លោក Zelensky៖ អឺរ៉ុបយឺតពេលហើយ ក្នុងការបញ្ឈប់ រុស្ស៊ី (មានវីដេអូ)

ប៉ុន្មានម៉ោងមុននេះ មេដឹកនាំអ៊ុយក្រែនលោក Volodymyr Zelensky បានថ្លែងសុន្ទរកថាទៅកាន់កិច្ចប្រជុំកំពូលក្រុមប្រឹក្សាអឺរ៉ុបនៅទីក្រុង ព្រុចសែល ក្នុងប្រទេស បែលហ្ស៊ិក។

លោកបានគូសបញ្ជាក់ពីការបំផ្លិចបំផ្លាញ និងការខូចខាតដែលបង្កឡើងដោយរុស្ស៊ី នៅក្នុងប្រទេសរបស់គាត់ ហើយលោកបានថ្លែងអំណរគុណដល់អឺរ៉ុប សម្រាប់ការរួបរួមគាំទ្រ អ៊ុយក្រែន។

បន្ទាប់មក លោកបានប្រាប់មេដឹកនាំអឺរ៉ុបដោយត្រង់ថា ពួកគេបានធ្វើសកម្មភាពយឺតពេលហើយ ក្នុងការបញ្ឈប់រុស្ស៊ី។

លោកនិយាយថា “អ្នកបានអនុវត្តទណ្ឌកម្ម យើងដឹងគុណ។ ទាំងនេះគឺជាជំហានដ៏មានឥទ្ធិពល ប៉ុន្តែវាយឺតពេលបន្តិចហើយ”។ លោកបន្ថែមថា ប្រសិនបើមានការដាក់ទណ្ឌកម្មការពារជាមុន ប្រហែលរុស្ស៊ីមិនធ្វើសង្រ្គាមទេ”។

លោកក៏បានចង្អុលទៅបំពង់បង្ហូរឧស្ម័ន Nord Stream 2 ផងដែរ ដោយលោកបានលើកឡើងថា ប្រសិនបើវាត្រូវបានបិទមុននេះ រុស្ស៊ីនឹងមិនបង្កើតវិបត្តិឧស្ម័នឡើយ។

បន្ទាប់​មក លោក Zelensky ក៏បាន​អង្វរករ​ប្រទេស​ជិតខាង ឲ្យ​អនុម័ត​សំណើ​របស់​អ៊ុយក្រែន​ដើម្បី​ចូល​ជា​សមាជិក​សហភាព​អឺរ៉ុបផងដែរ។

គួរបញ្ជាក់ថា ក្នុងរយៈពេលប៉ុន្មានសប្តាហ៍ថ្មីៗនេះ លោក Zelensky បានធ្វើសុន្ទរកថាជាច្រើនទៅកាន់សភាជុំវិញពិភពលោក ហើយលោកមិនខ្លាចក្នុងការរិះគន់ប្រទេសលោកខាងលិចនោះទេ ចំពោះអ្វីដែលលោកមើលឃើញថា ជាការបរាជ័យក្នុងការផ្តល់ការគាំទ្រគ្រប់គ្រាន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចំណុចសំខាន់ៗដែលមេដឹកនាំពិភពលោក លើកឡើងក្នុងកិច្ចប្រជុំកំពូល ណាតូ