យោធាមីយ៉ាន់ម៉ា ចោទ UN ថា កំពុងញុះញង់ឲ្យមានអំពើហិង្សា ក្នុងប្រទេស

កាលពីថ្ងៃអាទិត្យទី ២៤ ខែតុលា យោធាមីយ៉ាន់ម៉ា បានចាត់ទុករបាយការណ៍សិទ្ធិមនុស្ស ចុងក្រោយរបស់អង្គការសហប្រជាជាតិ (UN) ស្តីពីប្រទេសដែលញាំញីដោយជម្លោះមួយនេះថា ជាការញុះញង់ឲ្យមានអំពើហិង្សា ហើយបានចោទប្រកាន់ស្ថាប័ននេះថា បានជ្រៀតជ្រែកក្នុងកិច្ចការផ្ទៃក្នុងរបស់ខ្លួន។

ប្រជាជាតិអាស៊ីអាគ្នេយ៍មួយនេះ បានស្ថិតក្នុងភាពចលាចលចាប់តាំងពីរដ្ឋប្រហារខែកុម្ភៈមក ដោយមានអ្នកស្លាប់ជាង១,១០០នាក់ នៅក្នុងការបង្រ្កាបលើអ្នកប្រឆាំង។ នេះបើយោងតាមក្រុមឃ្លាំមើលក្នុងតំបន់។

កាលពីថ្ងៃសុក្រ UN បាននិយាយថា ខ្លួនមានការភ័យខ្លាចចំពោះមហន្តរាយសិទ្ធិមនុស្សកាន់តែខ្លាំង ចំពេលមានរបាយការណ៍ថា ទាហានរាប់ម៉ឺននាក់ និងអាវុធធុនធ្ងន់ កំពុងត្រូវបានបញ្ជូនទៅកាន់តំបន់បះបោរនៅភាគខាងជើង និងភាគពាយ័ព្យ។

អ្នករាយការណ៍ពិសេសប្រចាំប្រទេសមីយ៉ាន់ម៉ា លោក Tom Andrews បានព្រមានដល់មហាសន្និបាត UN ថា យុទ្ធសាស្ត្រនេះគឺធ្វើឲ្យយើងនឹកឃើញដល់ការដាក់ដាក់ពង្រាយ មុនពេលមានការបង្ក្រាបបង្ហូរឈាមលើជនជាតិភាគតិចរ៉ូហ៊ីងយ៉ាក្នុងឆ្នាំ ២០១៦-២០១៧។

ទោះបីជាយ៉ាងណាក៏ដោយ យោធាបានរិះគន់របាយការណ៍នេះកាលពីថ្ងៃអាទិត្យ ហើយបានចោទប្រកាន់ UN ថា បានប្រើប្រាស់សិទ្ធិមនុស្សធ្វើជាឧបករណ៍នយោបាយ ដើម្បីជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ា។

ក្រសួងការបរទេសដែលតែងតាំងដោយយោធា បាននិយាយនៅក្នុងសេចក្តីថ្លែងការណ៍មួយថា របាយការណ៍នេះនឹងនាំឲ្យមានការបែកបាក់បន្ថែមទៀត ក្នុងប្រទេសជាតិ និងជាការញុះញង់ឲ្យមានអំពើហិង្សាផ្ទៃក្នុង។

ជិតប្រាំបួនខែ បន្ទាប់ពីការដណ្តើមអំណាច យោធាមិនអាចលុបបំបាត់ការប្រឆាំងនឹងការគ្រប់គ្រងរបស់ខ្លួនបានទេ ដោយកងកម្លាំងការពារប្រជាជនក្នុងតំបន់ បានប៉ះទង្គិចគ្នាជារឿយៗជាមួយកងទ័ព។

យោធាបាននិយាយនៅក្នុងតួលេខចុងក្រោយរបស់ខ្លួនកាលពីថ្ងៃអាទិត្យថា បុគ្គលិកយោធាជាង៧០នាក់ និងប៉ូលិសចំនួន៩៣នាក់ ត្រូវបានសម្លាប់ចាប់តាំងពីខែកុម្ភៈមក៕

ប្រែសម្រួល៖ Vann Vann

ប្រភព៖ CNA

ចុចអាន៖ ទីបំផុត មីយ៉ាន់ម៉ា ដោះលែងអ្នកទោសនយោបាយ រាប់ពាន់នាក់ ក្រោយរងសម្ពាធពី អាស៊ាន