ក្រៅពី Molnupiravir ពិភពលោក​​មានថ្នាំកូវីដ​ផ្សេងទៀត ក៏មានប្រសិទ្ធភាព តែស្ថិតក្នុងដំណាក់កាលតេស្ត

បណ្ដាប្រទេសជាច្រើនលើពិភពលោក ក៏ដូចជាប្រទេសក្នុងតំបន់អាស៊ាន កំពុងញាប់ដៃញាប់ជើង បញ្ជាទិញអាវុធចុងក្រោយ ប្រឆាំងនឹងជំងឺកូវីដ ដែលជាថ្នាំប្រឆាំងវីរុស ទោះមិនទាន់ត្រូវបានអនុញ្ញាត​ឲ្យប្រើប្រាស់នៅឡើយក៏ដោយ ។

យ៉ាងណាមិញ​ ទោះថ្នាំទាំងនោះ ​កំពុង​ស្ថិត​ក្នុង​ដំណាក់កាល​សាកល្បង ក្នុង​នោះ​គេ​ក៏​ឃើញ​ក្រុមហ៊ុន​ថ្នាំ​ធំៗ​​ជា​ច្រើន ​កំពុង​ដាក់​ពាក្យ​ស្នើសុំ​សិទ្ធ​ចែកចាយ​ថ្នាំ​របស់​ខ្លួន​ នៅ​ទូទាំងពិភពលោកដូចគ្នា។​

ទន្ទឹមនោះ ប្រទេសដែលកំពុងផលិតថ្នាំកូវីដ​ បានបង្ហាញពីប្រសិទ្ធភាពថ្នាំរៀងៗខ្លួន ខណៈបណ្ដាប្រទេសនីមួយៗបាននឹងកំពុងបញ្ជាទិញថ្នាំដែលអាចព្យាបាលកូវីដបានលឿននិងរហ័សជាងគេ។

១ ថ្នាំ Molnupiravir របស់​ក្រុមហ៊ុន Merck & Co

Molnupiravir ត្រូវ​បាន​កម្ពុជា​អនុញ្ញាត​ឲ្យប្រើក្នុងលក្ខខណ្ឌបន្ទាន់ លេខ CAM 015 EUA-2021 ហើយ​ថ្នាំ​គ្រាប់​នេះត្រូវតម្រូវឲ្យលេប ២ ដង ក្នុងមួយថ្ងៃ រយៈពេល ៥ថ្ងៃ រាប់ចាប់ពីថ្ងៃ​ចេញ​រោគ​សញ្ញា​មក។ ថ្នាំនេះត្រូវបានគេដឹងថា ជាថ្នាំព្យាបាលកូវីដដែលកំពុងល្បីខ្លាំង​មក​ទល់​ពេល​នេះ មាន​ប្រទេស​ជា​ច្រើន​កំពុង​បញ្ជា​ទិញ ដោយសារ​តែ​ប្រសិទ្ធភាព​ដ៏​ល្អ​របស់​ថ្នាំ។

ថ្នាំ​របស់​ក្រុមហ៊ុន Merck ប្រភេទ​នេះ មាន​សមត្ថភាព​ព្យាបាល​ជំងឺ​កូវីដ កម្រិត​ស្រាល​ទៅ​មធ្យម ចំពោះ​មនុស្ស​ពេញវ័យ ដែល​បាន​ធ្វើ​តេស្ត​វិជ្ជមាន និង​មាន​ហានិភ័យ​ខ្ពស់ នៃ​ការ​វិវត្ត​ទៅ​ជា​ជំងឺ​ធ្ងន់ធ្ងរ ហើយ​អាច​កាត់​បន្ថយ​អត្រា​នៃ​ការ​ចូល​ព្យាបាល​ក្នុង​មន្ទីរពេទ្យ​និង​ស្លាប់បាន ៥០ ភាគរយ។ ការ​ស្រាវជ្រាវ​ដែល​ធ្វើ​ឡើង​នៅ​ក្នុង​សហរដ្ឋអាមេរិក និង​បណ្ដា​ប្រទេស​ផ្សេង​ទៀត បាន​បង្ហាញ​ថា ថ្នាំ Molnupiravir មាន​ប្រសិទ្ធភាព​ប្រឆាំង​នឹង​វីរុស​បំប្លែង​ខ្លួន​ដូចជា Delta, Gamma, និង Mu។

២ របស់​ក្រុមហ៊ុន​ឱសថជប៉ុន Shionogi

ប្រភេទ​ថ្នាំ​គ្រាប់​នេះ​ តម្រូវ​ឲ្យ​លេប ១ ថ្ងៃ ១ គ្រាប់ សម្រាប់​ព្យាបាល​អ្នក​ជំងឺ​កូវីដ ដែល​មាន​រោគ​សញ្ញា​ស្រាល ឬ​មិន​បញ្ចេញ​រោគ​សញ្ញា ឲ្យ​ជា​សះស្បើយ​ក្នុងរយៈពេល ៥ ថ្ងៃ ​ប៉ុណ្ណោះ ។

ដោយឡែក ក្រុមហ៊ុនផលិតឱសថជប៉ុន Shionogi បាននិយាយថា ថ្នាំកូវីដលេបមួយថ្ងៃមួយគ្រាប់ដែលខ្លួនកំពុងអភិវឌ្ឍនេះ កាន់តែមានប្រសិទ្ធភាព បើប្រើរួមគ្នានឹងថ្នាំគ្រាប់មកពីក្រុមហ៊ុន Merck ។

៣ ថ្នាំ AZD7442 របស់​ក្រុមហ៊ុន AstraZeneca

ថ្នាំ​គ្រាប់ប្រភេទ​នេះ​ ប្រើ​រូបមន្ត​លាយ​បញ្ចូល​គ្នា​ ដោយ​បាន​ទទួល​ជោគជ័យ​ក្នុង​ការ​កាត់បន្ថយ​ជំងឺ​ធ្ងន់ធ្ងរ ឬ​ការ​ស្លាប់​ចំពោះ​អ្នក​ជំងឺ​ដែល​មិន​ចូល​មន្ទីរពេទ្យ ក្នុង​ការ​សិក្សា​នៅ​ដំណាក់កាល​ចុងក្រោយ។

ជាពិសេស ​អាច​កាត់​បន្ថយ​ហានិភ័យ​នៃ​ការ​វិវត្ត​ទៅ​ជំងឺ​កូវីដ​ធ្ងន់ធ្ងរ​ ឬ​ស្លាប់​បាន ៥០ភាគរយ ចំពោះ​អ្នកជំងឺ​ដែល​ចេញ​រោគ​សញ្ញា​រយៈ​ពេល ៧ ថ្ងៃ​ ឬ​តិច​ជាង​នេះ ។

៤ ថ្នាំ PF-07321332 របស់​ក្រុមហ៊ុន Pfizer

កាល​ពី​ខែ​មីនា ឆ្នាំ ២០២០ ថ្នាំ PF-07321332 របស់​ក្រុមហ៊ុន Pfizer បាន​ធ្វើតេស្ត​ព្យាបាល​​ដោយ​ផ្សំ​គ្នា​ជាមួយ​ថ្នាំ ritonavir (ថ្នាំ​ព្យាបាល​មេរោគ​អេដស៍)។ ថ្នាំ​​គ្រាប់​នេះ ​អាច​រារាំង​ការ​ចម្លង​មេរោគ ការពារ​អាការ​ធ្ងន់ធ្ងរ និង​​អាច​ឈប់​ការ​ចម្លង​បានទាំង​ស្រុង​តែ​ម្ដង។

យ៉ាងណាមិញ​ ថ្នាំ​នេះ​ក៏​ត្រូវ​លេប ២ ដង ក្នុងមួយថ្ងៃ រយៈពេល ៥-១០ ថ្ងៃ​ទើប​ឃើញ​លិទ្ធផលជាក់ស្ដែង។

៥ ថ្នាំ​គ្រាប់ព្យាបាលកូវីដទាំង ២ ប្រភេទ របស់ក្រុមហ៊ុន Sinopharm

ថ្នាំគ្រាប់ព្យាបាលកូវីដ-១៩ នេះ ត្រូវបានផលិតនិងស្រាវជ្រាវ​ដោយក្រុមអ្នកវិទ្យាសាស្រ្ត​វេជ្ជសាស្រ្ត​ចិន និង​ក្រុមហ៊ុនផលិតវ៉ាក់សាំងចិន Sinopharm មានប្រសិទ្ធភាព​ខ្ពស់​សម្រាប់​អ្នក​ជំងឺកូវីដ​កម្រិតស្រាល ​និងមធ្យម។

យោងតាមការចុះផ្សាយរបស់សារព័ត៌មាន Global Time កាលពីថ្ងៃទី ១២ ខែកញ្ញា ឆ្នាំ២០២១នេះ បានឲ្យដឹងថា ក្រុនហ៊ុន Sinopharm កំពុងតែមមាញឹកក្នុង​ផលិតថ្នាំគ្រាប់ព្យាបាលជំងឺកូវីដ ២ ប្រភេទ ជាខែលការពារដែលមានសមត្ថភាពអាចកាត់បន្ថយ​និងបន្សាប ឥទ្ធិពលវីរុសកូវីដ ដែលបានឆ្លងចូលក្នុងខ្លួនមនុស្សឲ្យ​មានកម្រិតស្រាលមកវិញ។

ទោះយ៉ាងណា ថ្នាំដែលបានរៀបរាប់ខាងលើនេះ គឺសុទ្ធតែជាថ្នាំព្យាបាលកូវីដដែលស្ថិតក្នុងដំណាក់កាលសាកល្បងនៅលើពិភពលោក តាមប្រទេសនីមួយៗ ឬតាមលិទ្ធផលជាក់ស្ដែង នៃសុខភាពប្រជាជនក្នុងតំបន់៕

អត្ថបទ៖ សាង ស្រីល័ក្ខ

ចុចអាន៖ក្រៅពី កម្ពុជា តើប្រទេស អាស៊ាន ណាខ្លះទៀតប្រកាសទិញថ្នាំកូវីដរបស់ អាមេរិក

ចុចអាន៖មកដឹងគម្លាតការចាក់វ៉ាក់សាំងទាំង ៥ ប្រភេទ ដែល កម្ពុជា ទទួលបាន