ឪពុកម្តាយយកខ្លួនពាំងគ្រាប់កាំភ្លើង នៅពេលក្រុមតាលីបង់ បាញ់ប្រហារ

ឪពុកម្តាយអាហ្វហ្គានីស្ថាន បានយកខ្លួនពាំង ធ្វើជាខែលការពារកូនៗរបស់ពួកគេ នៅពេលក្រុមអ្នកប្រយុទ្ធតាលីបង់ បើកការបាញ់ប្រហារខណៈមានភាពចលាចលនៅខាងក្រៅព្រលានយន្តហោះទីក្រុង កាប៊ុល។

ក្រុមគ្រួសារដែលអស់សង្ឃឹម ត្រូវបានគេមើលឃើញ ព្យាយាមហុចកូនៗរបស់ពួកគេ ទៅឲ្យទាហានអាមេរិកនៅឯព្រលានយន្តហោះ ដោយសារតែភាពភ័យខ្លាចរស់នៅក្រោមការដឹកនាំ របស់ក្រុមតាលីបង់។

ក្រុមតាលីបង់ត្រូវបានគេថតជាប់ ខណៈព្យាយាមបំបែកហ្វូងមនុស្ស ដោយដំបូង បានបាញ់ឡើងទៅលើមេឃដើម្បីជាការព្រមាន តែក្រោយមក បានបាញ់សំដៅទៅមនុស្សតែម្តង។

ឥឡូវនេះ ក្រុមតាលីបង់បានគ្រប់គ្រងផ្លូវចូលទៅអាកាសយានដ្ឋានទីក្រុងកាប៊ុល ជាហេតុធ្វើឲ្យប្រជាជនពិបាកក្នុងការចាកចេញពីប្រទេស។

ពួកគេត្រូវបានគេរាយការណ៍ថា មិនអនុញ្ញាតឲ្យមនុស្សខ្លះឆ្លងកាត់ទេ ហើយអ្នកផ្សេងទៀតកំពុងព្រួយបារម្ភថា ពួកគេនឹងត្រូវក្រុមតាលីបង់ ចាត់ទុកជាសត្រូវ។

នៅក្នុងភាពច្របូកច្របល់ មានគ្រួសារជាច្រើនស្ថិតក្នុងចំណោមហ្វូងមនុស្ស នៅពេលក្រុមតាលីបង់ ចាប់ផ្តើមបាញ់ប្រហារ។

នៅក្នុងវីដេអូមួយ ស្ត្រីម្នាក់ អាចត្រូវបានគេមើលឃើញ ព្យាយាមការពារកូនរបស់នាង ខណៈវីដេអូមួយទៀតបង្ហាញពីមនុស្សឱនក្បាលចុះ ហើយគ្រាប់កាំភ្លើងហោះលើក្បាលរបស់ពួកគេ។

ចំពេលលាន់ស្នូរផ្ទុះគ្រាប់កាំភ្លើង សំឡេងមួយក៏អាចត្រូវបានគេឮក្នុងមេក្រូផងដែរ ដែលប្រាប់មនុស្សឲ្យចាកចេញពីតំបន់នោះ៕

ប្រែសម្រួល៖ Vann Vann

ប្រភព៖ Mirror

ចុចអាន៖ ក្រុមតាលីបង់ ដុតសួនកម្សាន្តមួយចោល បន្ទាប់ពីចូលលេងសប្បាយ (មានវីដេអូ)