ឥណ្ឌាផ្ទុះជំងឺកាចសាហាវមួយទៀត បំផ្លាញសរីរាង្គកុមារ ដែលឆ្លងនិង ជាសះស្បើយពីកូវីដ

ប្រទេសឥណ្ឌា កំពុងប្រយុទ្ធជាមួយនឹងការកើនឡើងនៃករណីជំងឺរលាកដ៏សាហាវមួយ ដែលវាយប្រហារកុមារឆ្លងជំងឺកូវីដ-១៩។

រោគសញ្ញារលាកពហុប្រព័ន្ធកុមារ (MIS-C) បានប៉ះពាល់ដល់កុមារដែលជាសះស្បើយពីជំងឺកូវីដ-១៩ ឬកុមារដែលឆ្លងកូវីដ ពី២ទៅ៦សប្តាហ៍។

ភាគច្រើន MIS-C បានប៉ះពាល់ដល់កុមារដែលមានអាយុពី ៥ទៅ១៥ឆ្នាំ។

មានករណីជាង ២,០០០ករណី ត្រូវបានរាយការណ៍នៅទូទាំងប្រទេស ដោយក្នុងនោះ មាន២០០ករណីទៅហើយ នៅក្នុងទីក្រុង ដែលី តែមួយ។

ជំងឺនេះបង្ហាញអាការដំបូងដូចជាគ្រុនក្តៅខ្លាំង ហើយឈានទៅដល់ការរលាកសរីរាង្គ។

ប្រហែល៧០ភាគរយនៃកុមារដែលរងផលប៉ះពាល់ ត្រូវការការសង្គ្រោះបន្ទាន់។

វេជ្ជបណ្ឌិត Harish Pemde នាយកផ្នែកពេទ្យកុមារនៅមហាវិទ្យាល័យវេជ្ជសាស្ត្រ Lady Hardinge ក្នុងទីក្រុងដែលី បានប្រាប់កាសែត The Times ថា “លើសពីនេះ វាអាចបណ្តាលឲ្យមានជំងឺខ្សោយបេះដូង បញ្ហាផ្លូវដង្ហើមឬខូចតម្រងនោម។ ជីវិតរបស់កុមារក្រោយជាពីជំងឺនេះ គឺអាស្រ័យទៅលើ ថាតើកុមារខូចសរីរាង្គខ្លាំងកម្រិតណា”។

វាចាំបាច់ណាស់ក្នុងការតាមដានជំងឺនេះឲ្យបានទាន់ពេលវេលា ដើម្បីងាយស្រួលព្យាបាល។

ដើមឡើយ MIS-C ត្រូវបានគេគិតថាមានទំនាក់ទំនងជាមួយជំងឺ Kawasaki ដែលជាជំងឺបណ្តាលឲ្យមានការរលាកសរសៃឈាម ហើយប៉ះពាល់ភាគច្រើនលើកុមារអាយុក្រោម ៥ ឆ្នាំ។

ករណីជាច្រើន ត្រូវបានគេរាយការណ៍ជាលើកដំបូងនៅក្នុងចក្រភពអង់គ្លេស អ៊ីតាលីនិងអេស្ប៉ាញកាលពីខែមេសាឆ្នាំ២០២០ ហើយបានចាប់ផ្តើមរីករាលដាលនៅសហរដ្ឋអាមេរិក ក្នុងខែឧសភា៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រុងប្រយ័ត្ន! វីរុសបំប្លែងខ្លួនឥណ្ឌា ដែលកម្ពុជារកឃើញ ឆ្លងសាហាវជាងវីរុសអង់គ្លេស ដល់ទៅ ៤០ភាគរយ