ព័ត៌មានអន្ដរជាតិ

អ៊ីរ៉ង់ កំពុងកសាងឧបករណ៍យោធាឡើងវិញយ៉ាងឆាប់រហ័ស អំឡុងពេលឈប់បាញ់

បានផុស

២ ខែ មុន

នៅ

ថ្ងៃព្រហស្បតិ៍ ២១ ឧសភា ២០២៦

ដោយ

យោងតាមប្រភពពីរ ដែលដឹងពីការវាយតម្លៃរបស់ចារកម្មអាមេរិក បានលើកឡើងថា អ៊ីរ៉ង់បានចាប់ផ្តើមផលិតដ្រូនមួយចំនួនឡើងវិញ អំឡុងពេលបទឈប់បាញ់រយៈពេល ៦សប្តាហ៍ចាប់ផ្តើមនៅដើមខែមេសា ជាសញ្ញាមួយដែលទីក្រុងតេហេរ៉ង់កំពុងកសាងឧបករណ៍ទាំងនោះយ៉ាងរហ័ស បន្ទាប់ពីមានការបំផ្លាញដោយសហរដ្ឋអាមេរិក-អ៊ីស្រាអែល។

ប្រភពចំនួនបួន បានប្រាប់សារព័ត៌មាន CNN នៅថ្ងៃទី២១ ខែឧសភានេះពីចារកម្មអាមេរិក ដែលបង្ហាញយ៉ាងច្បាស់ថា៖ « យោធាអ៊ីរ៉ង់កំពុងបង្កើតដ្រូនយ៉ាងលឿន ជាងការស្មានទៅទៀត»។

មីស៊ីលរបស់ទីក្រុងតេហេរ៉ង់។ រូបភាព៖ India Times

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពទាំងបួនបន្តថា ការកសាងឡើងវិញនូវសមត្ថភាពយោធា រួមទាំងការជំនួសទីតាំងមីស៊ីល ជើងទម្របាញ់មីស៊ីល និងសមត្ថភាពផលិតសម្រាប់ប្រព័ន្ធអាវុធសំខាន់ៗ អំឡុងពេលជម្លោះបច្ចុប្បន្ន វាមានន័យថាអ៊ីរ៉ង់នៅតែជាការគំរាមកំហែងដ៏សំខាន់មួយ ចំពោះសម្ព័ន្ធមិត្តក្នុងតំបន់ ប្រសិនបើប្រធានាធិបតីសហរដ្ឋអាមេរិក លោក ដូណាល់ ត្រាំ ចាប់ផ្តើមយុទ្ធនាការទម្លាក់គ្រាប់បែកជាថ្មី។

យ៉ាងណាក៏មានការសង្ស័យពីវិសាលភាពនៃការវាយប្រហាររវាងសហរដ្ឋអាមេរិកនិងអ៊ីស្រាអែល បានធ្វើឱ្យសមត្ថភាពយោធាអ៊ីរ៉ង់ចុះខ្សោយក្នុងរយៈពេលវែងផងដែរ។

ប្រភពមួយប្រាប់ CNN ថា៖ « ការប៉ាន់ស្មានស៊ើបការណ៍សម្ងាត់មួយចំនួនរបស់សហរដ្ឋអាមេរិកបង្ហាញថា អ៊ីរ៉ង់អាចស្តារសមត្ថភាពវាយប្រហារដោយដ្រូនរបស់ខ្លួនឡើងវិញយ៉ាងពេញលេញក្នុងរយៈពេល ៦ខែ»។

ប្រភពនោះបន្តថា៖ « ការកសាងសមត្ថភាពយោធារបស់អ៊ីរ៉ង់ឡើងវិញអាចនឹងចំណាយពេលយូរជាងនេះ ប៉ុន្តែការណ៍ពិត សមត្ថភាពអ៊ីរ៉ង់លើសពីការរំពឹងទុកទៅទៀត»។

គួរបញ្ជាក់ថា ការវាយប្រហារដោយដ្រូនគឺជាក្តីបារម្ភដ៏ខ្លាំងសម្រាប់សម្ព័ន្ធមិត្តក្នុងតំបន់ ប្រសិនបើអរិភាពបន្តឡើងវិញ អ៊ីរ៉ង់អាចបង្កើនសមត្ថភាពផលិតមីស៊ីល ជាពិសេសនឹងបាញ់ដ្រូនបន្ថែមទៀតទៅអ៊ីស្រាអែល និងប្រទេសឈូងសមុទ្រដែលស្ថិតនៅក្នុងចម្ងាយនៃប្រព័ន្ធអាវុធរបស់អ៊ីរ៉ង់។

លោក ត្រាំ គំរាមកំហែងម្តងហើយម្តងទៀតថា ខ្លួននឹងបន្តប្រតិបត្តិការប្រឆាំងនឹងអ៊ីរ៉ង់ ប្រសិនបើប្រទេសទាំងពីរមិនអាចឈានដល់កិច្ចព្រមព្រៀងបញ្ចប់សង្គ្រាម រួមទាំងការនិយាយជាសាធារណៈនៅថ្ងៃអង្គារថា លោកនៅសល់មួយម៉ោងទៀត ដើម្បីបាញ់ទម្លាក់គ្រាប់បែកឡើងវិញ វាមានន័យថាសមត្ថភាពយោធាអ៊ីរ៉ង់អាចដំណើរការជាថ្មី៕

សម្រួល៖ ណឺ មិនា