មុនបោះឆ្នោត Pacquiao សារភាពថា ខ្លួនធ្លាប់ជក់ម៉ាទឹកកក (មានវីដេអូ)

បេក្ខភាពប្រធានាធិបតីហ្វីលីពីន Manny Pacquiao បាននិយាយថា លោក “ឆោតល្ងង់” និងមិនចេះច្បាប់ នៅពេលលោកប្រើគ្រឿងញៀន (ម៉ាទឹកកក) កាលពីវ័យក្មេង ប៉ុន្តែពេលនេះអះអាងថា ជនល្មើសដែលស្គាល់គ្រឿងញៀនគឺខុសច្បាប់ ហើយគួរតែត្រូវបានផ្តន្ទាទោស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកប្រដាល់ជើងឯកពិភពលោកចូលនិវត្តន៍ Pacquiao គឺជាអ្នកគាំទ្រដ៏ល្បីល្បាញម្នាក់ចំពោះសង្គ្រាមគ្រឿងញៀនដ៏ឃោរឃៅរបស់លោកប្រធានាធិបតី Rodrigo Duterte ដែលបានសម្លាប់មនុស្សរាប់ពាន់នាក់។

ប៉ុន្តែមុនការបោះឆ្នោតឆ្នាំ២០២២ Pacquiao បានដកខ្លួនពីលោក Duterte ដែលកំពុងប្រឈមមុខនឹងការស៊ើបអង្កេតអន្តរជាតិចំពោះការបង្រ្កាបដ៏បង្ហូរឈាមរបស់គាត់ ហើយឥឡូវនេះបាននិយាយថា ជនល្មើសគួរតែមានឱកាសដើម្បីការពារខ្លួន។

ដោយសន្យាថានឹងបន្តយុទ្ធនាការប្រឆាំងគ្រឿងញៀនតាមរបៀបត្រឹមត្រូវ Pacquiao បានប្រាប់ AFP ថា “យើងត្រូវដាក់គុកអ្នកដែលកំពុងប្រើប្រាស់គ្រឿងញៀន លក់ថ្នាំញៀន នោះជាអ្វីដែលច្បាប់ចែង។ ពីមុនខ្ញុំល្ងង់ នោះហើយជាមូលហេតុដែលខ្ញុំប្រើថ្នាំញៀន ខ្ញុំមិនចេះច្បាប់។ សព្វ​ថ្ងៃ​នេះ ប្រជាជន​គេ​ដឹង​ហើយ​ថា ច្បាប់​មិន​អនុញ្ញាត​ឲ្យ​មាន​គ្រឿង​ញៀនឡើយ”។

Pacquiao បានធ្វើឲ្យពិភពកីឡាមានការភ្ញាក់ផ្អើលយ៉ាងខ្លាំងក្នុងឆ្នាំ២០១៦ នៅពេលគាត់សារភាពថា បានជក់កញ្ឆា និងម៉ាទឹកកកកាលពីក្មេង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ Pacquiao ឈរឈ្មោះប្រជែង តំណែងប្រធានាធិបតី ហ្វីលីពីន ជាផ្លូវការ