ខេត្តភាគកណ្តាលប្រទេសវៀតណាម បិទសាលាចំនួន៣៧ ដោយសារកូវីដឆ្លងខ្លាំង ក្រោយចូលឆ្នាំ

ខេត្ត Ha Tinh ភាគកណ្តាលប្រទេសវៀតណាម បានបិទថ្នាក់រៀនទាំងអនឡាញ និង offline នៅក្នុងសាលារៀនចំនួន៣៧ ចាប់តាំងពីថ្ងៃពុធមក ស្របពេលដែលការឆ្លងកូវីដថ្មី រាប់រយករណីត្រូវបានកត់ត្រាជារៀងរាល់ថ្ងៃ។

សាលារៀនដែលរួមមានសាលាមត្តេយ្យ សាលាបឋមសិក្សា និងអនុវិទ្យាល័យ ភាគច្រើនមានទីតាំងនៅស្រុកដែលមានហានិភ័យកូវីដខ្ពស់។ នេះបើយោងតាមគណៈកម្មាធិការដឹកនាំសម្រាប់បង្ការ និងគ្រប់គ្រងជំងឺកូវីដ-១៩ របស់ខេត្ត Ha Tinh។

បន្ទាប់​ពី​បុណ្យចូលឆ្នាំវៀតណាម សិស្ស​ក្នុង​ខេត្តនេះ​បាន​ចាប់​ផ្តើម​ត្រឡប់​ទៅ​សាលារៀន​វិញ។ គិតត្រឹមថ្ងៃពុធ គ្រូបង្រៀនចំនួន៥០នាក់ និងសិស្សចំនួន៣៣១នាក់នៅក្នុងខេត្ត បានធ្វើតេស្តវិជ្ជមានជំងឺកូវីដ១៩។

ដោយសារការកើនឡើងនៃករណីឆ្លងក្នុងចំណោមគ្រូ និងសិស្សដែលត្រូវការការព្យាបាល, សាលារៀនចំនួន៣៧ដែលមានសិស្សប្រហែល១៨,៣៤៨នាក់ ត្រូវផ្អាកសកម្មភាពសិក្សាទាំងអស់ ទាំងអនឡាញ និង offline។

អាជ្ញាធរនិយាយថា ពួកគេនឹងបើកសាលាឡើងវិញ នៅពេលក្រោយ អាស្រ័យលើស្ថានភាពនៃមេរោគឆ្លង។

ក្រៅពីសាលាដែលបានរៀបរាប់ខាងលើ សាលាចំនួន២១ផ្សេងទៀត ដែលមានសិស្សចំនួន ១៣,០៥៣នាក់ ត្រូវប្តូរទៅរៀនតាមអនឡាញ ដោយសារករណីមួយចំនួនតូច។

គួរបញ្ជាក់ថា ខេត្ត Ha Tinh មានសាលារៀនប្រហែល ៦៧០ ដែលមានគ្រូបង្រៀន ៣៥០,០០០ នាក់៕

ប្រែសម្រួល៖ Vann Vann

ប្រភព៖ VN Express

ចុចអាន៖ ស្ថានភាពមិនស្រួល ចិន បិទខ្ទប់ទីក្រុងជាប់ព្រំដែន វៀតណាម