នាយករដ្ឋមន្ត្រីអង់គ្លេស យកលុយ ធ្វើជាលក្ខខណ្ឌដោះដូរជាមួយក្រុម តាលីបង់

តាងនាមឲ្យក្រុមប្រទេស G7 នាយករដ្ឋមន្ត្រីចក្រភពអង់គ្លេស លោក Boris Johnson បានដាក់សំណើទៅកាន់ក្រុមតាលីបង់ ដោយនិយាយថា ប្រទេសលោកខាងលិចនឹងបញ្ឈប់ការបង្កកមូលនិធិរាប់រយលានផោន ប្រសិនបើក្រុមនេះយល់ព្រមតាមលក្ខខណ្ឌមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើបរាជ័យក្នុងការយល់ព្រមឲ្យពន្យារពេលជម្លៀសលើសថ្ងៃទី ៣១ ខែសីហាក៏ដោយប៉ុន្តែនាយករដ្ឋមន្ត្រីរូបនេះបានអះអាងថា ឥទ្ធិពលរបស់ក្រុមប្រទេស G7 អាចជួយធ្វើឲ្យក្រុមតាលីបង់ទទួលសំណើនេះបាន។

លោក Johnson ដែលជាម្ចាស់ផ្ទះរៀបចំកិច្ចប្រជុំបន្ទាន់ G7 កាលពីថ្ងៃទី២៥ខែសីហា បាននិយាយថា មហាអំណាចនានា នឹងអនុញ្ញាតឲ្យមេដឹកនាំថ្មីរបស់អាហ្វហ្គានីស្ថាន អាចទទួលបានមូលនិធិដែលត្រូវបង្កក ប្រសិនបើពួកគេអនុញ្ញាតឲ្យក្មេងស្រីទទួលបានអប់រំ រារាំងប្រទេសមិនឲ្យក្លាយជាកន្លែងបណ្តុះក្រុមភេរវកម្មនិងបង្ក្រាបការជួញដូរ ហេរ៉ូអ៊ីន។

លោកបានបន្ថែមថា លក្ខខណ្ឌលេខមួយរបស់ G7 គឺជា “ការឆ្លងកាត់ប្រកបដោយសុវត្ថិភាព” សម្រាប់អ្នកដែលចង់ចាកចេញនៅចុងខែនេះ នៅពេលកងទ័ពលោកខាងលិចដកចេញ។

យ៉ាងណាក្តី វិមាន Downing Street និយាយថា វាឆាប់ពេក ក្នុងការនិយាយថាតើថវិកាប៉ុន្មានអាចត្រូវបានពង្រីកនិង ត្រូវចំណាយទៅលើអ្វី។ ប៉ុន្តែសេចក្តីថ្លែងការណ៍ពីមេដឹកនាំ G7 ទាំងអស់ បានលើកឡើងថា ថវិកាទាំងនោះនឹងរួមបញ្ចូលជំនួយមនុស្សធម៌។

មានសេចក្តីរាយការណ៍កាលពីដើមខែនេះថា មូលនិធិរូបិយវត្ថុអន្ដរជាតិ បានរារាំងអាហ្វហ្គានីស្ថាន ពីការទទួលបានទុនបម្រុងចំនួន ៣៣០លានផោន។ ថ្វីបើមានការទាមទារពីប្រទេសលោកខាងលិចក៏ដោយ ក៏អ្នកនាំពាក្យតាលីបង់បាននិយាយថា ស្ត្រីដែលធ្វើការ ត្រូវតែនៅផ្ទះដើម្បីសុវត្ថិភាពផ្ទាល់ខ្លួនរបស់ពួកគេ។

លោក Johnson លើកឡើងថា “ថ្ងៃនេះ G7 បានយល់ព្រមលើផែនទីបង្ហាញផ្លូវ សម្រាប់ការចូលរួមនាពេលអនាគតជាមួយក្រុមតាលីបង់។ ប្រសិនបើមូលនិធិដ៏ធំទាំងនោះ នឹងមិនត្រូវបានបង្កកសម្រាប់ប្រើប្រាស់ដោយរដ្ឋាភិបាលនិងប្រជាជនអាហ្វហ្គានីស្ថានទេនោះ អ្វីដែលយើងកំពុងនិយាយគឺ អាហ្វហ្គានីស្ថាន មិនអាចវិលត្រឡប់ទៅរកកន្លែងបង្កភេរវកម្ម អាហ្វហ្គានីស្ថានមិនអាចក្លាយជារដ្ឋផ្តាច់ការទេ ហើយក្មេងស្រីត្រូវទទួលការអប់រំរហូតដល់អាយុ១៨ឆ្នាំ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ផ្ទុះគ្រាប់បែកលើកទី ៤ នៅព្រលានយន្តហោះ ក្រុងកាប៊ុល អ្នកស្លាប់ឡើងដល់ ១០៣ នាក់