័ស ហ្មត់ចត់ និងមានតម្លាភាព»។

លោក Sugiono ដែលដូចជាជនជាតិឥណ្ឌូណេស៊ីជាច្រើនដែរ បានមានប្រសាសន៍ថា «សុវត្ថិភាព និងសន្តិសុខរបស់កងកម្លាំងរក្សាសន្តិភាពអង្គការសហប្រជាជាតិ គឺមិនអាចចរចាបានទេ ហើយត្រូវតែគោរពគ្រប់ពេលវេលា»។

ជាមួយគ្នានោះដែរ លោក Jean-Pierre Lacroix អគ្គលេខាធិការរងអង្គការសហប្រជាជាតិទទួលបន្ទុកប្រតិបត្តិការសន្តិភាព បានថ្កោលទោស «ឧប្បត្តិហេតុដែលមិនអាចទទួលយកបានទាំងនេះ ដោយលើកថា សកម្មភាពទាំងអស់ដែលធ្វើឲ្យប៉ះពាល់ដល់កងកម្លាំងរក្សាសន្តិភាពត្រូវតែបញ្ឈប់៕

អត្ថបទ៖ សាង ស្រីល័ក្ខ