ម៉ាឡេស៊ី ទិញថ្នាំព្យាបាលកូវីដ Molnupiravir រាប់ម៉ឺនគ្រាប់

ក្រសួងសុខាភិបាលម៉ាឡេស៊ីបាននិយាយនៅថ្ងៃព្រហស្បតិ៍នេះថា ប្រទេសម៉ាឡេស៊ីបានឈានដល់កិច្ចព្រមព្រៀងជាមួយក្រុមហ៊ុនផលិតឱសថអាមេរិក Merck ដើម្បីទិញថ្នាំព្យាបាលកូវីដចំនួន ១៥០,០០០គ្រាប់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្រ្តីក្រសួងសុខាភិបាលម៉ាឡេស៊ីលោក Khairy Jamaluddin បាននិយាយថា រដ្ឋាភិបាលបានចុះហត្ថលេខាលើលិខិតស្តីពីការទិញថ្នាំលេបតាមមាត់ Molnupiravir នៅថ្ងៃព្រហស្បតិ៍នេះ ។

លោក Khairy បាននិយាយនៅក្នុងសេចក្តីថ្លែងការណ៍មួយថា “ការសម្រេចចិត្តនេះត្រូវបានធ្វើឡើង ដើម្បីបន្ថែមការព្យាបាលប្រកបដោយភាពច្នៃប្រឌិតថ្មី ជាអាវុធថ្មីដើម្បីប្រយុទ្ធប្រឆាំងនឹងជំងឺកូវីដ ១៩ ក្រៅពីការចាក់វ៉ាក់សាំង និងវិធានការសុខភាពសាធារណៈដទៃទៀត” ។

ទិន្នន័យពីការសាកល្បងព្យាបាលបានបង្ហាញថា ថ្នាំលេបតាមមាត់ Molnupiravir បានបង្ហាញពីប្រសិទ្ធភាពកាត់បន្ថយហានិភ័យនៃការចូលសម្រាកព្យាបាលនៅមន្ទីរពេទ្យ និងការស្លាប់ដោយសារជំងឺកូវីដ ១៩ បាន ៥០ ភាគរយ នៅក្នុងការសាកល្បងព្យាបាលដំណាក់កាលចុងក្រោយ ។

ទិន្នន័យនេះបានបង្កឲ្យមានតម្រូវការថ្នាំនេះយ៉ាងច្រើននៅអាស៊ី ដោយកូរ៉េខាងត្បូង សិង្ហបុរី និងអូស្ត្រាលីបានប្រកាសពីកិច្ចព្រមព្រៀងស្រដៀងគ្នានដើម្បីទិញថ្នាំគ្រាប់នៅសប្តាហ៍នេះ ខណៈតៃវ៉ាន់ និងថៃក៏កំពុងពិភាក្សាជាមួយក្រុមហ៊ុន Merck ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ជប៉ុន អាចជាប្រទេសអាស៊ីដំបូងគេ ប្រើថ្នាំគ្រាប់កម្ចាត់កូវីដនៅចុងឆ្នាំនេះ