ព័ត៌មានអន្ដរជាតិ

កសិករ អ៊ុយក្រែន ពាក់អាវក្រោះការពារគ្រាប់បើកត្រាក់ទ័រភ្ជួរដីស្រែនៅ ព្រំដែនជួរមុខជម្លោះជាមួយ រុស្ស៊ី (មានវីដេអូ)

បានផុស

៤ years មុន

នៅ

ថ្ងៃព្រហស្បតិ៍ ២៨ មេសា ២០២២

ដោយ

កសិករអ៊ុយក្រែននៅតំបន់ភាគខាងត្បូង Zaporizhzhia ដែលជាប់ព្រំដែនជួរមុខនៃជម្លោះយោធាជាមួយរុស្ស៊ី ឥឡូវនេះកំពុងពាក់អាវក្រោះការពារគ្រាប់បើកត្រាក់ទ័រភ្ជួរស្រែរបស់ពួកគេ ក្រោយពេលគ្រាប់រ៉ុកកែតតូចៗបានចាប់ផ្តើមធ្លាក់នៅក្បែរវាលស្រែ បន្ទាប់ពីសង្រ្គាមបានចាប់ផ្តើមមួយសប្តាហ៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាការបាញ់ផ្លោងនៅក្នុងតំបន់នេះបានកើនឡើងក្នុងប៉ុន្មានសប្តាហ៍ថ្មីៗនេះក៏ដោយ ក៏លោក Yuri វ័យ ៤១ ឆ្នាំ និងកសិករដែលធ្វើការជាមួយគាត់ឈ្មោះ Oleksii បានប្តេជ្ញាចិត្តក្នុងការភ្ជួរស្រែនៅនិទាឃរដូវនេះ ។

លោក Yuri បាននិយាយថា “យើងបានពាក់អាវក្រោះការពារគ្រាប់ផ្លោងធ្វើដំណើរឆ្លងកាត់ប៉ុស្តិ៍ត្រួតពិនិត្យទៅធ្វើការ ផឹកតែ និងកាហ្វេ យើងចូលចាក់ហ្គាសរួចហើយក៏ទៅវាលស្រែ” ។

ចំណែកលោក Oleksii អាយុ ៤៣ ឆ្នាំក៏បានពណ៌នាពីការវាយប្រហារដោយគ្រាប់រ៉ុកកែតរបស់រុស្ស៊ីដែរថា “វាគួរឲ្យខ្លាច ប៉ុន្តែយើងអាចគ្រប់គ្រងបាន ព្រោះដោយសារតែយើងដឹងថា វាតែងតែកើតឡើងនៅពេលយប់ប៉ុណ្ណោះ ។ បន្ទាប់ពីមានការវាយប្រហារ មនុស្សម្នាពិនិត្យមើលវាលស្រែ ហើយបើចាំបាច់យើងនឹងហៅអ្នកជំនាញឲ្យជួយយកគ្រាប់រ៉ុកកែត និងកម្ទេចកម្ទីចេញពីវាលស្រែ” ។

គួរបញ្ជាក់ថា អ៊ុយក្រែនជាប្រទេសនាំចេញស្រូវសាលីធំជាងគេទី ៥ របស់ពិភពលោក ហើយស្ថិតក្នុងលំដាប់កំពូលទាំង ៣ សម្រាប់នាំចេញពោត គ្រាប់ធញ្ញជាតិ និងគ្រាប់ផ្កាឈូករ័ត្ន ។ កង្វះគ្រាប់ធញ្ញជាតិអ៊ុយក្រែននៅលើទីផ្សារពិភពលោក ដោយសារសង្គ្រាមបាននិងកំពុងជំរុញតម្លៃអាហារជុំវិញពិភពលោកឡើងថ្លៃផងដែរ ។

ទន្ទឹមនោះកាលពីសប្តាហ៍មុន ក្រសួងកសិកម្មរបស់ប្រទេសអ៊ុយក្រែនបាននិយាយថា កសិករបានសាបព្រួសដំណាំនៅនិទាឃរដូវចំនួន ២.៥ លានហិកតានៃផ្ទៃដី ២០ ភាគរយ ពោលធ្លាក់ចុះ ២០ ភាគរយ ដោយសារតែសង្គ្រាមលុកលុយរបស់រុស្ស៊ី ។

ពាក់ព័ន្ធនឹងបញ្ហានេះ រុស្ស៊ីបានហៅសកម្មភាពរបស់ខ្លួននៅអ៊ុយក្រែនថាជា “ប្រតិបត្តិការយោធាពិសេស” ដើម្បីកម្ចាត់កងទ័ពអ៊ុយក្រែន និងការពារវាពីពួកហ្វាស៊ីសនិយម ខណៈអ៊ុយក្រែន និងលោកខាងលិចនិយាយថា នេះជាលេសមិនពិតសម្រាប់សង្គ្រាមលុកលុយរបស់ប្រធានាធិបតី វ្ល៉ាឌីមៀ ពូទីន ៕

សូមទស្សនាវីដេអូ!