ព័ត៌មានអន្ដរជាតិ

បាតុកម្មថ្នាក់ជាតិទាមទារឲ្យរដ្ឋាភិបាលស្រីលង្កាចុះចេញជុំវិញវិបត្តិសេដ្ឋកិច្ច

បានផុស

២ years មុន

នៅ

ថ្ងៃសុក្រ ៦ ឧសភា ២០២២

ដោយ

បណ្តាញរថយន្តក្រុង និងរថភ្លើងរបស់ប្រទេសស្រីលង្កាត្រូវបានផ្អាក ខណៈការិយាល័យ និងរោងចក្រស្ទើរតែគ្មានមនុស្សធ្វើការនៅថ្ងៃសុក្រ ទី៦ ខែឧសភានេះ ដោយសារពួកគេបានចេញទៅធ្វើការតវ៉ាថ្នាក់ជាតិដើម្បីទាមទារឲ្យថ្នាក់ដឹកនាំរដ្ឋាភិបាលលាលែងពីអំណាចជុំវិញវិបត្តិសេដ្ឋកិច្ចធ្ងន់ធ្ងរបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រយៈពេលជាច្រើនខែមកហើយដែលប្រទេសកោះមួយនេះជួបកង្វះស្បៀងអាហារ ឥន្ធនៈ ថាមពល និងឱសថទូទាំងប្រទេស។ សាធារណជនមានការខឹងសម្បារយ៉ាងខ្លាំងដែលធ្វើឲ្យពួកគេទ្រាំលែងចេញតវ៉ាដើម្បីទាមទារប្រមុខដឹកនាំរដ្ឋាភិបាលចុះចេញពីអំណាចដោយសារភាពដឹកនាំមិនល្អនាំឲ្យកើតមានវិបត្តិធ្ងន់ធ្ងរបំផុតមិនធ្លាប់គិតចាប់ពីទទួលបានឯករាជ្យនៅឆ្នាំ១៩៤៨មក។

កម្មកររាប់លាននាក់បានចាកចេញពីកន្លែងធ្វើការងារនៅថ្ងៃសុក្រនេះដើម្បីចូលរួមបាតុកម្មដែលរៀបចំឡើងដោយចលនាសហជីពរបស់ប្រទេសដែលជំរុញឲ្យរថយន្តក្រុងរដ្ឋត្រូវបានផ្អាក។

រថយន្តក្រុងដែលគ្រប់គ្រងដោយឯកជនក៏បានផ្អាកធ្វើដំណើរខណៈបុគ្គលិកឧស្សាហកម្មក៏បាននាំគ្នាធ្វើការទាមទារនៅខាងក្រៅរោងចក្រជាមួយនឹងការគ្រវីទង់ជាតិពេញទូទាំងប្រទេសដើម្បីបង្ហាញពីកំហឹងរបស់ពួកគេប្រឆាំងនឹងរដ្ឋាភិបាល។

លោក Ravi Kumudesh មេដឹកនាំសហជីពបាននិយាយថា ៖«យើងខ្ញុំអាចបញ្ជាក់ពីកំហុសនៃគោលនយោបាយរបស់ប្រធានាធិបតីដែលនាំឲ្យកើតមានស្ថានភាពដ៏សោកសៅនៃសេដ្ឋកិច្ចរបស់ប្រទេសយើង។ លោកត្រូវតែចេញ»។

លោកប្រធានាធិបតីស្រីលង្កា Gotabaya Rajapaksa ដែលត្រូវជាប្អូនប្រុសបង្កើតរបស់លោកនាយករដ្ឋមន្ត្រី Mahinda Rajapaksa បានទទូចថា លោកនឹងមិនចុះចេញដាច់ខាត ទោះជាកើតមានបាតុកម្មទូទាំងប្រទេសក៏ដោយ។

ប៉ូលិសបានបាញ់ឧស្ម័នបង្ហូរទឹកភ្នែកលើមនុស្ស និងនិស្សិតរាប់សិបម៉ឺននាក់ដែលបានប្រមូលផ្តុំជួបគ្នានៅខាងក្រៅរដ្ឋសជាតិកាលពីថ្ងៃល្ងាចថ្ងៃព្រហស្បតិ៍ និងបន្តកើតមានទូទាំងប្ររទេសនាថ្ងៃសុក្រនេះ។

វិបត្តិសេដ្ឋកិច្ចរបស់ស្រីលង្កាបានកើតមានឡើង បន្ទាប់ពីជំងឺកូវីដ-១៩ ដែលបានបំផ្លាញដល់វិស័យទេសចរណ៍និងការផ្ទេរប្រាក់ក្រៅប្រទេស។ ដោយមិនអាចទូទាត់តម្លៃលើការនាំចូលឥន្ធនៈ សម្ភារៈប្រើប្រាស់ប្រចាំថ្ងៃរហូតដល់មានការដាច់អគ្គីសនីរាប់ម៉ោង ខណៈមនុស្សតម្រង់ជួររាប់សិបនាន់នៅស្ថានីយ៍ប្រេង។

ជាមួយគ្នានេះ មន្ទីរពេទ្យខ្វះបរិក្ខា និងថ្នាំ ហើយរដ្ឋាភិបាលបានអំពាវនាវដល់ប្រជាជននៅក្រៅប្រទេសឲ្យជួយបរិច្ចាគប្រាក់។ កាលពីខែមុន ស្រីលង្កាបានប្រកាសថា ខ្លួនមិនអាចសងបំណុលបរទេសចំនួន៥១ប៊ីលានដុល្លារអាមេរិកបានទេ ហើយរដ្ឋមន្ត្រីក្រសួងហិរញ្ញវត្ថុ លោក Ali Sabry បានព្រមានសប្តាហ៍នេះថា ប្រទេសនឹងវេទនាជាមួយសេដ្ឋកិច្ចអាក្រក់បំផុតមិនធ្លាប់ហោចណាស់២ឆ្នាំទៀត៕

ប្រែសម្រួល៖ វីរបុត្រ
ប្រភព៖ AFP

Related Topics:ប្រទេសស្រីលង្កា