ថៃ ព្រមានលិចទីក្រុង បាងកក ក្រោយការព្យាករណ៍ភ្លៀងធ្លាក់ខ្លាំងពេញមួយសប្ដាហ៍នេះ

នាយកដ្ឋានឧតុនិយមថៃបានព្រមានពីហានិភ័យនៃការជន់លិចនៅទីក្រុងបាងកក បន្ទាប់ពីមានការព្យាករណ៍ពីភ្លៀងធ្លាក់ខ្លាំងសម្រាប់សប្តាហ៍នេះ ។

រដ្ឋធានីមួយនេះបានជួបប្រទះអាកាសធាតុសើមអស់រយៈពេល ៣ សប្តាហ៍ជាប់ៗគ្នាហើយ ខណៈឥឡូវនេះកម្រិតទឹកនៅប្រឡាយភាគខាងកើតក្រុងបាងកកបានកើនឡើងខ្ពស់រួចទៅហើយ ។

ទន្ទឹមនោះអភិបាលក្រុងបាងកកលោក Aswin Kwanmuang បាននិយាយថា ម៉ាស៊ីនបូមទឹកចាំបាច់ត្រូវដាក់ពង្រាយដើម្បីបង្ហូរទឹកចេញពីប្រឡាយ ហើយសំរាម និងស្មៅត្រូវការយកចេញដើម្បីកែលម្អប្រព័ន្ធលូបង្ហូរទឹក ។

ស្របពេលជាមួយគ្នានេះ កាសែត Bangkok Post បានរាយការណ៍ថា ម៉ាស៊ីនបូមទឹកត្រូវបានបំពាក់នៅតំបន់ដែលងាយនឹងមានទឹកជំនន់ ហើយមជ្ឈមណ្ឌលឆ្លើយតបទឹកជំនន់របស់រដ្ឋធានី បានធ្វើការ ២៤ ម៉ោងក្នុងមួយថ្ងៃដើម្បីធានាការឆ្លើយតបរហ័សក្នុងករណីមានទឹកជំនន់ ខណៈការជន់លិចមួយចំនួននៅក្នុងរដ្ឋធានីបានកើតរួចទៅហើយ ។

ចំណែកយោងតាមនាយកដ្ឋានឧតុនិយមបានឲ្យដឹងថា ភ្លៀងធ្លាក់ខ្លាំងត្រូវបានព្យាករណ៍នៅគ្រប់តំបន់ទាំងអស់នៃប្រទេសថៃ ចាប់ពីថ្ងៃចន្ទនេះរហូតដល់ថ្ងៃសុក្រ ហើយតំបន់ឆ្នេរអាចមើលឃើញពីកម្ពស់ទឹករលករហូតដល់ ២ ម៉ែត្រ ក្នុងអំឡុងពេលមានភ្លៀងផ្គររន្ទះនៅសមុទ្រ Andaman និងឈូងសមុទ្រថៃ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ គ្លីនិកនៅ ថៃ ចាប់ផ្ដើមយកកញ្ឆាព្យាបាលជំងឺមួយចំនួន