តាលីបង់ ចូលវាយឆ្មក់កន្លែងលាក់ខ្លួនរបស់ក្រុម IS សម្លាប់ និងចាប់ខ្លួនច្រើននាក់

អ្នកនាំពាក្យក្រុមតាលីបង់បានអះអាងថា ក្រុមយុទ្ធជនចលនារបស់ខ្លួនបានវាយឆ្មក់លើកន្លែងលាក់ខ្លួនមួយរបស់ក្រុម IS នៅភាគខាងជើងទីក្រុងកាប៊ុលកាលពីថ្ងៃសុក្រ ដោយសម្លាប់ និងចាប់ខ្លួនក្រុមសកម្មប្រយុទ្ធមិនបញ្ជាក់អត្តសញ្ញាណមួយចំនួន ។

អ្នកនាំពាក្យក្រុមតាលីបង់លោក Bilal Karimi បានប្រាប់សារព័ត៌មាន Associated Press ថា ការវាយឆ្មក់កាលពីថ្ងៃសុក្របានកើតឡើងនៅក្នុងទីក្រុង Charikar ខេត្ត Parwan ។

លោក Karimi បាននិយាយថា “ការវាយឆ្មក់នេះបានធ្វើឡើង បន្ទាប់ពីការចាប់ខ្លួនដោយក្រុមតាលីបង់នៃសមាជិក IS ចំនួន ២ នាក់ដែលជាប់ពាក់ព័ន្ធនឹងការបំផ្ទុះគ្រាប់បែកនៅតាមដងផ្លូវ ដែលបានកំណត់គោលដៅយានយន្តរបស់ក្រុមតាលីបង់នៅក្នុងទីក្រុង ដោយបណ្តាលឲ្យអ្នកប្រយុទ្ធ ៤ នាក់រងរបួស” ។

លោកបានបន្ថែមថា “អ្នកទាំងពីរត្រូវបានសាកសួរ ហើយព័ត៌មានដែលពួកគេបានផ្តល់ឲ្យ បានជួយក្រុមតាលីបង់កំណត់អត្តសញ្ញាណកន្លែងលាក់ខ្លួនរបស់ក្រុម IS” ។

ចាប់តាំងពីក្រុមតាលីបង់ដណ្តើមបានប្រទេសអាហ្វហ្គានីស្ថាន ក្រុមនេះបានធ្វើការបង្រ្កាបនៅខេត្ត Nangarhar និងខេត្ត Eastern ដែលក្រុម IS មានមូលដ្ឋាន និងលាក់ខ្លួន ដើម្បីឆ្លើយតបទៅនឹងការវាយប្រហារដែលបានកើតឡើងនៅទូទាំងប្រទេសអាហ្វហ្គានីស្ថាន ដែលត្រូវបានបង្កើតឡើងដោយក្រុមសកម្មប្រយុទ្ធមួយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តាលីបង់ ព្រមានលោក បៃដិន ថា នឹងជួបផលវិបាក បើយន្តហោះគ្មានមនុស្សបើកអាមេរិក ចូលដែនអាកាស អាហ្វហ្គានីស្ថាន