អ៊ីរ៉ង់៖ បើ​អត់​បញ្ចេញ​លុយដែល​បង្កក ២៤ពាន់លានដុល្លារ​ ខ្លួន​មិនចុះកិច្ច​ព្រមព្រៀង​ទេ

កិច្ចចរចាសន្តិភាព ដើម្បីបញ្ចប់សង្គ្រាមរវាងសហរដ្ឋអាមេរិក និងអ៊ីរ៉ង់ កំពុងតែជួបឧបសគ្គធំមួយ បន្ទាប់ពីភាគីខាងអ៊ីរ៉ង់ បានដាក់ឱសានវាទយ៉ាងម៉ឺងម៉ាត់ថា ខ្លួននឹងមិនចុះហត្ថលេខាលើកិច្ចព្រមព្រៀងសន្តិភាពណាមួយឡើយ លុះត្រាតែទីក្រុងវ៉ាស៊ីនតោន ព្រម​​បញ្ចេញ​ទ្រព្យសម្បត្តិដែលត្រូវបានបង្កកទុក ដែលមានតម្លៃរហូតដល់ ២៤ពាន់លានដុល្លារ។

ចុះផ្សាយ​ថ្ងៃទី​២៧ ខែ​ឧសភា ឆ្នាំ​២០២៦ សារព័ត៌មាន The Telegraph បាន​​​ឱ្យដឹង​ថា លក្ខខណ្ឌដាច់ខាតនេះ ត្រូវបានប្រកាសឡើងដោយប្រធានអ្នកចរចារបស់អ៊ីរ៉ង់ លោក Mohammad Bagher Ghalibaf និងរដ្ឋមន្ត្រីការបរទេសអ៊ីរ៉ង់ លោក Abbas Araghchi នៅក្នុងជំនួបការទូតមួយជាមួយមន្ត្រីប្រទេសកាតា នៅក្នុងទីក្រុងដូហា។ ភាគីអ៊ីរ៉ង់ បានសង្កត់ធ្ងន់ថា ទឹកប្រាក់ពាក់កណ្តាល ពោលគឺ ១២ពាន់លានដុល្លារ ត្រូវតែផ្ទេរមកឱ្យពួកគេភ្លាមៗ នៅពេលប្រកាសអនុស្សរណៈនៃការយោគយល់គ្នា ហើយទឹកប្រាក់ដែលនៅសល់ ត្រូវតែ​បញ្ចេញ​ឱ្យអស់ក្នុងរយៈពេល ៦០ថ្ងៃបន្ទាប់។

មន្ត្រីអ៊ីរ៉ង់ម្នាក់ ដែលជិតដិតនឹងកិច្ចចរចានេះ បានលើកឡើងចំៗថា អ៊ីរ៉ង់ត្រូវការលុយរបស់ខ្លួនមកវិញនៅពេលនេះភ្លាម មិនមែនរង់ចាំទៅថ្ងៃអនាគតនោះទេ ហើយកិច្ចចរចា នឹងមិនអាចទៅមុខរួចដាច់ខាត បើគ្មានការផ្ទេរប្រាក់ទាំងនេះចូលក្នុងគណនីរបស់អ៊ីរ៉ង់។ ទឹកប្រាក់រាប់ពាន់លានដុល្លារទាំងនេះ ភាគច្រើនជាចំណូលបានមកពីការលក់ប្រេង និងហ្គាស ដែលត្រូវបានរក្សាទុកនៅក្នុងធនាគារបរទេសជាច្រើនឆ្នាំមកហើយ ដោយសារតែទណ្ឌកម្មសេដ្ឋកិច្ចរបស់អាមេរិក។ បើតាមប្រភពព័ត៌មាន ទ្រព្យសម្បត្តិសរុបរបស់អ៊ីរ៉ង់ ដែលត្រូវបានបង្កកនៅតាមបណ្តាប្រទេសនានា ដូចជា កូរ៉េខាងត្បូង កាតា អ៊ីរ៉ាក់ ជប៉ុន និងអាល្លឺម៉ង់ មានតម្លៃរហូតដល់ទៅជាង ១០០ពាន់លានដុល្លារឯណោះ ប៉ុន្តែអ៊ីរ៉ង់មិនអាចដកយកមកស្រុកវិញបាន ដោយសារតែច្បាប់រឹតបន្តឹងប្រព័ន្ធធនាគារអន្តរជាតិរបស់ក្រសួងហិរញ្ញវត្ថុអាមេរិក។

ការទាមទារដ៏រឹងរូសរបស់អ៊ីរ៉ង់នេះ បានធ្វើឱ្យលោកប្រធានាធិបតី ដូណាល់ ត្រាំ ធ្លាក់ក្នុងស្ថានភាពដ៏ពិបាកមួយ ព្រោះក្រុមអ្នកគាំទ្រ និងសម្ព័ន្ធមិត្តរបស់លោក បានព្រមានថា បើលោកព្រមតាមអ៊ីរ៉ង់ វាប្រៀបដូចជាការយកលុយទៅ​ផ្ដល់​រង្វាន់ដល់របបដឹកនាំទីក្រុងតេហេរ៉ង់ និងជាការចំណាយលុយ ដើម្បីបញ្ចប់សង្គ្រាមដែលលោកជាអ្នកចាប់ផ្តើមខ្លួនឯងអ៊ីចឹង។ ក្រុមអ្នកនយោបាយអាមេរិក យល់ថា លក្ខខណ្ឌនេះ មិនអាចទទួលយកបានឡើយ ព្រោះអ៊ីរ៉ង់ទើបតែបានគំរាមកំហែងពិភពលោក តាមរយៈការបិទច្រកសមុទ្រ Hormuz ដែលស្ទើរតែធ្វើឱ្យសេដ្ឋកិច្ចសកលធ្លាក់ចូលក្នុងវិបត្តិសេដ្ឋកិច្ចទៅហើយ។ ម្យ៉ាងវិញទៀត ដើម្បីបញ្ចេញ​លុយទាំងនេះ អាមេរិកត្រូវលើកលែងទណ្ឌកម្ម និងបង្កើតប្រព័ន្ធគ្រប់គ្រងដ៏ស្មុគស្មាញមួយ ដើម្បីធានាថា អ៊ីរ៉ង់មិនយកលុយទាំងនោះទៅពង្រីកកម្មវិធីនុយក្លេអ៊ែរ ឬឧបត្ថម្ភដល់ក្រុមប្រដាប់អាវុធណាមួយឡើយ។

ទោះបីជាមានភាពតានតឹងបែបនេះក្តី អតីតទីប្រឹក្សាសន្តិសុខជាតិអាមេរិក លោក John Bolton បានបង្ហើបថា លោក ដូណាល់ ត្រាំ ហាក់ដូចជាកំពុងមានការប្រញាប់ប្រញាល់យ៉ាងខ្លាំង ក្នុងការចង់បញ្ចប់ជម្លោះមួយនេះ ដែលវាអាចបញ្ជាក់ថា លោកអាចនឹងព្រមធ្វើតាម​ការ​ទាមទារ ឬធ្វើសម្បទានខ្លះលើសពីអ្វី ដែលលោកធ្លាប់​ប្រកាសជាសាធារណៈ។ ចំណែកឯរដ្ឋមន្ត្រីការបរទេសអាមេរិក លោក Marco Rubio ក៏បានបង្ហាញក្តីសង្ឃឹមថា កិច្ចព្រមព្រៀងនេះ អាចនឹងដោះស្រាយចេញ ក្នុងរង្វង់ពីរទៅបីថ្ងៃខាងមុខ៕

ប្រែសម្រួល៖ ឈាង