មិនធូរស្បើយទេ! ជំងឺផ្តាសាយបក្សីនៅជប៉ុនរាលដាលដល់ខេត្តទី ១០

ការផ្ទុះជំងឺផ្តាសាយបក្សីដ៏អាក្រក់បំផុតនៅប្រទេសជប៉ុនបានរាលដាលដល់កសិដ្ឋានថ្មីជាបន្តបន្ទាប់ ហើយឥឡូវនេះប៉ះពាល់ដល់ជាង ២០ ភាគរយនៃខេត្តចំនួន ៤៧ របស់ប្រទេសនេះដោយមន្រ្តីបានបញ្ជាឲ្យសម្លាប់សត្វបក្សីជាច្រើន បន្ទាប់ពីការងាប់ជាហូរហែរ ។

ក្រសួងកសិកម្មបាននិយាយកាលពីចុងសប្តាហ៍ថា សត្វបក្សីប្រមាណ ១១,០០០ ក្បាលនឹងត្រូវសម្លាប់ និងកប់ បន្ទាប់ពីមានជំងឺផ្តាសាយបក្សីត្រូវបានគេរកឃើញនៅកសិដ្ឋានចិញ្ចឹមមាន់យកស៊ុតមួយកន្លែងនៅទីក្រុង Higashiomi ក្នុងខេត្ត Shiga នៅភាគនិរតីប្រទេសជប៉ុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបាននិយាយនៅថ្ងៃចន្ទនេះថា ការផ្ទុះឡើងមួយទៀតបានចាប់ផ្តើមនៅក្នុងខេត្ត Kagawa ដែលការផ្ទុះនេះបានកើតឡើងកាលពីខែមុន ។

យោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) បានឲ្យដឹងថា ការផ្ទុះឡើងនៅក្នុងប្រទេសជប៉ុន និងកូរ៉េខាងត្បូងដែលនៅជិតខាងគឺជាជំងឺផ្តាសាយបក្សីមួយប្រភេទក្នុងចំណោមជំងឺផ្តាសាយបក្សីផ្សេងៗទៀត ។

លោកស្រី Madhur Dhingra មន្រ្តីសុខភាពសត្វជាន់ខ្ពស់នៅ FAO បានប្រាប់ Reuters តាមអ៊ីម៉ែលថា “វីរុសដែលត្រូវបានរកឃើញនៅក្នុងប្រទេសជប៉ុនគឺជាប់ពាក់ព័ន្ធនឹងវីរុសកូរ៉េ ហើយវាក៏ទាក់ទងនឹងវីរុសនៅអឺរ៉ុបផងដែរចាប់ពីដើមឆ្នាំ ២០២០” ។

លោកស្រីបាននិយាយថា “នេះមានន័យថាបច្ចុប្បន្នយើងមានជំងឺ H5N8 HPAI ចំនួនពីរផ្សេងគ្នានៅអាស៊ីខាងកើត និងអឺរ៉ុប” ។

នៅប្រទេសជប៉ុនខេត្តចំនួន ១០ ក្នុងចំណោម ៤៧ ខេត្តនៃប្រទេសនេះត្រូវបានរងផលប៉ះពាល់ដោយការផ្ទុះឡើងជំងឺនេះដោយបក្សីប្រមាណ ៣ លានក្បាលត្រូវបានសម្លាប់ ។

មន្រ្តីក្រសួងកសិកម្មបានប្រាប់ Reuters នៅដើមសប្តាហ៍នេះថា កសិដ្ឋានទាំងអស់នៅក្នុងប្រទេសជប៉ុនត្រូវបានគេបញ្ជាឲ្យបាញ់ថ្នាំសម្លាប់មេរោគនៅនឹងកន្លែងក៏ដូចជាពិនិត្យអនាម័យ និងធានាពីសំណាញ់ដាក់ដើម្បីការពារសត្វបក្សីព្រៃឲ្យបានត្រឹមត្រូវ ។

ស្របពេលជាមួយគ្នានេះប្រទេសជប៉ុនបានផ្អាកការនាំចូលបសុបក្សីពីប្រទេសចំនួន ៧ រួមទាំងប្រទេសអាល្លឺម៉ង់ផងដែរ ។

យោងតាមក្រសួងកសិកម្មបានឲ្យដឹងថា ប្រទេសជប៉ុនមានហ្វូងមេមាន់ពងប្រហែល ១៨៥ លានក្បាល និងមានប្រជាជនចិញ្ចឹមចំនួន ១៣៨ លានក្បាល ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ កំពុងមានការភ័យខ្លាចថា ស្ថានការណ៍ជំងឺផ្តាសាយបក្សីកាន់តែអាក្រក់នៅជប៉ុនអាចបង្កឲ្យមានរោគរាតត្បាតដូចកូវីដ

ចុចអាន ៖ ជំងឺផ្ដាសាយបក្សីនៅជប៉ុនរាលដាលដល់ខេត្តទី ៥