អ៊ុយក្រែន បញ្ជាក់ច្បាស់ៗ កាលបរិច្ឆេទ ដែលលោក ពូទីន កំណត់បញ្ចប់សង្គ្រាម ស្របនឹងព្រឹត្តិការណ៍ធំមួយ (មានវីដេអូ)

លោក វ្ល៉ាឌីមៀរ ពូទីន បាន​ប្រកាស​រួច​ហើយ​នូវ “ការ​បញ្ចប់” នៃ​សង្រ្គាមនៅ​ក្នុង​ប្រទេស​អ៊ុយក្រែន ដែល​ក្រុម​មន្ត្រី​ក្នុង​ទីក្រុង កៀវ ​អះអាង​ថា គឺត្រូវគ្នា​នឹង​កាលបរិច្ឆេទ​​ដែល​រុស្ស៊ី​អបអរ​ការ​កម្ចាត់​ពួក​ណាស៊ី​ ក្នុង​សង្រ្គាម​លោក​លើក​ទី​ពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការកងកម្លាំងប្រដាប់អាវុធអ៊ុយក្រែនបាននិយាយថា ប្រទេសរុស្ស៊ីបានដាក់គោលដៅថា សង្រ្គាមត្រូវតែបញ្ចប់មុនថ្ងៃទី៩ខែឧសភាឆ្នាំ២០២២។

រុស្សី បានប្រារព្ធទិវាជ័យជម្នះដ៏អធិកអធម លើទីលានក្រហម ក្នុងទីក្រុងមូស្គូ នៅថ្ងៃនោះជារៀងរាល់ឆ្នាំ ដើម្បីរំលឹកដល់ការចុះចាញ់របស់ពួកណាស៊ីអាល្លឺម៉ង់ និងការបញ្ចប់សង្គ្រាមលោកលើកទីពីរ។

នៅក្នុងការបង្ហោះ Facebook, អគ្គសេនាធិការកងកម្លាំងប្រដាប់អាវុធអ៊ុយក្រែនបាននិយាយថា “យោងតាមព័ត៌មានដែលទទួលបាន, ក្នុងចំណោមបុគ្គលិកនៃកងកម្លាំងប្រដាប់អាវុធសហព័ន្ធរុស្ស៊ី ការងារឃោសនាកំពុងធ្វើឡើងឥតឈប់ឈរ ដែលកំណត់ថា សង្រ្គាមត្រូវតែបញ្ចប់ឲ្យបានមុនថ្ងៃទី៩ខែឧសភាឆ្នាំ ២០២២”។

ការប្រារព្ធពិធីជ័យជម្នះសង្រ្គាមលោកលើកទីពីរដ៏ធំរបស់រុស្ស៊ី ត្រូវបានធ្វើឡើងជារៀងរាល់ឆ្នាំ មួយថ្ងៃបន្ទាប់ពីអឺរ៉ុបខាងលិចប្រារព្ធទិវា ជ័យជម្នះ ថ្ងៃទី ៨ខែឧសភា ដោយសារតែភាពខុសគ្នានៃល្វែងម៉ោងរវាងប្រទេសរុស្ស៊ី និងបណ្តាប្រទេសប្លុកសូវៀតផ្សេងទៀត និងម៉ោងនៅអឺរ៉ុបកណ្តាល។

ទិវាជ័យជម្នះក្នុងប្រទេសរុស្ស៊ី គឺជាថ្ងៃបុណ្យជាតិ។ ការិយាល័យសាធារណៈ សាលារៀន និងអាជីវកម្មភាគច្រើនត្រូវបានបិទ ហើយដោយសារតែប្រទេសគាំទ្ររុស្ស៊ីផ្សេងទៀតក៏បានផ្សាយសុន្ទរកថាទិវាជ័យជម្នះរបស់ប្រធានាធិបតីរុស្ស៊ីដែរនោះ ទិវានេះគឺជាព្រឹត្តិការណ៍មួយក្នុងចំណោមព្រឹត្តិការណ៍ដែលមនុស្សមើលច្រើនជាងគេបំផុតនៅលើពិភពលោកប្រចាំឆ្នាំ។

គួរបញ្ជាក់ថា នៅឆ្នាំ២០២០ ព្រឹត្តិការណ៍នេះត្រូវបានពន្យារពេលរហូតដល់ចុងឆ្នាំ ដោយសារជំងឺរាតត្បាតកូវីដ១៩៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ដឹងទីតាំងនិងកាលបរិច្ឆេទ នៃកិច្ចចរចា រុស្ស៊ី-អ៊ុយក្រែន ជុំបន្ទាប់