ឥណ្ឌា ផ្ទុះវីរុស Zika ជាថ្មី ពេលនេះរកឃើញជិត ១០០ករណី

មនុស្សចំនួន ៨៩នាក់ រួមទាំងកុមារ ១៧នាក់ផងដែរ បានធ្វើតេស្តវិជ្ជមានវីរុស Zika ដែលករណីកាន់តែច្រើនត្រូវបានរាយការណ៍នៅក្នុងទីក្រុង Kanpur នៃប្រទេសឥណ្ឌា។

ដោយរកឃើញដំបូងក្នុងឆ្នាំ១៩៤៧ មេរោគ Zika ដែលឆ្លងពីសត្វមូស បានរាលដាលទៅដល់ប្រទេសប្រេស៊ីលក្នុងឆ្នាំ២០១៥ នៅពេលទារករាប់ពាន់នាក់បានកើតមកជាមួយជំងឺ Microcephaly ដែលជាជំងឺបណ្តាលឲ្យទារកកើតមកមានក្បាលតូចខុសធម្មតា និងខួរក្បាលមិនដំណើរការ។

លោកវេជ្ជបណ្ឌិត Nepal Singh ប្រធានផ្នែកវេជ្ជសាស្រ្តនៃស្រុក Kanpur ក្នុងរដ្ឋ Uttar Pradesh បានប្រាប់រ៉យទ័រថា “មានការកើនឡើងនៃករណីវីរុស Zika ហើយមន្ទីរសុខាភិបាលបានបង្កើតក្រុមជាច្រើនដើម្បីទប់ស្កាត់ការរីករាលដាល។ មានស្ត្រីម្នាក់មានផ្ទៃពោះ ហើយយើងកំពុងយកចិត្តទុកដាក់ជាពិសេស ចំពោះនាង”។

ករណីត្រូវបានគេរាយការណ៍នៅក្នុងរដ្ឋមួយចំនួនរបស់ឥណ្ឌា ក្នុងរយៈពេលប៉ុន្មានឆ្នាំថ្មីៗនេះ។

គួរបញ្ជាក់ថា ករណី Zika លើកដំបូងនៅក្នុងទីក្រុងឧស្សាហកម្ម Kanpur ត្រូវបានរកឃើញកាលពីថ្ងៃទី ២៣ខែតុលា ហើយចំនួនករណីបានកើនឡើងនៅសប្តាហ៍កន្លងមកនេះ៕

ប្រែសម្រួល៖ សន្យា

ប្រភព៖ Tuoi Tre

ចុចអាន៖ អគ្គិភ័យឆេះថ្នាក់រៀនចំបើង សម្លាប់កុមារ ២៥នាក់ ក្នុងប្រទេស នីហ្សេរ