មីយ៉ាន់ម៉ា នឹងកាត់ទោសប្រហារជីវិតមនុស្ស ៤ នាក់ជាលើកដំបូងក្នុងរយៈ ពេល ជាង ៣០ ឆ្នាំ

យោធាមីយ៉ាន់ម៉ានឹងកាត់ទោសប្រហារជីវិតអតីតសមាជិកគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (LDP) របស់លោកស្រី អ៊ុងសាន ស៊ូជី និងសកម្មជនគាំទ្រលទ្ធិប្រជាធិបតេយ្យដ៏ល្បីល្បាញ បន្ទាប់ពី​ត្រូវ​បាន​រក​ឃើញ​ថា ​មាន​ទោស​ពី​បទ​ភេរវកម្ម ហើយនេះគឺជាការកាត់ទោសប្រហារជីវិតលើកដំបូងរបស់ប្រទេសមីយ៉ាន់ម៉ា ចាប់តាំងពី​ទសវត្សរ៍ឆ្នាំ ១៩៩០ មក ។

អ្នកនាំពាក្យរដ្ឋាភិបាលយោធាមីយ៉ាន់ម៉ាលោក Zaw Min Tun បាននិយាយថា អ្នក​ទោស​ទាំង ៤ ​នាក់​រួម​មាន​ អតីត​សមាជិក​សភាគណបក្ស (LDP) ២ នាក់ និង​សកម្មជន​គាំទ្រ​លទ្ធិប្រជាធិបតេយ្យ ២ នាក់ ហើយពួកគេនឹងត្រូវកាត់ទោសប្រហារជីវិតដោយព្យួរ ក តាមនីតិវិធីរបស់ពន្ធនាគារ ។

ប្រភព័ត៌មានបានឲ្យដឹងថា ការកាត់ទោសប្រហារជីវិតរបស់យោធាមីយ៉ាន់ម៉ាលើសកម្មជនប្រឆាំងនឹងរដ្ឋប្រហាររាប់សិបនាក់ ​គឺ​ជា​ផ្នែក​មួយក្នុង​ការ​បង្រ្កាប​លើក្រុម​អ្នក​ប្រឆាំង​ បន្ទាប់​ពីរដ្ឋប្រហារ​កាល​ពី​ឆ្នាំ​មុន ខណៈប្រទេសនេះមិនធ្លាប់​មានការកាត់​ទោសប្រហារ​ជីវិតរាប់​ទសវត្សរ៍​មក​ហើយ ។

លោក Pure Seiya Tho អតីត​សមាជិក​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ (LDP) ​ដែលចាប់​ខ្លួន​កាល​ពី​ខែ​វិច្ឆិកា ឆ្នាំ ២០២១ ត្រូវ​បាន​កាត់​ទោស​ប្រហារ​ជីវិត​កាល​ពី​ខែ​មករា ឆ្នាំ ២០២២ ពី​បទ​ល្មើស​ក្រោម​ច្បាប់​ប្រឆាំង​អំពើ​ភេរវកម្ម ខណៈលោក Kyaw Min Yoo សកម្មជន​គាំទ្រ​លទ្ធិប្រជាធិបតេយ្យ​ដ៏​ល្បីល្បាញត្រូវបានកាត់ទោសប្រហារជីវិតដូចគ្នាដោយតុលាការយោធា ។

ចំណែក ២ នាក់ផ្សេងទៀតត្រូវបានកាត់ទោសប្រហារជីវិតពីបទសម្លាប់ស្ត្រីម្នាក់ដែលពួកគេចោទប្រកាន់ថាជាអ្នកផ្ដល់ព័ត៌មានដល់យោធា ។ ប៉ុន្តែទោះយ៉ាង​ណា​ កាលបរិច្ឆេទ​នៃ​ការ​អនុវត្តទោសប្រហារជីវិតសកម្មជន ២ នាក់នេះនៅ​មិន​ទាន់​កំណត់​នៅ​ឡើយ​ទេ ៕

ប្រែសម្រួលដោយ ​៖ គង់ សំអាន

ប្រភព ៖ MGR Online

ចុចអាន ៖ លោក បៃដិន ប្រកាសអាសន្នគ្មានអគ្គិសនីប្រើប្រាស់គ្រប់គ្រាន់នៅ អាមេរិក