អ៊ីរ៉ាក់សំដែងសមានចិត្ត​ជា​ «បងប្អូន»​ជាមួយអ៊ីរ៉ង់​ ដែលឲ្យនាវាដឹកប្រេង​អ៊ីរ៉ាក់​ឆ្លងកាត់ច្រក Hormuz

រដ្ឋមន្ត្រីការបរទេសអ៊ីរ៉ាក់ លោក Fuad Hussein បានថ្លែងអំណរគុណដល់អ៊ីរ៉ង់ ដែលបានសម្របសម្រួល និងអនុញ្ញាតឲ្យនាវាដឹកប្រេង​របស់​អ៊ីរ៉ាក់ឆ្លងកាត់ច្រកសមុទ្រ Hormuz ចំពេលមានការរឹតបន្តឹងរបស់សាធារណរដ្ឋអ៊ីស្លាមលើ​ច្រក​​នាំចេញ​​ថាមពលសកលដ៏សំខាន់។ នេះបើយោងតាមការចុះផ្សាយដោយទីភ្នាក់ងារសារព័ត៌មាន alarabiya កាលពីថ្ងៃអាទិត្យទី៥មេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបជាមួយ​លោក Mohammad Kazem Al-e Sadeq ឯកអគ្គរដ្ឋទូតអ៊ីរ៉ង់​ប្រចាំទីក្រុងបាកដាដ ​រដ្ឋមន្ត្រី​ការបរទេស​អ៊ីរ៉ាក់ លោក Hussein បានសង្កត់ធ្ងន់លើតម្រូវការក្នុងការបន្តកិច្ចសហប្រតិបត្តិការទ្វេភាគី និងស្វែងរកមធ្យោបាយដើម្បីបញ្ចប់សង្គ្រាមនៅក្នុងតំបន់។ ជាពិសេស ការបន្តកិច្ចសហប្រតិបត្តិការយ៉ាងជិតស្និទ្ធរវាងទីក្រុងតេហេរ៉ង់ និងទីក្រុងបាកដាដ នឹងជួយបម្រើផលប្រយោជន៍រួមរបស់ភាគីទាំងពីរ»។

អ្នកការទូតកំពូលអ៊ីរ៉ាក់រូបនេះបានបន្ថែមថា គោលនយោបាយរបស់ប្រទេសលោក គឺផ្អែកលើការចៀសវាងសង្គ្រាម និងធ្វើការឆ្ពោះទៅរកការបញ្ចប់ជម្លោះ ដោយសង្កត់ធ្ងន់ថា ទីក្រុងបាកដាដគាំទ្រជានិច្ចចំពោះការដោះស្រាយបញ្ហាតាមរយៈបណ្តាញសន្តិភាព។

លោក Hussein បានបន្ថែមថា តំបន់នេះត្រូវការវិធីសាស្រ្តមួយដែលផ្អែកលើការសន្ទនាបើកចំហ និងសមហេតុផល ដែលអាចបើកផ្លូវសម្រាប់កិច្ចសហប្រតិបត្តិការកាន់តែរឹងមាំក្នុងចំណោមប្រទេសក្នុងតំបន់ និងជួយសម្រេចបាននូវស្ថិរភាពយូរអង្វែង។

ដោយឡែក យោធាអ៊ីរ៉ង់កាលពីថ្ងៃទី៤មេសា បានហៅអ៊ីរ៉ាក់ថាជា «បងប្អូន» ដោយកត់សម្គាល់ថា «ប្រទេសអ៊ីរ៉ាក់ត្រូវបានដកចេញពីការរឹតបន្តឹងណាមួយដែលអនុវត្តចំពោះច្រកសមុទ្រ Hormuz ។ ការរឹតបន្តឹងទាំងនេះអនុវត្តចំពោះតែប្រទេសសត្រូវប៉ុណ្ណោះ»។

យោងតាមសារព័ត៌មានបរទេសសំខាន់ៗ រួមទាំង Bloomberg និង Reuters បានចុះផ្សាយថា នាវាដឹកប្រេង Ocean Thunder ដែលបានចេញដំណើរពីស្ថានីយ Basra នៃប្រទេសអ៊ីរ៉ាក់ ថ្មីៗនេះបានឆ្លងកាត់ច្រកសមុទ្រ Hormuz។ ផ្អែកតាមទិន្នន័យពីក្រុមហ៊ុនតាមដាននាវា Kpler នាវាដឹកប្រេងបានផ្ទុកប្រេងឆៅអ៊ីរ៉ាក់ប្រហែល ១លានបារ៉ែល ដោយចាកចេញពីច្រកសមុទ្រតាមរយៈច្រកតូចចង្អៀតមួយរវាងកោះ Larak របស់អ៊ីរ៉ង់ និងកោះ Qeshm។ បច្ចុប្បន្នវាកំពុងធ្វើដំណើរទៅកាន់ Pasir Gudang នៅភាគខាងត្បូងម៉ាឡេស៊ី ហើយត្រូវបានគេរំពឹងថានឹងមកដល់នៅពាក់កណ្តាលខែនេះ៕

អត្ថបទ៖ សាង ស្រីល័ក្ខ