ហែកគុកនៅ ហ្វីលីពីន ប៉ូលិសបាញ់សម្លាប់អ្នកទោសច្រើននាក់

ដោយដកស្រង់សម្តីពីប៉ូលិស ទីភ្នាក់ងារសារព័ត៌មានហ្វីលីពីន PNA បានរាយការណ៍ថា អ្នកទោស ៤ នាក់ត្រូវបានសម្លាប់ និងម្នាក់ទៀតបានរងរបួសនៅក្នុងការប៉ុនប៉ងចាប់ហែកគុក នៅភាគខាងត្បូងនៃប្រទេសហ្វីលីពីនកាលពីថ្ងៃអាទិត្យ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោកវរសេនីយ៍ឯក James Goforth ប្រធានការិយាល័យប៉ូលិសខេត្ត Surigao del Sur បាននិយាយថា អ្នកទោស ១១ នាក់ដែលជាសមាជិកទាំងអស់នៃកងកម្លាំងប្រដាប់អាវុធថ្មីរបស់បក្សកុម្មុយនិស្តបានប៉ុនប៉ងរត់គេចពីគុក BJMP នៅម៉ោង ៦ និង ៣៥ នាទីព្រឹក ។

ទន្ទឹមនោះការបាញ់ព្រមានត្រូវបានធ្វើឡើង នៅពេលដែលអ្នកទោសបានប្រញាប់ប្រញាល់ទៅខ្លោងទ្វារធំនៃបរិវេណពន្ធនាគារ ។

លោក Goforth បានប្រាប់ទីភ្នាក់ងារសារព័ត៌មានថា “ដោយសារអ្នកទោសមិនអើពើនឹងការបាញ់ព្រមាននោះ បុគ្គលិកពន្ធនាគារ BJMP ត្រូវបានបង្ខំឲ្យបាញ់ទៅលើអ្នកទោសដែលកំពុងរត់គេចខ្លួន” ។

ស្របពេលជាមួយគ្នានេះ អ្នកទោស ៣ នាក់បានស្លាប់នៅនឹងកន្លែង ខណៈ ២ នាក់ទៀតត្រូវបានបញ្ជូនទៅមន្ទីរពេទ្យ ។ ម្នាក់ក្នុងចំណោមអ្នកដែលត្រូវបានបញ្ជូនទៅមន្ទីរពេទ្យ ក្រោយមកត្រូវបានប្រកាសថាស្លាប់ នៅពេលមកដល់ពេទ្យ ខណៈម្នាក់ទៀតកំពុងទទួលការព្យាបាល ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទី​បំផុត​ស្តេច​ប្រដាល់​អាស៊ី Pacquiao​ ប្រកាស​ឈរឈ្មោះ​​ប្រធានាធិបតី