ព័ត៌មានអន្ដរជាតិ

មេធាវីលោក Duterte និយាយថា អតីតប្រធានាធិបតីហ្វីលីពីន ចុះខ្សោយការចងចាំធ្ងន់ធ្ងរ

បានផុស

១០ ខែ មុន

នៅ

ថ្ងៃសុក្រ ១២ កញ្ញា ២០២៥

ដោយ

Chheang

មេធាវីរបស់អតីតប្រធានាធិបតីហ្វីលីពីន Rodrigo Duterte បានប្រាប់តុលាការឧក្រិដ្ឋកម្មអន្តរជាតិ (ICC) ថា បុរសវ័យ៨០ឆ្នាំរូបនេះ ទទួលរងនូវបញ្ហាចុះខ្សោយការយល់ដឹងយ៉ាងធ្ងន់ធ្ងរ ប៉ះពាល់ដល់ការចងចាំ ស្មារតី និងមុខងារប្រចាំថ្ងៃរបស់គាត់។ នេះបើយោងតាមឯកសាររបស់តុលាការដែលចេញផ្សាយកាលពីថ្ងៃព្រហស្បតិ៍ទី១១ខែកញ្ញាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Duterte ត្រូវបានចាប់ខ្លួនកាលពីខែមីនាតាមដីការបស់ ICC ដែលភ្ជាប់គាត់ទៅនឹងការសម្លាប់មនុស្សរាប់ពាន់នាក់ក្នុងអំឡុងពេល«សង្គ្រាមប្រឆាំងគ្រឿងញៀន» ដ៏បង្ហូរឈាម។ ចាប់តាំងពីពេលនោះមក ក្រុមមេធាវីការពារក្តីរបស់គាត់ បានប្រកែកថា គាត់មិនសមក្នុងការចូលរួមសវនាការទេ ដោយអះអាងថា គាត់កំពុងមានស្ថានភាពសុខភាពមិនល្អពាក់ព័ន្ធនឹងការគិត និងស្មារតី។

ដំបូងឡើយ តុលាការ ICC គ្រោងនឹងបើកសវនាការនៅថ្ងៃទី២៣ខែកញ្ញា ដើម្បីបញ្ជាក់ពីការចោទប្រកាន់ ប៉ុន្តែចៅក្រមបានពន្យារពេលនីតិវិធី ដើម្បីសម្រេចជាមុនថាតើលោក Duterte មានសតិសម្បជញ្ញៈសមនឹងចូលរួមការកាត់ក្តីដែរឬអត់។ វានៅមិនទាន់ច្បាស់ទេថានៅពេលណាដែលតុលាការនឹងសម្រេចលើរឿងនេះ។ វាជាករណីកម្រណាស់ដែលតុលាការអន្តរជាតិលើកឡើងថា ជនសង្ស័យមិនស័ក្តិសមសម្រាប់ការកាត់ក្តី ព្រោះតែជរាភាព ឬបញ្ហាសុខភាព។ កន្លងមក តុលាការ ICC មិនដែលធ្លាប់ចាត់ទុកជនសង្ស័យណាម្នាក់ទេថាមិនស័ក្តិសមសម្រាប់ការកាត់ក្តី បើទោះបីជាមានញត្តិជាច្រើនលើកច្រើនសាពីចុងចោទក៏ដោយ។

សូមជម្រាបថា លោក Duterte ដែលធ្លាប់ធ្វើជាប្រធានាធិបតីហ្វីលីពីនពីឆ្នាំ២០១៦ ដល់ឆ្នាំ២០២២ បានចាប់ផ្តើមយុទ្ធនាការប្រឆាំងគ្រឿងញៀន ដែលក្រុមសិទ្ធិមនុស្សនិយាយថា ស្មើនឹងការសម្លាប់ក្រៅប្រព័ន្ធតុលាការ និងឧក្រិដ្ឋកម្មប្រឆាំងមនុស្សជាតិ។ ICC បានបើកការស៊ើបអង្កេតជាផ្លូវការលើយុទ្ធនាការរបស់លោក Duterte នៅក្នុងឆ្នាំ២០២១៕

ដោយ៖ ឈាង

ចុចអាន៖ ICC ពន្យារពេលសវនាការលោក Duterte ព្រោះបញ្ហាសុខភាព