រុស្ស៊ី ថា អាមេរិក ចង់ប្រែ អ៊ុយក្រែន ជាប្រទេសអាណានិគមរបស់ខ្លួន

បើតាមប្រធានសភា Duma រុស្ស៊ីលោក Vyacheslav Volodin បានសរសេរនៅលើបណ្តាញ Telegram របស់លោកថា មេដឹកនាំសហរដ្ឋអាមេរិកចង់ប្រែក្លាយអ៊ុយក្រែនទៅជាប្រទេសអាណានិគមរបស់ខ្លួន ហើយប្រមូលធនធានទាំងអស់ចេញពីប្រទេសមួយនេះដើម្បីធ្វើឲ្យរុស្ស៊ីចុះខ្សោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសភារូបនេះបាននិយាយថា “ដូចដែលពិភពលោកបានឃើញហើយ ប្រធានាធិបតីអាមេរិក ចូ បៃដិន ចង់ឃើញអ៊ុយក្រែនជាប្រទេសប្រជាធិបតេយ្យ ឯករាជ្យ អធិបតេយ្យភាព និងវិបុលភាព” ។

លោក Volodin បានឲ្យដឹងទៀតថា “ប៉ុន្តែពិភពលោកទាំងមូលមិនបានមើលឃើញបែបនេះនោះទេ ជាពិសេសលទ្ធិប្រជាធិបតេយ្យរបស់អាមេរិកដែលបាននាំទៅដល់នៅក្នុងប្រទេសលីប៊ី អ៊ីរ៉ាក់ អាហ្វហ្គានីស្ថាន ស៊ីរី យូហ្គោស្លាវី និងបញ្ហាបច្ចុប្បន្ននៅអ៊ុយក្រែនជាដើម” ។

លោកសង្កត់ធ្ងន់ថា “នៅអ៊ុយក្រែនក្នុងអំឡុងពេលនេះ ប្រព័ន្ធផ្សព្វផ្សាយត្រូវបានបិទ អ្នកកាសែតឯករាជ្យត្រូវបានសម្លាប់ គណបក្សនយោបាយត្រូវបានហាមឃាត់ ហើយគ្មាននរណាម្នាក់មកពីរដ្ឋាភិបាលពុករលួយបច្ចុប្បន្នគិតអំពីប្រជាជនអ៊ុយក្រែននោះទេ ដូច្នេះវាបង្ហាញយ៉ាងច្បាស់ថា ទីក្រុងវ៉ាស៊ីនតោនមិនត្រូវការឯករាជ្យក្នុងប្រទេសអ៊ុយក្រែនឡើយ” ។

ជាចុងក្រោយលោក Volodin បញ្ជាក់ថា “ជាយូរយារណាស់មកហើយ ទីក្រុងវ៉ាស៊ីនតោនមិនចង់ឃើញរដ្ឋណាមួយក្នុងចំណោមរដ្ឋទាំងអស់ មានប្រជាធិបតេយ្យ និងវិបុលភាពឡើយ ។ មួយវិញទៀតប្រទេសដែលធ្លាប់អភិវឌ្ឍបានធ្លាក់ចូលទៅក្នុងភាពវឹកវរ និងការបំផ្លិចបំផ្លាញ ជាពិសេសប្រជាពលរដ្ឋរបស់ពួកគេប្រឈមមុខនឹងមហន្តរាយមនុស្សធម៌យ៉ាងខ្លាំង ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ វិមានក្រឹមឡាំង ថា ផែនការរបស់ អាមេរិក ធ្វើឲ្យ រុស្ស៊ី លក់ប្រេងក្នុងតម្លៃថោក គឺគ្មានផ្លូវទៅរួចឡើយ