មិនទាន់ស្ងប់ ព្យុះ ទីហ្វុងផង ចិន ជួបព្យុះខ្សាច់មួយទៀតមានកម្ពស់រហូតដល់ ៧៩១ ម៉ែត្រ (មានវីដេអូ)

ទីក្រុង Tunhuang នៃខេត្ត Gansu នៅភាគពាយយ័ព្យប្រទេសចិន បានប្រឈមនឹងព្យុះខ្សាច់ដ៏ធំមួយកាលពីថ្ងៃចន្ទ បណ្ដាលឲ្យមេឃមានសភាពខ្មៅងងឹត ។

សេចក្ដីរាយការណ៍បាននិយាយថា ការជូនដំណឹងអំពីព្យុះខ្សាច់ពណ៌លឿងនេះ ត្រូវបានចេញផ្សាយនៅម៉ោង ៣ និង ៤ នាទីរសៀល ខណៈព្យុះខ្សាច់នេះមានកម្ពស់រហូតដល់ទៅ ៧៩១ ម៉ែត្រ ។

គួរបញ្ជាក់ថា ប្រទេសចិនមានប្រព័ន្ធប្រកាសអាសន្នអាកាសធាតុ សម្រាប់ព្យុះខ្សាច់ចែកចេញជា ៤ កម្រិត ដោយពណ៌ក្រហម ស្ថិតនៅកម្រិតខ្ពស់បំផុត ខណៈកម្រិតទី ២ មានពណ៌ទឹកក្រូច លឿង និងខៀវ ។

ទន្ទឹមនោះ ប្រទេសចិន ក៏កំពុងជួបព្យុះទីហ្វុង In-Fa ដែលបណ្ដាលឲ្យមានការបាក់ដីជាលើកទី ២ នៅម៉ោងប្រមាណ ៩ និង ៥០ នាទីព្រឹកថ្ងៃចន្ទនេះ នៅតំបន់មាត់សមុទ្រនៃទីក្រុង Pinghu City ខេត្ត Zhejiang ភាគខាងកើត ។

ព្យុះនេះ ក៏បានវាយប្រហារនៅភាគកណ្តាលនៃប្រទេសចិនផងដែរ ដែលនៅតែរងគ្រោះដោយទឹកជំនន់ ដោយបានសម្លាប់មនុស្សយ៉ាងហោចណាស់ ៦៣ នាក់ ផ្តាច់ចរន្តអគ្គិសនី និងបង្ខំឲ្យមានការផ្លាស់ប្តូរទីលំនៅរបស់ប្រជាជនជាង ១ លាននាក់ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sanook

ចុចអាន ៖ ព្យុះទីហ្វុង In-Fa កំពុងបណ្ដាលឲ្យបាក់ដីជាលើកទី ២ នៅ ចិន