រឿង៣យ៉ាង បើកើតឡើងមែន នោះសង្រ្គាមរុស្ស៊ី-អ៊ុយក្រែន អាចរីកកាន់តែធំ ហើយនឹងទាញណាតូចូល

រដ្ឋមន្ត្រីណាតូ បានជួបប្រជុំគ្នានៅទីក្រុងព្រុចសែលកាលពីសប្តាហ៍មុន ដើម្បីពិភាក្សាថាតើពួកគេគួរធ្វើឲ្យដល់កម្រិតណា ក្នុងការផ្តល់សម្ភារៈយោធាដល់ប្រទេស អ៊ុយក្រែន។

បញ្ហាប្រឈមសម្រាប់អង្គការណាតូពេញមួយសង្រ្គាមនេះ គឺរបៀបផ្តល់ការគាំទ្រផ្នែកយោធាឲ្យគ្រប់គ្រាន់ដល់អ៊ុយក្រែន ដើម្បីការពារខ្លួន ដោយមិនចាំបាច់ឲ្យខ្លួនចូលទៅក្នុងជម្លោះដោយផ្ទាល់។

ហានិភ័យដែលប្រទេសរុស្ស៊ីនឹងងាកទៅរកការប្រើប្រាស់អាវុធនុយក្លេអ៊ែរបែបយុទ្ធសាស្ត្រ ឬជម្លោះដែលរីករាលដាលហួសពីព្រំដែនរបស់អ៊ុយក្រែនទៅជាសង្រ្គាមអឺរ៉ុបកាន់តែទូលំទូលាយ គឺស្ថិតក្រោមគំនិតរបស់មេដឹកនាំលោកខាងលិចជានិច្ច ហើយនេះគឺជាបញ្ហាប្រឈម។

លោកប្រធានាធិបតី ពូទីន បានរំលឹកពិភពលោកនៅពេលសង្រ្គាមផ្ទុះឡើងដំបូងថា រុស្ស៊ីគឺជាមហាអំណាចអាវុធនុយក្លេអ៊ែរ ហើយថា លោកកំពុងដាក់កងកម្លាំងនុយក្លេអ៊ែរ ឲ្យស្ថិតក្នុងលក្ខណៈប្រុងជើងការខ្ពស់។

ដូច្នេះ​តើ​សង្គ្រាម​រុស្ស៊ី​-​អ៊ុយក្រែន​អាច​ឈាន​ដល់​ជម្លោះ​អឺរ៉ុប​កាន់តែ​ធំ​ ហើយ​អូស ​ណាតូ ឲ្យចូលរួមបាន​យ៉ាង​ដូចម្ដេចទៅ?

ខាងក្រោមនេះ គឺជាចំណុចសំខាន់ចំនួន៣ ដែលអះអាងដោយសារព័ត៌មាន BBC៖

១. កងកម្លាំងអ៊ុយក្រែននៅទីក្រុង Odesa បាញ់មីស៊ីលដែលផ្គត់ផ្គង់ដោយណាតូ ចំនិងពន្លិចនាវាចម្បាំងរុស្ស៊ី ក្នុងសមុទ្រខ្មៅ ជាមួយនឹងការបាត់បង់នាវិកជិត១០០នាក់ និងទាហានម៉ារីនរាប់សិបនាក់។ ចំនួនអ្នកស្លាប់ច្រើនបែបនេះ នៅក្នុងការវាយប្រហារតែមួយនឹងជារឿងដែលមិនធ្លាប់មានពីមុនមក ហើយលោក ពូទីន នឹងស្ថិតក្រោមសម្ពាធឲ្យឆ្លើយតបក្នុងទម្រង់ណាមួយ។

២. ការវាយប្រហារដោយមីស៊ីលយុទ្ធសាស្ត្ររបស់រុស្ស៊ី សំដៅទៅលើក្បួនផ្គត់ផ្គង់គ្រឿងបរិក្ខារយោធា ដែលឆ្លងកាត់ពីប្រទេសណាតូ ដូចជាប៉ូឡូញ ឬស្លូវ៉ាគី ចូលទៅក្នុងអ៊ុយក្រែន។ ប្រសិនបើការស្លាប់និងរបួស មានជាបន្តនៅខាងព្រំដែនរបស់ណាតូ វាអាចប៉ះពាល់ទៅលើមាត្រា៥របស់ធម្មនុញ្ញអង្គការណាតូ ដែលចែងថា ការវាយប្រហារលើសមាជិកណាមួយ​​ គឺស្មើនឹងការវាយប្រហារលើណាតូទាំងមូល។

៣. ចំពេលមានការប្រយុទ្ធគ្នាយ៉ាងស្វិតស្វាញនៅ Donbas ការផ្ទុះមួយបានកើតឡើងនៅរោងចក្រឧស្សាហកម្ម ដែលបណ្តាលឲ្យមានការលេចធ្លាយឧស្ម័នគីមីពុល។ ថ្វីបើ​ករណី​នេះ​បាន​កើត​ឡើង​រួចទៅ​ហើយក៏ដោយ ប៉ុន្តែ​មិន​មាន​អ្នក​ស្លាប់ត្រូវបានគេរាយការណ៍ទេ​។ ប៉ុន្តែ​តើ​វា​ជា​លទ្ធផល​នៃ​ការ​ស្លាប់​និង​របួស​យ៉ាង​ច្រើន ដូច​ដែលគេ​ឃើញ​ក្នុង​ការ​ប្រើប្រាស់​ឧស្ម័ន​ពុល​របស់​ស៊ីរី​នៅ​ទីក្រុង Ghouta ដែរឬទេ ហើយប្រសិនបើ​វា​ត្រូវ​បាន​គេ​រក​ឃើញ​ថា ​មាន​ចេតនា​បង្ក​ឡើង​ដោយ​កងកម្លាំង​រុស្ស៊ីមែន​នោះ នោះណាតូ​នឹង​ត្រូវ​មាន​កាតព្វកិច្ច​ឆ្លើយតប។

ទោះបីជាយ៉ាងណាក៏ដោយ ៣ចំណុចខាងលើនេះ គ្រាន់តែជាការលើកឡើងរបស់ BBC ប៉ុណ្ណោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ រុស្ស៊ី ចោទថា លោកខាងលិចកំពុងជួយអ៊ុយក្រែន រៀបចំការចោទប្រកាន់ក្លែងក្លាយ ធ្វើបាបខ្លួន