ក្រុមហ៊ុន Pfizer៖ ការចាក់វ៉ាក់សាំងបន្ថែមដូស បង្កើនអង់ទីគ័រខ្ពស់ជាងការចាក់ទាំង២ដូសដំបូង ពី៥ទៅ ១០ដងឯណោះ

ក្រុមហ៊ុន Pfizer និង BioNTech បានបញ្ចេញទិន្នន័យដំបូងពីការសិក្សា លើការចាក់វ៉ាក់សាំងកូវីដបន្ថែមដូស ដោយនិយាយថា ការចាក់ដូសទី៣ ក្រោយចាក់ដូសទី២ បានប្រហែល ៦ ខែ បាន បង្កើនអង់ទីគ័រខ្ពស់ជាងការចាក់ទាំង២ដូសដំបូង ពី៥ទៅ ១០ដងឯណោះ។

ក្រុមហ៊ុនទាំង២ បាននិយាយថា ពួកគេរំពឹងថា នឹងផ្សព្វផ្សាយទិន្នន័យដែលមានខ្លឹមសារបន្ថែមទៀត ក្នុងពេលឆាប់ៗ ហើយនឹងបញ្ជូនទៅ រដ្ឋបាលចំណីអាហារនិងឱសថ ក្នុងរយៈពេលប៉ុន្មានសប្តាហ៍ខាងមុខនេះ។

Pfizer និយាយថា ភស្ដុតាងជាក់ស្តែងពីប្រទេសអ៊ីស្រាអែលបានបង្ហាញពីការថយចុះ នូវប្រសិទ្ធភាព ប្រហែល៦ខែបន្ទាប់ពីប្រជាជនបានចាក់វ៉ាក់សាំងគ្រប់២ដូស។

ក្រុមហ៊ុន Pfizer បាននិយាយនៅក្នុងសេចក្តីថ្លែងការណ៍មួយថា “ខណៈពេលដែលការការពារប្រឆាំងនឹងជំងឺធ្ងន់ធ្ងរ នៅតែមានកម្រិតខ្ពស់ក្នុងរយៈពេល៦ខែពេញនោះ, ការថយចុះប្រសិទ្ធភាពក្នុងការប្រឆាំងនឹងរោគសញ្ញា និងការបន្តកើតមាននៃវីរុសបំប្លែងខ្លួន គឺជាកត្តាសំខាន់ដែលជំរុញឲ្យយើងជឿថា ការចាក់បន្ថែមដូសទី៣ គឺចាំបាច់ណាស់ដើម្បីរក្សាកម្រិតការពារខ្ពស់បំផុត”។

លើសពីនេះទៀត ក្រុមហ៊ុនកំពុងធ្វើការលើគម្រោង ក្នុងការសាកល្បងវ៉ាក់សាំងថ្មីមួយ ដែលបង្កើតឡើងដើម្បីការពារប្រឆាំងវីរុសបំប្លែងខ្លួន Delta ដោយគ្រោងនឹងចាប់ផ្តើមការធ្វើតេស្តគ្លីនិកនៅខែសីហា៕

ប្រែសម្រួល៖ Vann Vann

ប្រភព៖ ABC News

ចុចអាន៖ ធ្ងន់ធ្ងរហើយ! វីរុសកូវីដបំប្លែងខ្លួនថ្មី “Delta Plus” វាយលុកដល់ប្រទេសជោគជ័យចាក់វ៉ាក់សាំង