តាលីបង់ និង មីយ៉ាន់ម៉ា សុទ្ធតែមិនត្រូវបានអនុញ្ញាតឲ្យចូល UN

គណៈកម្មាធិការអង្គការសហប្រជាជាតិ (UN) កាលពីថ្ងៃពុធបានពន្យារពេលការសម្រេចចិត្តមួយស្តីពីថាតើនរណានឹងតំណាងឲ្យប្រទេសអាហ្វហ្គានីស្ថាន និងមីយ៉ាន់ម៉ា នៅ ឯស្ថាប័នពិភពលោកដែលមានសមាជិកចំនួន ១៩៣ នាក់ ។

ការ​ប្រកាស​នេះ​មាន​ន័យ​ថា តំណាង​ក្រុម​តាលីបង់​អាហ្វហ្កានីស្ថាន និង​យោធា​មីយ៉ាន់ម៉ា នឹង​មិន​ត្រូវ​បាន​អនុញ្ញាត​ឲ្យ​ចូល​ក្នុង​ស្ថាប័ន​ពិភពលោក​សម្រាប់​ពេល​នេះនោះ​ទេ ។

ទន្ទឹមនោះ ឯកអគ្គរដ្ឋទូត UN របស់ប្រទេសស៊ុយអែតលោកស្រី Anna Enestrom បានប្រាប់អ្នកយកព័ត៌មាន បន្ទាប់ពីកិច្ចប្រជុំបិទទ្វារនៃគណៈកម្មាធិការបញ្ជាក់អត្តសញ្ញាណរបស់មហាសន្និបាត ដែលលោកស្រីធ្វើជាប្រធានថា គណៈកម្មាធិការបានធ្វើការសម្រេចចិត្តបែបនេះ បន្ទាប់ពីពិនិត្យលើលិខិតបញ្ជាក់អត្តសញ្ញាណក្នុងស្ថានភាពប្រទេសទាំងពីរនេះ ។

គណៈកម្មាធិការបញ្ជាក់អត្តសញ្ញាណ ដែលមានសមាជិកចំនួន ៩ រូប មានកាតព្វកិច្ចពិនិត្យលិខិតបញ្ជាក់អត្តសញ្ញាណរបស់តំណាងរដ្ឋជាសមាជិក និងរាយការណ៍ទៅ មហាសន្និបាតនៅ ទីនោះ ។

គួរបញ្ជាក់ថា ក្រុមតាលីបង់ដែលបានដណ្តើមអំណាចកាលពីពាក់កណ្តាលខែសីហាពីរដ្ឋាភិបាលដែលទទួលស្គាល់ជាអន្តរជាតិ បានតែងតាំងអ្នកនាំពាក្យដែលមានមូលដ្ឋាននៅ ទីក្រុងដូហារបស់ខ្លួនគឺលោក Suhail Shaheen ជាឯកអគ្គរដ្ឋទូតអង្គការសហប្រជាជាតិរបស់ប្រទេសអាហ្វហ្គានីស្ថាន ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ កងទ័ព មីយ៉ាន់ម៉ា ចាប់ខ្លួនគ្រូពេទ្យ ១៨នាក់ ដោយសារព្យាបាលភេវករ