ទីបំផុត ក្រុមហ៊ុន Sinopharm បញ្ចេញរបាយការណ៍អំពីប្រសិទ្ធភាពវ៉ាក់សាំង ដល់ពិភពលោក

ក្រុមហ៊ុនផលិតវ៉ាក់សាំងចិន Sinopharm បាននិយាយកាលពីថ្ងៃពុធថា ពួកគេបានបញ្ចេញ របាយការណ៍ដំបូងដល់ពិភពលោក នៃការសាកល្បងដំណាក់កាលទី៣ លើវ៉ាក់សាំងការពារជំងឺកូវីដ-១៩។

របាយការណ៍បានបង្ហាញថា វ៉ាក់សាំងចំនួនពីរ ដែលត្រូវបានអភិវឌ្ឍដោយវិទ្យាស្ថានអ៊ូហាននិង ប៉េកាំង បានបង្ហាញពីប្រសិទ្ធភាពការពារការឆ្លងកូវីដ ៧២,៨ភាគរយនិង ៧៨,១ភាគរយ រៀងៗខ្លួន។

របាយការណ៍នេះ ត្រូវបានចុះផ្សាយដោយទស្សនាវដ្តីសមាគមវេជ្ជសាស្ត្រអាមេរិក កាលពីថ្ងៃពុធនិងបង្ហាញលទ្ធផលពីការវិភាគបឋម នៃការសាកល្បងដំណាក់កាលទី៣របស់វ៉ាក់សាំង ដែលបានចាប់ផ្តើមកាលពីថ្ងៃទី១៦ខែកក្កដាឆ្នាំ២០២០។

អ្នកចូលរួមចំនួន៤០,៣៨២នាក់ បានទទួលការចាក់វ៉ាក់សាំងមួយដូស នៃវ៉ាក់សាំងដែលត្រូវចាក់២ដូសមួយនេះ។

របាយការណ៍បានឲ្យដឹងថា ក្នុងអំឡុងពេលការតាមដានជាមធ្យម៧៧ថ្ងៃ មានការចេញរោគសញ្ញាជំងឺកូវីដ-១៩ចំនួន ២៦ករណីត្រូវបានរកឃើញនៅក្នុងក្រុមវ៉ាក់សាំងរបស់វិទ្យាស្ថានអ៊ូហាន និង២១ករណីនៅក្នុងក្រុមវ៉ាក់សាំងរបស់វិទ្យាស្ថានប៉េកាំង ដែលនេះជាលទ្ធផលប្រសិទ្ធភាព៧២,៨ភាគរយសម្រាប់ក្រុមអ៊ូហាននិង ៧៨,១ភាគរយសម្រាប់ក្រុម ប៉េកាំង។

ករណីធ្ងន់ធ្ងរនៃជំងឺកូវីដ-១៩ មិនត្រូវបានគេរកឃើញទេក្នុងក្រុមវ៉ាក់សាំងទាំងពីរ។

គួររម្លឹកថា វ៉ាក់សាំង Sinopharm ដែលត្រូវបានបង្កើតឡើងដោយវិទ្យាស្ថានប៉េកាំង បានទទួលការអនុម័តដោយអង្គការសុខភាពពិភពលោក សម្រាប់ការប្រើប្រាស់ជាបន្ទាន់។ វ៉ាក់សាំងនេះ ត្រូវបានអនុម័តសម្រាប់ការប្រើប្រាស់ជាបន្ទាន់ដោយប្រទេស តំបន់និងអង្គការជាង ៧០ហើយ៕

ប្រែសម្រួល៖ Vann Vann

ប្រភព៖ Global Time

ចុចអាន៖ មកដឹងបទពិសោធន៍ការងារនិងប្រាក់ចំណូលរបស់មេធំក្រុមហ៊ុនផលិតវ៉ាក់សាំង Sinopharm