លោកត្រាំ ប្រកាសថា ចិនយល់ព្រមឈប់ផ្ដល់អាវុធឲ្យអ៊ីរ៉ង់

កាលពីថ្ងៃពុធ​ទី​១៥​ខែមេសា​ឆ្នាំ​២០២៦ លោកប្រធានាធិបតី ដូណាល់ ត្រាំ បានធ្វើ​ឲ្យ​មជ្ឈដ្ឋានអន្តរជាតិមានការភ្ញាក់ផ្អើល ដោយ​អះអាងថា ប្រទេសចិនបានយល់ព្រមមិនបញ្ជូនអាវុធទៅ​ឲ្យ​មិត្តជិតស្និទ្ធរបស់ខ្លួនគឺប្រទេសអ៊ីរ៉ង់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម Washington Post លោក​ត្រាំ បានបញ្ជាក់ថា លោកទទួលបានការសន្យាដោយផ្ទាល់ពីមេដឹកនាំចិន លោក ស៊ី ជីនពីង តាមរយៈការឆ្លើយឆ្លងលិខិតជាមួយគ្នា បន្ទាប់ពីលោកបានឮព័ត៌មានថាមានការលេចធ្លាយអាវុធចិននៅតាមកន្លែងជាច្រើនក្នុងតំបន់សង្គ្រាម។

តាមរយៈការបង្ហោះនៅលើបណ្តាញសង្គម Truth Social លោកត្រាំ បានសរសេរយ៉ាងមានទំនុកចិត្តថា លោក ស៊ី ជីនពីង នឹងទទួលស្វាគមន៍រូបលោកយ៉ាងកក់ក្តៅបំផុត នៅក្នុងកិច្ចប្រជុំកំពូលដែលនឹងត្រូវធ្វើឡើងនៅទីក្រុងប៉េកាំង នាថ្ងៃទី១៤ដល់១៥​ខែឧសភាខាងមុខ។ លោកបានប្រាប់អ្នកសារព័ត៌មានថា កាលពីមុនលោកបានផ្ញើលិខិតទៅកាន់មេដឹកនាំចិនដើម្បីស្នើសុំកុំ​ឲ្យ​មានការលក់អាវុធ​​ឲ្យ​អ៊ីរ៉ង់ ហើយលោកស៊ី ក៏បានឆ្លើយតបមកវិញនូវពាក្យសន្យាដែលលោកចង់បាន។

ដ្បិត​ទំនាក់ទំនងរវាងមហាអំណាចសេដ្ឋកិច្ចទាំងពីរហាក់មានភាពរកាំរកូសខ្លាំង ដោយសារតែជម្លោះនៅមជ្ឈិមបូព៌ាក៏ដោយ ក៏លោកត្រាំ នៅតែបង្ហាញពីភាពស្និទ្ធស្នាល និងយល់ថាការសម្រេចចិត្តរបស់លោកក្នុងការបើកច្រកសមុទ្រ Hormuz ឡើងវិញជាអចិន្ត្រៃយ៍ គឺជាអ្វីដែលចិនចង់បានបំផុត។ លោកបាននិយាយថា ការធ្វើបែបនេះគឺដើម្បីប្រយោជន៍របស់ចិនផង និងសម្រាប់ពិភពលោកទាំងមូលផង ដោយសារតែចិនគឺជាដៃគូពាណិជ្ជកម្មធំបំផុត និងជាអ្នកទិញប្រេងដ៏សំខាន់ពីអ៊ីរ៉ង់៕

ប្រែសម្រួល៖ ឈាង