ប្រទេស ណាតូ មួយនេះត្រៀមពង្រាយអាវុធនុយក្លេអ៊ែររបស់ អាមេរិក ទប់ទល់ការវាយលុយពី រុស្ស៊ី

ឧបនាយករដ្ឋមន្ត្រីប៉ូឡូញបាននិយាយថា ប្រទេសប៉ូឡូញត្រៀមខ្លួនជាស្រេចក្នុងការរក្សាទុកអាវុធនុយក្លេអ៊ែររបស់សហរដ្ឋអាមេរិកនៅលើទឹកដីរបស់ខ្លួនដើម្បីទប់ស្កាត់ការឈ្លានពានរបស់រុស្ស៊ី ។

លោក Jarosław Kaczynski បាននិយាយថា ក្នុងនាមប្រទេសដែលក៏ជាសមាជិកអង្គការណាតូដែរនោះ ទីក្រុង Warsaw គឺបើកចំហរក្នុងការធ្វើជាកន្លែងដាក់អាវុធនុយក្លេអ៊ែររបស់សហរដ្ឋអាមេរិកនៅលើទឹកដីរបស់ខ្លួន ។

លោកបានប្រាប់សារព័ត៌មាន DW ថា “ប្រសិនបើជនជាតិអាមេរិកបានស្នើសុំឲ្យយើងរក្សាទុកអាវុធនុយក្លេអ៊ែររបស់សហរដ្ឋអាមេរិកនៅក្នុងប្រទេសប៉ូឡូញ យើងនឹងបើកចំហចំពោះវាជានិច្ច ហើយនេះជាការ​ពង្រឹង​យ៉ាង​ខ្លាំង​ដល់​ការ​ទប់ទល់នឹង​ក្រុង​ម៉ូស្គូ“ ។

យោងតាមលោក Kaczynski បានឲ្យដឹងថា បច្ចុប្បន្នសំណួរបែបនេះមិនត្រូវបានលើកឡើងទេ ទោះជាយ៉ាងណាក៏ដោយ វាអាចនឹងផ្លាស់ប្តូរក្នុងពេលឆាប់ៗនេះ ។ លោក​ក៏​បាន​សង្កត់​ធ្ងន់​ថា គំនិត​ផ្ដួចផ្ដើម​គួរ​តែ​មក​ពី​ជនជាតិ​អាមេរិក ។

ទន្ទឹមនោះក៏មានសេចក្តីរាយការណ៍ថា ស្ថានទូតអ៊ុយក្រែនកំពុងចរចាជាមួយរដ្ឋាភិបាលប៉ូឡូញស្តីពីការបិទព្រំដែនទាំងស្រុងជាមួយបេឡារុសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Perild

ចុចអាន ៖ លោក Zelensky ថា រុស្ស៊ី ចង់វាយដណ្ដើមតំបន់ ២ ទៀតរបស់ អ៊ុយក្រែន