WHO ថា វីរុស Nipah ដែលផ្ទុះឡើងវិញនៅ ឥណ្ឌា គឺគ្រោះថ្នាក់ គ្មានវ៉ាក់សាំងការពារ និងមានអត្រាឆ្លងខ្លាំង

រដ្ឋមន្រ្តីក្រសួងសុខាភិបាលឥណ្ឌាលោកស្រី Veena George បាននិយាយកាលពីថ្ងៃចន្ទថា មនុស្សចំនួន ១១ នាក់នៅក្នុងរដ្ឋ Kerala របស់ឥណ្ឌាបានបង្ហាញរោគសញ្ញានៃវីរុសដ៏កាចសាហាវ Nipah ។

ទន្ទឹមនោះ កាលពីថ្ងៃអាទិត្យក្មេងប្រុសអាយុ ១២ ឆ្នាំម្នាក់បានស្លាប់ដោយសារវីរុសនេះ ហើយអ្នកជំនាញខាងវេជ្ជសាស្ត្ររបស់រដ្ឋបានចាប់ផ្តើមពិនិត្យមនុស្ស ២៥១ នាក់ដែលបានទាក់ទងជាមួយក្មេងជំទង់នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់សម្ដីពីទូរទស្សន៍ជាតិ NDTV លោកស្រី George បាននិយាយថា “មានមនុស្ស ៣៨ នាក់ ត្រូវបានដាក់ឲ្យធ្វើចត្តាឡីស័កនៅឯមហាវិទ្យាល័យវេជ្ជសាស្ត្រ និងមន្ទីរពេទ្យ Kozhikode ដែលក្នុងនោះ ១១ នាក់បានបង្ហាញរោគសញ្ញា” ។

វីរុស Nipah ត្រូវបានបង្កឡើងដោយសត្វប្រចៀវស៊ីផ្លែឈើ ហើយមនុស្សដែលឆ្លងជំងឺនេះ គឺនៅពេលហូបផ្លែឈើមានទឹកមាត់របស់ប្រចៀវដែលមានមេរោគ ។

ស្របពេលជាមួយគ្នានោះ វីរុសនេះត្រូវបានអង្គការសុខភាពពិភពលោក (WHO) ចាត់ទុកថាជា វីរុសមួយក្នុងចំណោមវីរុសគ្រោះថ្នាក់បំផុតនៅលើពិភពលោក ព្រោះវាគ្មានថ្នាំ ឬវ៉ាក់សាំងការពារឡើយ ខណៈករណីឆ្លងដ៍សាហាវពីវីរុស Nipah មានពី ៤០ ភាគរយទៅ ៧៥ ភាគរយ ។

គួរបញ្ជាក់ថា វីរុស Nipah ធ្លាប់ត្រូវបានគេរកឃើញនៅឥណ្ឌាក្នុងរដ្ឋ West Bengal កាលពីឆ្នាំ ២០០១ និងនៅរដ្ឋ Kerala ក្នុងឆ្នាំ ២០១៨ ដល់ ២០១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ឥណ្ឌា ផ្ទុះវីរុសកាចសាហាវមួយទៀត សម្លាប់ក្មេងអាយុ ១២ ឆ្នាំ ឯច្រើននាក់ផ្សេងកំពុងស្ថិតក្រោមការត្រួតពិនិត្យ