ព័ត៌មានអន្ដរជាតិ

ពលរដ្ឋ Greenland តវ៉ាប្រឆាំងនឹងការបើកកុងស៊ុល និងដេញអាមេរិកចេញពីទឹកដី

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

បេសកជនពិសេសអាមេរិក លោក Jeff Landry (R) លើកឡើងកាលថ្ងៃពុធ ថាដល់ពេលដែលសហរដ្ឋអាមេរិកគួរមានឥទ្ធិពលនៅកោះ Greenland ។ កោះនេះត្រូវការសហរដ្ឋអាមេរិក ហើយប្រធានាធិបតីអាមេរិក លោក ដូណាល់ ត្រាំ ក៏និយាយពីការបង្កើនប្រតិបត្តិការសន្តិសុខជាតិ និងបង្កើតមូលដ្ឋានទ័ពមួយចំនួនទៀតនៅទីនេះឡើងវិញ។ ក្រោយការលើកឡើងនេះ ត្រឹមតែមួយថ្ងៃ ប្រជាជន Greenland រាប់រយនាក់បានចេញតាមដងផ្លូវកាលពីថ្ងៃព្រហស្បតិ៍ ដើម្បីតវ៉ាប្រឆាំងនឹងការបើកកុងស៊ុលសហរដ្ឋអាមេរិកនៅប្រទេសខ្លួន ដោយស្រែកថា «ជនជាតិអាមេរិកត្រូវតែត្រឡប់ទៅផ្ទះវិញ!»។

ប្រជាជន Greenland កំពុងតវ៉ានឹងអាមេរិក។ រូបភាព៖ ABC

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត The Guardian រាយការណ៍កាលពីថ្ងៃទី២១ ខែឧសភា ថា ក្រុមអ្នកតវ៉ាបានគ្រវីទង់ជាតិ Greenland និងកាន់ផ្លាកសញ្ញាសរសេរថា «USA Asu» មានន័យថា «សូមបញ្ឈប់អាមេរិក»។ អ្នកផ្សេងទៀតបានស្រែកថា « Greenland ជារបស់ប្រជាជន Greenland» នៅខាងក្រៅសភា។

លោក Aqqalukkuluk Fontain ជារៀបចំការតវ៉ាប្រឆាំងនឹងស្ថានកុងស៊ុលនិងការមកដល់របស់អភិបាលរដ្ឋ Louisiana សហរដ្ឋអាមេរិក លោក Jeff Landry (R) និងជាបេសកជនពិសេសថា៖ « វាមានសារៈសំខាន់ជាងពេលណាៗទាំងអស់ ដើម្បីបង្ហាញដល់ប្រជាជនអាមេរិកនូវអ្វីដែលយើងនិយាយរួចហើយថា «ទេ! មានន័យថាទេ» ហើយអនាគតនិងការសម្រេចចិត្តរបស់ Greenland ជាកម្មសិទ្ធិរបស់ប្រជាជនយើង»។

លោកបន្ថែមថា៖ « ការតវ៉ាទាំងនេះមិនមែនញុះញង់ លោក ដូណាល់ ត្រាំ ឬ Jeff Landry ទេ ប៉ុន្តែដើម្បីបង្ហាញដល់ពិភពលោកថា Greenland មានលទ្ធិប្រជាធិបតេយ្យផ្ទាល់ខ្លួន។ ការចូលរួមរបស់សហរដ្ឋអាមេរិកជាមួយ Greenland គឺមានគ្រោះថ្នាក់ខ្លាំងណាស់។ ប្រសិនបើ Greenland ដួលរលំ ពិភពលោកនឹងដួលរលំអាចនាំឱ្យមានសង្គ្រាមលោកលើកទី៣»។

លោក Jens-Frederik Nielsen នាយករដ្ឋមន្ត្រី Greenland និងអ្នកនយោបាយដទៃទៀតបានបដិសេធការអញ្ជើញឱ្យចូលរួមពិធីបើកស្ថានកុងស៊ុល។ លោក Nielsen ប្រាប់កាសែតប្រចាំថ្ងៃ Sermitsiaq ថា៖ « យើងមិនទាន់បានធ្វើការសម្រេចចិត្តជាគោលការណ៍នៅឡើយទេ ប៉ុន្តែខ្ញុំនឹងមិនចូលរួមទេ»។

លោក Christian Keldsen នាយកប្រតិបត្តិនៃសមាគមពាណិជ្ជកម្ម ថា លោក Landry មិនបានទទួលការស្វាគមន៍ដូចដែលលោកសង្ឃឹមទុកនោះទេ។

លោក Keldsen ប្រាប់អ្នកសារព័ត៌មានថា៖ « កាលពីបីខែមុន កោះ Greenland ស្ថិតនៅក្រោមការគំរាមកំហែងនៃការឈ្លានពាននិងការដណ្តើមយក ហើយគាត់ [Landry] គឺជាមនុស្សម្នាក់ក្នុងចំណោមមនុស្សដែលគាំទ្រទង្វើនោះ ។ បីខែក្រោយមក អ្នកបង្ហាញខ្លួននៅទីនេះ ដោយចង់បង្កើតមិត្តភក្តិ ចែកសូកូឡាដល់កុមារ និងព្យាយាមចែកមួក MAGA»៕

សម្រួល៖ ណឺ មិនា