លោក Duterte គំរាម ដាក់គុកអ្នកមិនព្រមចាក់វ៉ាក់សាំង កូវីដ

លោកប្រធានាធិបតី Rodrigo Duterte បានគំរាមថា នឹងដាក់គុកអ្នកមិនព្រមចាក់វ៉ាក់សាំងកូវីដ ស្របពេលប្រទេសហ្វីលីពីនកំពុងប្រយុទ្ធជាមួយនឹងការផ្ទុះឡើងដ៏អាក្រក់បំផុតមួយក្នុងតំបន់អាស៊ី។

គិតត្រឹមពេលនេះ ប្រទេសហ្វីលីពីន បានកត់ត្រាករណីឆ្លងជំងឺកូវីដ-១៩ជាង ១.៣លានករណីនិង ស្លាប់ជាង ២៣,០០០ នាក់។

លោក Duterte បាននិយាយនៅក្នុងសុន្ទរកថាតាមទូរទស្សន៍មួយកាលពីថ្ងៃចន្ទទី ២១ ខែមិថុនាថា “អ្នកជ្រើសរើសទៅ រវាងវ៉ាក់សាំងឬឲ្យខ្ញុំដាក់គុក”។

លោកបាននិយាយបែបនេះ​ បន្ទាប់ពីមានរបាយការណ៍អំពីចំនួនអ្នកចេញទៅចាក់វ៉ាក់សាំងទាប ក្នុងរដ្ឋធានីម៉ានីល។

សុន្ទរកថារបស់លោក Duterte គឺផ្ទុយពីការលើកឡើងរបស់មន្រ្តីសុខាភិបាលហ្វីលីពីន ដែលនិយាយថា ទោះប្រជាជនត្រូវបានគេជំរុញឲ្យទទួលវ៉ាក់សាំងការពារជំងឺកូវីដក៏ដោយ តែវាជាការស្ម័គ្រចិត្ត។

លោក Duterte និយាយថា “កុំធ្វើឲ្យខ្ញុំខុសឲ្យសោះ។ មានវិបត្តិនៅក្នុងប្រទេសនេះ។ ខ្ញុំគ្រាន់តែខឹងជនជាតិហ្វីលីពីនដែលមិនយកចិត្តទុកដាក់លើរដ្ឋាភិបាលប៉ុណ្ណោះ”។

គួរបញ្ជាក់ថា គិតត្រឹមថ្ងៃទី ២០ ខែមិថុនា ហ្វីលីពីនបានចាក់វ៉ាក់សាំងគ្រប់ដូសដល់ប្រជាជនចំនួន ២.១ លាននាក់។ នេះបង្ហាញពីកម្មវិធីចាក់វ៉ាក់សាំងយឺតយ៉ាវ ខណៈរដ្ឋាភិបាលមានគោលដៅចាក់ដល់ប្រជាជនរហូតដល់ទៅ៧០លាននាក់ ក្នុងចំណោមប្រជាជន១១០លាននាក់របស់ខ្លួននៅឆ្នាំនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក Duterte ដាក់ឈ្មោះស្តេចប្រដាល់ Pacquiao ក្នុងបញ្ជី អ្នកស្នងតំណែងប្រធានាធិបតី