ព័ត៌មានអន្ដរជាតិ

UN អំពាវនាវឲ្យយោធាមីយ៉ាន់ម៉ាដោះលែងលោកស្រី ស៊ូជី ជាបន្ទាន់

បានផុស

៥ years មុន

នៅ

ថ្ងៃសុក្រ ២ កក្កដា ២០២១

ដោយ

អគ្គលេខាធិការអង្គការសហប្រជាជាតិ (UN) លោក Antonio Guterres នៅថ្ងៃព្រហស្បតិ៍ម្សិលមិញបានជំរុញឲ្យយោធាមីយ៉ាន់ម៉ាដោះលែងម្ចាស់មេដាយណូបែលលោកស្រី អ៊ុងសាន ស៊ូជី និងលោកប្រធានាធិបតី Win Myint ជាបន្ទាន់។ នេះបើយោងតាមអ្នកនាំពាក្យ UN បានឲ្យដឹង មួយថ្ងៃបន្ទាប់ពីអ្នកតវ៉ារាប់ពាន់នាក់ត្រូវបានដោះលែង។

ប្រទេសមីយ៉ាន់ម៉ាបានធ្លាក់ក្នុងភាពវឹកវរយ៉ាងខ្លាំង ចាប់តាំងយោធាបានក្តោបក្តាបយកអំណាចតាមរយៈរដ្ឋប្រហារថ្ងៃទី១កុម្ភៈ និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី។

លោក Eri Kaneko សហអ្នកនាំពាក្យរបស់លោកអគ្គលេខាធិការ Guterres បានលើកឡើងថា ៖«យើងធ្វើការអំពាវនាវម្តងទៀតគឺត្រូវដោះលែងជាបន្ទាន់អ្នកដែលជាប់ឃុំទាំងអស់ ក្នុងនោះមានលោកប្រធានាធិបតី Win Myint និងទីប្រឹក្សារដ្ឋលោកស្រី អ៊ុងសាន ស៊ូជី»។

កាលពីថ្ងៃពុធកន្លងទៅ រដ្ឋាភិបាលយោធាមីយ៉ាន់ម៉ាបានដោះអ្នកតវ៉ាដែលជាប់ឃុំជាង២០០០នាក់ ក្នុងនោះមានទាំងអ្នកសារព័ត៌មាន និងអ្នកផ្សេងទៀតដែលយោធាកំពុងកាន់អំណាចនិយាយថា ពួកគេត្រូវបានចាប់ខ្លួនដោយសារញុះញង់ឲ្យកើតមានការតវ៉ា។

អ្នកប្រឆាំងរបស់យោធាជាច្រើននៅជាប់ឃុំឃាំងនៅឡើយ អ្នកខ្លះត្រូវបានកាត់ទោសស្ថិតក្រិមច្បាប់ព្រហ្មទណ្ឌដោយចោទពីការអត្ថាធិប្បាយបង្កឲ្យកើតមានភ័យខ្លាច ឬផ្សព្វផ្សាយព័ត៌មានក្លែងក្លាយ។

លោកស្រី អ៊ុងសាន ស៊ូជី ត្រូវបានឡើងតុលាការពាក់ព័ន្ធនឹងបទចោទប្រកាន់ស្រដៀងគ្នានេះដែរ និងបន្តជាប់ឃុំនៅឡើយ។