ស្ងាត់ៗ WHO ធ្វើការបញ្ជូនឧបករណ៍វេជ្ជសាស្ត្រកូវីដទៅ កូរ៉េខាងជើង

អង្គការសុខភាពពិភពលោក (WHO) កំពុងធ្វើការដើម្បីបញ្ជូនការផ្គត់ផ្គង់ឧបករណ៍វេជ្ជសាស្ត្រព្យាបាលជំងឺកូវីដ ១៩ ទៅកាន់ប្រទេសកូរ៉េខាងជើង ហើយវាជាសញ្ញាបង្ហាញថា កូរ៉េខាងជើងកំពុងបន្ធូរបន្ថយការបិទព្រំដែនដ៏តឹងរ៉ឹងបំផុតមួយរបស់ពិភពលោកដើម្បីទទួលបានជំនួយពីខាងក្រៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WHO បាននិយាយនៅក្នុងរបាយការណ៍ឃ្លាំមើលប្រចាំសប្តាហ៍ថា ខ្លួនបានចាប់ផ្តើមបញ្ជូនការផ្គត់ផ្គង់សម្ភារៈវេជ្ជសាស្រ្តសំខាន់ៗទាក់ទងនឹងជំងឺកូវីដ ១៩ តាមរយៈកំពង់ផែ Dalian ប្រទេសចិន សម្រាប់ការស្តុកទុក និងបញ្ជូនបន្តទៅកាន់ប្រទេសកូរ៉េខាងជើង ។

ទន្ទឹមនោះ មន្រ្តី WHO នៅថ្ងៃព្រហស្បតិ៍ ទី ៧ ខែតុលានេះ មិនបានឆ្លើយតបភ្លាមៗចំពោះសំណើសុំព័ត៌មានលម្អិតអំពីសម្ភារៈផ្គត់ផ្គង់ និងថាតើពួកគេបានទៅដល់កូរ៉េខាងជើងហើយឬនៅនោះទេ ។

ខណៈពេលដែលប្រទេសកូរ៉េខាងជើងមិនមានករណីឆ្លងកូវីដសូម្បីតែមួយករណី អ្នកជំនាញក្រៅប្រទេសសង្ស័យថា ប្រទេសនេះបានរួចផុតពីជំងឺឆ្លងដែលបានប៉ះពាល់ស្ទើរតែគ្រប់ទីកន្លែងនៅលើពិភពលោក ។

កូរ៉េខាងជើងបានប្រាប់ WHO ថា ខ្លួនបានធ្វើតេស្តមនុស្សចំនួន ៤០,៧០០ នាក់រកជំងឺកូវីដ ១៩ រហូតដល់ថ្ងៃទី ២៣ ខែកញ្ញា ហើយការធ្វើតេស្តទាំងអស់គឺអវិជ្ជមាន ។

ចំណែកបើយោងតាមរបាយការណ៍របស់ WHO បានឲ្យដឹងថា អ្នកដែលត្រូវបានធ្វើតេស្តនៅសប្តាហ៍ចុងក្រោយនេះរួមមានមនុស្សចំនួន ៩៤ នាក់ដែលមានជំងឺដូចផ្តាសាយ ឬរោគសញ្ញាផ្សេងទៀត និងបុគ្គលិកថែទាំសុខភាពចំនួន ៥៧៣ នាក់ ហើយលទ្ធផលនៅតែអវិជ្ជមាន ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ WHO ឲ្យប្រើវ៉ាក់សាំងការពារជំងឺកាចសាហាវមួយនេះជាលើកដំបូង