WHO​ ​នឹង​​ផ្គត់​​ផ្គង់​​ថ្នាំ​​អេដស៍​​ដល់​​​អ៊ុយក្រែន​​សម្រាប់​​១២​​ខែ​​ខាង​​មុខ​

អង្គការសុខភាពពិភពលោក (WHO) បាននិយាយនៅថ្ងៃអង្គារ៍ម្សិលមិញថា ខ្លួននឹងផ្គត់ផ្គង់ថ្នាំបង្ការជំងឺអេដស៍ដល់ប្រទេសអ៊ុយក្រែនដែលអ្នកជំងឺកំពុងត្រូវការសម្រាប់រយៈពេល១២ខែខាងមុខ។

WHO ដែលរួមជាមួយផែនការសង្គ្រោះបន្ទាន់របស់ប្រធានាធិបតីសហរដ្ឋអាមេរិកសម្រាប់ការសង្គ្រោះជំងឺអេដស៍ (PEPFAR) អាជ្ញាធរអ៊ុយក្រែន និងដៃគូផ្សេងៗទៀតបានទទួលថ្នាំបង្ការជំងឺអេដស៍ចំនួន ២០៩ ០០០កញ្ចប់។

អ៊ុយក្រែនត្រូវបានប៉ាន់ស្មានថា មានអ្នកជំងឺអេដស៍ប្រមាណ ២៦០ ០០០នាក់ ដែលជាប្រទេសលំដាប់ទី២មានអ្នកឆ្លងមេរោគអេដស៍ច្រើនបំផុតនៅអឺរ៉ុប បន្ទាប់ពីរុស្ស៊ី ហើយមុនពេលការវាយប្រហាររបស់ទីក្រុងមូស្គូ អ្នកជំងឺពាក់កណ្តាលស្ថិតក្នុងដំណាក់កាលព្យាបាល។

កាលពីខែមុន ទីភ្នាក់ងារអង្គការសហប្រជាជាតិទទួលបន្ទុកជំងឺអេដស៍ (HIV/AIDS) បានព្រមានថា អ៊ុយក្រែននៅសល់មិនដល់មួយខែនៃការផ្គត់ផ្គង់ថ្នាំសម្រាប់អ្នកជំងឺអេដស៍។

លោក Hans Henri P. Kluge នាយកប្រចាំតំបន់អឺរ៉ុបរបស់អង្គការសុខភាពពិភពលោកបាននិយាយថា ៖«សង្គ្រាមនេះមានសក្តានុពលក្នុងការបំផ្លាញវឌ្ឍនភាពដែលបានសន្សំយ៉ាងលំបាកក្នុងរយៈពេលប៉ុន្មានឆ្នាំកន្លងទៅពីចំនួននៃបញ្ហាសុខភាព រាប់ទាំងជំងឺអេដស៍ផង។ យើងមិនអាចបណ្តោយឲ្យរឿងនោះកើតឡើងនៅពេលអ៊ុយក្រែនចាប់​ផ្តើមបង្វែរជ្រុងមួយលើជំងឺអេដស៍»។

ខណៈមិនមានការព្យាបាលជំងឺអេសដ៍ជាសះស្បើយ ថ្នាំបង្ការអាចគ្រប់គ្រងមេរោគ និងការពារចម្លងតាមរយៈការរួមភេទទៅអ្នកដទៃ។ ការរំខានណាមួយលើការព្យាបាលអាចនាំឲ្យមានផលវិបាកធ្ងន់ធ្ងរ។

WHO បាននិយាយថា ការដឹកជញ្ជូនថ្នាំអេដស៍ដំណាក់កាលទី១បានឆ្លងព្រំដែនប៉ូឡូញចូលទៅប្រទេសអ៊ុយក្រែនហើយ និងត្រៀម​ដឹកជញ្ជូនទៅកាន់មន្ទីរពេទ្យទូទាំងប្រទេស៕

ប្រែសម្រួល៖ វីរបុត្រ
ប្រភព៖ reuters