ព័ត៌មានអន្ដរជាតិ

វ៉ាក់សាំង Pfizer សម្រាប់កុមារអាយុ៥ទៅ១១ឆ្នាំមានសុវត្ថិភាព និងអង់ទីគ័រការពារល្អ

បានផុស

៥ years មុន

នៅ

ថ្ងៃអង្គារ ២១ កញ្ញា ២០២១

ដោយ

ក្នុងសេចក្តីប្រកាសដែលមានក្តីរំពឹងទុកខ្ពស់ ក្រុមហ៊ុនវ៉ាក់សាំង Pfizer បាននិយាយនៅថ្ងចន្ទ ម្សិលមិញថា ការសាកល្បងគ្លីនិកសាស្ត្រដំណាក់កាលទី២បានបង្ហាញវ៉ាក់សាំងបង្ការកូវីដរបស់ខ្លួនពិតជាមានសុវត្ថិភាព និងមានអង់ទីគ័រឆ្លើយតបខ្ពស់សម្រាប់កុមារអាយុ៥ដល់១១ឆ្នាំ។

ទាំងនេះគឺជាលទ្ធផលដំបូងគេដែលបានចេញផ្សាយសម្រាប់ក្រុមកុមារអាយុនេះចំពោះវ៉ាក់សាំងបង្ការកូវីដ-១៩អាមេរិក ហើយទិន្នន័យមិនទាន់ត្រូវបានគេពិនិត្យឡើងវិញ ឬចេញផ្សាយឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Pfizer បាននិយាយថា ខ្លួនគ្រោងដាក់ឯកសារទៅរដ្ឋបាលចំណីអាហារ និងឱសថ(FDA)អាមេរិកដើម្បីស្នើសុំការអនុញ្ញាតប្រើប្រាស់បន្ទាន់ឆាប់ៗ។ មន្ត្រី FDA បាននិយាយថា នៅពេលឯកសារទិន្នន័យត្រូវបានដាក់ ទីភ្នាក់ងារអាចអនុញ្ញាតឲ្យប្រើប្រាស់សម្រាប់កុមារវ័យក្មេងនាពេលពីរបីសប្តាហ៍ខាងមុខ។

ការសាកល្បងគ្លីនិកសាស្ត្រលើកុមារចំនួន២២៦៨នាក់ដែលមានអាយុ៥ទៅ១១ឆ្នាំ និងចាក់ពីរដូសក្នុងរយៈពេលចន្លោះគ្នា២១ថ្ងៃ។ ការសាកល្បងបានប្រើដូសទម្ងន់១០មីក្រូក្រាមដែលតូចជាងដូស៣០មីក្រូក្រាមសម្រាប់ចាក់កុមារអាយុ១២ឆ្នាំឡើយ។

ក្រុមហ៊ុន Pfizer បាននិយាយក្នុងសេចក្តីប្រកាសថ្មីមួយថា ៖«ដូសទម្ងន់១០មីក្រូក្រាមត្រូវបានជ្រើសរើសយ៉ាងប្រុងប្រយ័ត្នសម្រាប់សុវត្ថិភាព ភាពធន់ និងភាពស៊ាំនៅក្នុងកុមារអាយុ៥ទៅ១១ឆ្នាំ»។

ការឆ្លើយតបនៃប្រព័ន្ធភាពស៊ាំរបស់អ្នកចូលរួមត្រូវវាស់វែងដោយការសម្លឹងមើលកម្រិតអង់ទីគ័រនៅក្នុងឈាម និងប្រៀបធៀបនឹងកម្រិតនៃក្រុមមនុស្សអាយុ១៦ទៅ២៥ឆ្នាំដែលបានចាក់ដូសទំហំ៣០មីក្រូក្រាម។

Pfizer និយាយថា កម្រិតប្រៀបធៀបគ្នាល្អដូចទៅមនុស្សធំដែលចាក់ដូសធំគឺបង្ហាញឲ្យឃើញនូវការឆ្លើយតបនៃប្រព័ន្ធភាពស៊ាំខ្លាំងនៅក្នុងក្រុមកុមារមួយខែ បន្ទាប់ពីការចាក់ដូសទី២។

ក្រុមហ៊ុននិយាយថា ៖«លើសពីនេះទៀត វ៉ាក់សាំងមានភាពធន់ល្អ ផលរំខាន់មានលក្ខណៈទូទៅធៀបនឹងអ្នកចូលអាយុ១៦ទៅ២៥ឆ្នាំ»។

បច្ចុប្បន្ននេះ វ៉ាក់សាំង Pfizer/BioNTech ទទួលបានការអនុម័តឲ្យចាក់សម្រាប់មនុស្សអាយុ១៦ឆ្នាំឡើង និងទទួលបានការអនុញ្ញាតប្រើប្រាស់បន្ទាន់សម្រាប់មនុស្សវ័យជំទង់អាយុ១២ទៅ១៥ឆ្នាំ។ Pfizer បន្ថែមថា ខ្លួនរំពឹងទទួលបានលទ្ធផលល្អពីការសាកល្បងវ៉ាក់សាំងសម្រាប់កុមារអាយុ៦ខែដែលប្រហែលជាចុងឆ្នាំនេះ៕

ប្រែសម្រួល៖ វីរបុត្រ
ប្រភព៖ CNN

Related Topics:កូវីដ-១៩