ព័ត៌មានអន្ដរជាតិ

ប្រធានាធិបតីអាហ្វ្រិកខាងត្បូងបន្ទោស ណាតូ ធ្វើឲ្យកើតសង្គ្រាមនៅអ៊ុយក្រែន

បានផុស

៤ years មុន

នៅ

ថ្ងៃសុក្រ ១៨ មីនា ២០២២

ដោយ

ប្រធានាធិបតីអាហ្វ្រិកខាងត្បូង លោក Cyril Ramaphosa កាលពីថ្ងៃព្រហស្បតិ៍ ទី១៧ ខែមីនានេះបានបន្ទោសអង្គការណាតូចំពោះសង្គ្រាមនៅប្រទេសអ៊ុយក្រែន និងបាននិយាយថា លោកប្រឆាំងចំពោះការអំពាវនាវឲ្យមានការថ្កោលទោសប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ramaphosa មានប្រសាសន៍ថា ៖«សង្គ្រាមអាចជៀសវាងបាន ប្រសិនបើ ណាតូបានយកចិត្តទុកដាក់ចំពោះការព្រមានពីក្នុងចំណោមមេដឹកនាំ និងមន្ត្រីរបស់ខ្លួនរយៈពេលជាច្រើនឆ្នាំមកហើយដែលការពង្រីករបស់ខ្លួនទៅភាគខាងកើតនឹងនាំឲ្យអស្ថិរភាពកើនឡើងនៅក្នុងតំបន់»។

ទោះបីជាយ៉ាងណា លោក Ramaphosa បាននិយាយថា អាហ្វ្រិកខាងត្បូងមិនអាចអត់ឱនបានទេចំពោះការប្រើកម្លាំងទ័ព និងរំលោភច្បាប់អន្តរជាតិ ដែលជាក់ស្តែងសំដៅការវាយប្រហារលើអ៊ុយក្រែនកាលពីថ្ងៃទី២៤ ខែកុម្ភៈ ដែលរដ្ឋាភិបាលក្រុងមូស្គូហៅថា «បេសកកម្មពិសេស»ដើម្បីធ្វើឲ្យគ្មានអាវុធនៅអ៊ុយក្រែន។

ទីក្រុងកៀវ និងសម្ព័ន្ធមិត្តលោកខាងលិចជឿជាក់ថា រុស្ស៊ីបានចាប់ផ្តើមសង្គ្រាមមិនបង្កហេតុដើម្បីបង្ក្រាបប្រទេសជិតខាងដែលលោក ពូទីន ហៅថាជារដ្ឋសិប្បនិម្មិត។

លោក Ramaphosa លាតត្រដាងដែរដា លោក ពូទីន បានធានាផ្ទាល់ខ្លួនរបស់លោកពីការចរចាកំពុងមានវឌ្ឍនភាព។ មេដឹកនាំអាហ្វ្រិកខាងត្បូងបាននិយាយថា លោក មិនទាន់បាននិយាយជាមួយប្រធានាធិបតីអ៊ុយក្រែន លោក Volodymyr Zelenskyy នៅឡើយទេ។

នៅថ្ងៃសុក្រ ការិយាល័យរបស់លោក Ramaphosa បាននិយាយថា អាហ្វ្រិកខាងត្បូងត្រូវបានស្នើសុំឲ្យសម្របសម្រួលក្នុងជម្លោះរុស្ស៊ី-អ៊ុយក្រែន ហើយលោកបានប្រាប់លោក ពូទីន ថា វាគួរត្រូវបានដោះស្រាយតាមការចរចា។ យ៉ាងណា លោកមិនបានបញ្ជាក់ទេថា តើនរណាស្នើសុំឲ្យលោកជួយធ្វើអន្តរាគមន៍។

«មានអ្នកដែលកំពុងទទួចថា យើងគួរប្រកាន់ជំហរប្រឆាំងនឹងរុស្ស៊ី។ វិធីសាស្ត្រដែលយើងនឹងយកជំនួស គឺថា ទទួចឲ្យប្រកាន់ជំហរចរចាវិញ។ ការស្រែកចុះ ស្រែកឡើង នឹងមិនធ្វើឲ្យបញ្ចប់ជម្លោះនោះទេ»៕

ប្រែសម្រួល៖ វីរបុត្រ
ប្រភព៖ Reuters

Related Topics:អាហ្វ្រិកខាងត្បូង