វៀតណាម ស្ថិតក្នុងចំណោមប្រទេសទាំង៩២ ដែលសហរដ្ឋអាមេរិក នឹងផ្តល់ វ៉ាក់សាំង Pfizer–BioNTech ឲ្យ

ស្ថានទូតសហរដ្ឋអាមេរិកនៅទីក្រុងហាណូយបាននិយាយកាលពីថ្ងៃសុក្រថា ប្រទេសវៀតណាមស្ថិតក្នុងចំណោមប្រទេសទាំង ៩២ ដែលសហរដ្ឋអាមេរិកនឹងបរិច្ចាគវ៉ាក់សាំង Pfizer – BioNTech ឲ្យ នៅត្រឹមខែមិថុនាឆ្នាំក្រោយ។

ស្ថានទូតបាននិយាយនៅក្នុង Facebook ថា “លោកប្រធានាធិបតី Biden ទើបតែបានប្រកាសថា សហរដ្ឋអាមេរិកនឹងបរិច្ចាគវ៉ាក់សាំង Pfizer-BioNTech ចំនួនកន្លះពាន់លានដូស ដល់ប្រទេសចំនួន ៩២ លើពិភពលោករួមទាំង វៀតណាមផងដែរ។

“ដរាបណាវីរុសនេះ មាននៅកន្លែងណាមួយលើពិភពលោក យើងទាំងអស់សុទ្ធតែមានហានិភ័យ។ យើងត្រូវតែកម្ចាត់វានៅគ្រប់តំបន់នៃពិភពលោក។ យើងរឹងមាំជាមួយគ្នា ហើយយើងនឹងយកឈ្នះលើជំងឺរាតត្បាតនេះ”។

ទោះបីជាយ៉ាងណាក៏ដោយ ស្ថានទូតមិនបានផ្តល់ចំនួនជាក់លាក់នៃ វ៉ាក់សាំងដែលផ្តល់ឲ្យប្រទេសវៀតណាមនោះទេ។

គួរបញ្ជាក់ថា សហរដ្ឋអាមេរិក នឹងចែកចាយវ៉ាក់សាំងកូវីដ Pfizer – BioNTech ចំនួន ៥០០ លានដូស ដល់ប្រទេសដែលមានចំណូលមធ្យមនិងទាបចំនួន៩២ ដែលត្រូវបានកំណត់ដោយការប្តេជ្ញាចិត្តរបស់កម្មវិធី COVAX និងទៅឲ្យសហភាពអាហ្រ្វិកនៅត្រឹមខែមិថុនាឆ្នាំក្រោយ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ក្រុមហ៊ុនយក្សលំដាប់ពិភពលោកចំនួន២ ចូលរួមវិភាគទានជួយ វៀតណាម ទិញវ៉ាក់សាំងកូវីដ